توكيو: پاندەميا مەدالدەن ءۇمىتتى سپورتشىلاردىڭ جاراقاتىن دەر كەزىندە ەمدەۋگە مۇمكىندىك بەرمەگەن
ۇلتتىق وليمپيادا كوميتەتى باس اسسامبلەياسىنىڭ وتىرىسىندا كوميتەتتىڭ باس حاتشىسى اندرەي كريۋكوۆ وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
«سونداي-اق، جاراقات ماسەلەسىن دە كەدەرگى فاكتور رەتىندە اتاۋعا بولادى. پاندەميا كەزىندە ساپالى مەديتسينالىق سەرۆيستىڭ بولماۋى جاراقاتتاردىڭ قوردالانۋىنا اكەلگەن. پاندەميا كەزىندە مەدالدەن ءۇمىتتى سپورتشىلاردىڭ كوبىندە جاراقات بولعانىن انىقتاپ وتىرمىز. ونى شەكتەۋلەردىڭ كەسىرىنەن سول كەزدە ەمدەۋ مۇمكىندىگى بولمادى»، - دەدى كوميتەتتىڭ باس حاتشىسى.
ونىڭ سوزىنشە، كەي سپورت تۇرلەرىنەن باپكەرلەر دايىندىقتى السىرەتىپ العان.
«ەڭ نەگىزگى سەبەپتەردىڭ ءبىرى - باعانا دا ايتقانىمداي، وليمپيادالىق رەزەرۆتىڭ جوقتىعى. توكيو ويىندارى وليمپيادالىق رەزەرۆتىڭ دەڭگەيى - نەگىزگى پروبلەمانىڭ ءبىرى ەكەنىن كورسەتتى. پاندەميا باستالعاننان بەرى وليمپيادالىق دايارلىق ورتالىقتارىنىڭ جۇمىسى تۇگەلدەي توقتاتىلعان بولاتىن. سوڭعى ەكى جىلدا وليمپيادالىق رەزەرۆتىڭ جاس بۋىنىن جوعالتۋ كەلەسى وليمپيادالاردا جاعىمسىز اسەرلەرگە اكەلۋى مۇمكىن»، - دەدى اندرەي كريۋكوۆ.
