اسحات ايماعامبەتوۆ وقۋشىلارعا قاجەتسىز «باسى ارتىق» پاندەر جايىندا پىكىر ءبىلدىردى

نۇر- سۇلتان. قازاقپارات - ەلىمىزدىڭ ءبىلىم جانە عىلىم ءمينيسترى اسحات ايماعامبەتوۆ «مەكتەپتە كەيبىر قاجەتسىز پاندەردى وقىتپاۋ كەرەك» دەگەن پىكىرگە قاتىستى ءوز ويىن ايتتى، دەپ حابارلايدى قازاقپارات ءتىلشىسى.

«جالپى، ەلىمىزدىڭ كوپ مەكتەپتەرىندە بالالار اپتاسىنا 5 كۇن وقيدى. وكىنىشكە قاراي، كەيبىر ورىن تاپشى مەكتەپ وقۋشىلارى 6 كۇندىك جۇيەمەن وقۋعا ءماجبۇر. ونداي سىنىپتار بار. ارينە، ول ىڭعايسىزدىق تۋعىزادى. وسى جەردە ءبىر جايتتى انىقتاپ الۋ كەرەك، بۇل - ەلىمىزدەگى مەكتەپ جەتىسپەۋشىلىگىنەن ەمەس، بار مەكتەپتەگى ورىننىڭ تاپشىلىعىنان تۋىنداپ وتىر. كەلەسى ءبىر ماڭىزدى ماسەلە - مەكتەپتەردەگى قاجەت نەمەسە قاجەت ەمەس دەگەن پاندەر جايىندا. وزدەرىڭىز بىلەتىندەي، ءبىلىم بەرۋدە تيپتىك وقۋ جوسپارى، وقۋ باعدارلاماسى جانە مەملەكەتتىك ستاندارت بار. سوندىقتان «مىنا ءپان كەرەك، اناۋ كەرەك ەمەس» دەۋ - دۇرىس ەمەس. ەلىمىزدىڭ جالپى ءبىلىم بەرۋ مەملەكەتتىك ستاندارتىنا سايكەس، بالالار ءۇشىن بارلىق ءپان قاجەت جانە ماڭىزدى»، - دەدى اسحات ايماعامبەتوۆ ۇكىمەت ۇيىندە ونلاين وتكەن باسپا ءسوز ءماسليحاتىندا.

سونداي- اق، مينيستر ەلىمىزدەگى مەكتەپ تاپشىلىعى پروبلەماسىنا توقتالا كەلە ونىڭ شەشىلەتىنىن ايتىپ سەندىردى. بۇعان دەيىن اسحات ايماعامبەتوۆ ەلىمىزدە ءجۇرىپ جاتقان ساناق جۇمىسىنا مۇعالىمدەر جۇمسالعان جاعدايدا ايىپتىلاردىڭ جاۋاپقا تارتىلاتىنىن ەسكەرتكەن بولاتىن.

اۆتور: ءالي يبرايەۆ