ەلدەگى اقشانىڭ قۇنسىزدانۋى تۇراقتى سيپات الىپ بارادى - دوسايەۆ

نۇر-سۇلتان. قازاقپارات - ق ر ۇلتتىق بانكىنىڭ ءتوراعاسى ەربولات دوسايەۆ ۇكىمەت وتىرىسىندا ەلدەگى ينفلياتسيانىڭ تۇراقتى سيپاتقا يە بولعانىن ايتىپ، ونىڭ سەبەپتەرىنە توقتالدى، دەپ حابارلايدى قازاقپارات ءتىلشىسى.

«قازاقستاندا ينفلياتسيانىڭ ءوسۋى بارىنشا تۇراقتى سيپات الىپ وتىر. بيىلعى ءساۋىر مەن تامىز ارالىعىندا جىلدىق ينفلياتسيا %7,0 تەن %8,7 كە دەيىن جىلدامدادى. باعانىڭ اي سايىنعى ءوسىمى 2008 -جىلدان بەرى العاش رەت تامىزدا ەڭ جوعارى بولدى. ماۋسىمدىق تازارتىلعان بازالىق ينفلياتسيا، ياعني كوكونىستەر مەن جەمىستەر، تۇرعىن ءۇي-كوممۋنالدىق شارۋاشىلىعىنىڭ قىزمەتتەرى مەن ەنەرگيا رەسۋرستارى باعاسىنىڭ ءوسۋىن ەسەپكە الماعانداعى ينفلياتسيا تاريحي ورتاشا ماندەردەن %25 كە جوعارى بولدى جانە ورنىقتى ينفلياتسيالىق پروتسەستەردىڭ قالىپتاسۋىن كورسەتە وتىرىپ، %0,75 بولدى»، - دەيدى ۇلتتىق بانك باسىشسى.

ونىڭ سوزىنە قاراعاندا، تۇتىنۋ باعاسىنىڭ جيىنتىق يندەكسىنىڭ %51 ىن ازىق-تۇلىك ينفلياتسياسى قۇراپ وتىر. ال بۇل - جالپى باعاعا قىسىم كورسەتەتىن فاكتور.

«ازىق- تۇلىك باعاسىنىڭ جىلدىق ءوسۋى ءبىر ايدا 0,4 پايىزدىق تارماققا جەدەلدەپ، وسى جىلعى تامىزدا %11,4 كە جەتتى. ەت، كوكونىس، ماي جانە قانت باعاسىنىڭ ءوسۋى بايقالادى. وسى تاۋارلاردىڭ ازىق- تۇلىك كومپونەنتىنە قوساتىن ۇلەسى بيىلعى جىلعى مامىر- تامىزدا 2,55 پايىزدىق تارماقتى قۇرادى. ەتتىڭ قىمباتتاۋ فاكتورلارىنىڭ اراسىندا وسى جىلدىڭ 7 ايىندا جەم-ءشوپتىڭ %25 كە قىمباتتاۋىنا بايلانىستى الەمدىك باعانىڭ جانە ىشكى وندىرۋشىلەر باعاسىنىڭ ءوسۋىن اتاپ وتۋگە بولادى. جەم- ءشوپ داقىلدارىنىڭ قۇنى ەت ءوندىرىسىنىڭ وزىندىك قۇنىنىڭ %70 ىن قۇرايدى»، - دەدى ەربولات دوسايەۆ.

اۆتور: ەسىمجان ناقتىباي