تۇركياداعى قازاقتاردىڭ كىشى قۇرىلتايى: مۇستافا وزتۇرىك ساياباعى اشىلدى
كىشى قۇرىلتايدى ق ر اقپارات جانە قوعامدىق دامۋ مينيسترلىگىنىڭ قولداۋىمەن «وتانداستار قورى» دۇنيەجۇزى قازاقتارى قاۋىمداستىعىمەن بىرلەسىپ ۇيىمداستىردى، دەپ حابارلايدى قازاقپارات.
قازاقتاردىڭ كىشى قۇرىلتايىنىڭ جۇمىسىنا تۇركيا مەن ەۋروپا ەلدەرىندەگى قازاق قاۋىمدارىنىڭ، قازاقستاننىڭ مادەنيەت مەكەمەلەرى مەن جوعارى وقۋ ورىندارىنىڭ 100 دەن استام وكىلدەرى قاتىستى.
شارا جۇمىسىنىڭ اياسىندا شەتەلدەگى قازاق دياسپورالارىنىڭ وزەكتى ماسەلەلەرى بويىنشا ناتيجەلى پىكىر الماسۋ بولدى.
ايتا كەتۋ كەرەك، كىشى قۇرىلتايدىڭ باعدارلاماسى كوپتەگەن مادەني-اعارتۋ ءىس-شارالارىن قامتىدى.
ىستانبۇل قالاسىنىڭ باعدىلجار اۋدانىندا بەلگىلى سپورتشى مۇستافا وزتۇرىك اتىنداعى ساياباقتىڭ اشىلۋ سالتاناتى ءوتتى.
كىشى قۇرىلتايعا قاتىسۋشىلار ءۇشىن قازاقستاندىق مۋزەيلەر مەن جوعارى وقۋ ورىندارى «التىن تامىرلى اتاجۇرت» كورمە، سونداي-اق تۇركياداعى قازاق دياسپوراسىنىڭ جاستارى ءۇشىن «ءبىلىم كورمەسىنىڭ» تۇساۋكەسەرى ۇيىمداستىرىلدى.
سونىمەن قاتار، شەتەلدىك ىسكەر قازاق قاۋىمداستىعىمەن كەزدەسۋ بارىسىندا «الىستاعى اعايىن» دەرەكتى فيلمى كورسەتىلدى. قازاقتاردىڭ كىشى قۇرىلتايى ءىس-شارالار باعدارلاماسى اياسىندا قاراعاندى وبلىسىنان كەلگەن تاتتىمبەت قازانعاپ ۇلى اتىنداعى اكادەميالىق قازاق حالىق اسپاپتار وركەسترىنىڭ قاتىسۋىمەن گالا-كونسەرت ۇيىمداستىرىلدى.
ءىس-شارانىڭ قورىتىندىسى بويىنشا قازاقستاندىق تاراپ كىشى قۇرىلتايعا قاتىسۋشىلارعا قازاق ەلىنىڭ مادەنيەتى، تاريحى، قازاقستانداعى قازىرگى ءومىر تۋرالى ادەبيەتتەردى سىيعا تارتتى.
