09:54, 14 - قىركۇيەك 2021 | GMT +5
باتىس قازاقستان مەن ماڭعىستاۋدىڭ اكىمدەرى ۆاكسيناتسيامەن قامتۋدى كۇشەيتسىن - اسقار مامين
نۇر- سۇلتان. قازاقپارات - ەلىمىزدە 57 ستاتسيونار كوروناۆيرۋسسىز پاتسيەنتتەردى قابىلداۋدىڭ ستاندارتتى رەجيمىنە اۋىستى.
بۇل تۋرالى ۇكىمەت وتىرىسىندا ق ر پرەمەر- ءمينيسترى اسقار مامين ايتتى، دەپ حابارلايدى قازاقپارات ءتىلشىسى.
«جالپى ەپيدەميولوگيالىق جاعداي جاقسارىپ كەلەدى. ۆيرۋستىڭ رەپرودۋكتيۆتىلىك يندەكسى - 0,87. اۋرۋحانالاردىڭ جۇكتەمەسى ازايدى. ينفەكتسيالىق اۋرۋحانالار - 35 پايىز، جانساقتاۋ بولىمدەرى - 35 پايىز تولعان. ينفەكتسيالىق ستاتسيونار رەتىندە جۇمىس ىستەگەن 57 ستاتسيونار كوروناۆيرۋسسىز پاتسيەنتتەردى قابىلداۋدىڭ ستاندارتتى رەجيمىنە شىقتى»، - دەدى ۇكىمەت باسشىسى.
ونىڭ دەرەگىنشە، قازىرگى ۋاقىتتا 7,1 ميلليونعا جۋىق ادام ۆاكسينانىڭ ءبىرىنشى كومپونەنتىن، 6 ميلليون ادام ەكىنشى كومپونەنتىن الدى.
«باتىس قازاقستان، ماڭعىستاۋ وبلىستارىنىڭ اكىمدەرى ۆاكسيناتسيامەن قامتۋ جۇمىسىن كۇشەيتسىن»، - دەدى اسقار مامين
