ساياسي جاڭعىرۋ: ءبىرقاتار زاڭ جوباسى ازىرلەنبەك
بۇل تۋرالى ق ر پرەزيدەنتىنىڭ كومەكشىسى ەرلان قارين telegram كانالىندا جازدى.
«بۇگىن، 13- قىركۇيەكتە قازاقستان رەسپۋبليكاسىنىڭ پرەزيدەنتى «مەملەكەت باسشىسىنىڭ 2021-جىلدىڭ 1- قىركۇيەگىندەگى «حالىق بىرلىگى جانە جۇيەلى رەفورمالار - ەل وركەندەۋىنىڭ بەرىك نەگىزى» اتتى قازاقستان حالقىنا جولداۋىن جۇزەگە اسىرۋ ءىس-شارالارى تۋرالى» جارلىققا قول قويدى.
ساياسي جاڭعىرۋ جانە ادام قۇقىعىن قورعاۋ توپتاماسى بارنشا اۋقىمدى ءارى ول 12 تارماقتان تۇرادى.
اتاپ ايتار بولساق، ساياسي جاڭعىرۋ باعدارىن جالعاستىرۋ اياسىندا 2 زاڭ جوباسىن ازىرلەۋ ءارى قابىلداۋ جوسپارلانىپ وتىر.
ءبىرىنشىسى اۋدانداردىڭ، وبلىستىق ماڭىزى بار قالالاردىڭ اكىمدەرىن تىكىلەي، ونىڭ ىشىندە ىلكى رەجيمدە دە سايلاۋ ءۇشىن زاڭناماعا ءتيىستى وزگەرتۋلەر ەنگىزەتىن بولادى.
ەكىنشى زاڭ دەپۋتات مانداتتارىن ءبولۋ بارىسىندا كۆوتالاردى مىندەتتى تۇرە ەسكەرۋ تۋرالى نورمانى بەكىتەدى. سونىمەن قاتار ايەلدەر مەن جاستاردان بولەك ازاماتتاردىڭ كۆوتاعا جاتاتىن ساناتتارىن كەڭەيتە وتىرىپ، ەرەكشە قاجەتتىلىگى بار جاندارعا دا كۆوتا بەكىتەدى»، - دەپ جازدى ە. قارين.
ونىڭ ايتۋىنشا، مۇنان بولەك، ادام قۇقىعىن قورعاۋ جۇيەسىن جەتىلدىرۋ اياسىندا ازاماتتىق تۋرالى حالىقارالىق پاكتى ەكىنشى فاكۋلتاتيۆتىك حاتتاماسىنىڭ ەرەجەلەرىمەن قىلمىستىق كودەكس نورمالارىن ىزگىلەندىرۋگە، سونىمەن قاتار پروكۋرورلاردىڭ جاۋاپكەرشىلىگىن ارتتىرۋ ماقساتىندا ولاردىڭ ايىپتاۋ اكتىلەرىن دايىنداۋ بارىسىنداعى قۇزىرەتىن كەڭەيتۋ جانە تەرگەۋ ناتيجەلەرىن قۇقىقتىق باعالاۋ تەتىكتەرىن كۇشەيتۋگە باعىتتالعان 2 زاڭدى قابىلداۋ كوزدەلگەن.
«سونىمەن قاتار وسى باعىتتا مەملەكەت باسشىسىنىڭ ەكى جارلىعىن دايىنداۋ جوسپارلانىپ وتىر»، - دەپ تولىقتىردى ق ر پرەزيدەنتىنىڭ كومەكشىسى.
