ونلاين ساناققا قاتىسۋشى نەنى ءبىلۋى كەرەك - ۇلتتىق ستاتيستيكا بيۋروسى
وسى ورايدا ساناققا قاتىسۋشى نەنى ءبىلۋى كەرەك جانە سۇراق تۋىنداعاندا قايدا حابارلاسۋعا بولادى؟ اتالعان ساۋالدارعا ق ر ۇلتتىق ستاتيستيكانىڭ رەسمي وكىلى ولجاس سايلاۋبەك ۇلى جاۋاپ بەردى، دەپ حابارلايدى قازاقپارات ءتىلشىسى.
«ونلاين ساناقتان وتكەندە قاتىسۋشى وزىمەن قاتار وتباسى مۇشەلەرىن دە تىركەي الادى. ياعني وتباسىنىڭ ءار مۇشەسىنىڭ جەكە تىركەلۋىنىڭ قاجەتى جوق. بۇل ىڭعايلى ءارى كوپ ۋاقىت المايدى. بۇكىل وتباسى مۇشەلەرىنە قاتىستى ءتيىستى مالىمەتتەردى تىركەگەن سوڭ ساناقتىڭ قورىتىندىسى حابارلاما تۇرىندە كەلەدى. بۇگىندە ونلاين ساناق قارقىندى تۇردە ءجۇرىپ جاتىر جانە ەشقانداي زاڭ بۇزۋشىلىق وقيعاسى تىركەلگەن ەمەس»، - دەدى ولجاس سايلاۋبەك ۇلى.
ونىڭ ايتۋىنشا، 1-قازاننان باستاپ ساناق جۇمىسىنا ينتەرۆيۋەرلەر كىرىسەدى.
«بىزدە 1446 بايلانىس ورتالىعى جۇمىس ىستەيدى. ازاماتتار Call ورتالىققا حابارلاسىپ ءوزىن تولعاندىرعان سۇراقتارعا جاۋاپ الادى. حابارلاسۋ تەگىن جانە ورتالىق تاۋلىك بويى جۇمىس ىستەيدى. ورتالىققا وسى ۋاقىتقا دەيىن حابارلاسقان ازاماتتار كوبىنەسە ونلاين ساناقتان ءوتۋ پروتسەسى مەن تىركەلۋگە قاتىستى سۇرايدى. ءوز كەزەگىندە ءبىزدىڭ ماماندار بارلىق سۇراقتارعا جاۋاپ بەرەدى»، - دەيدى ول.
سونداي-اق، رەسمي وكىل ساناق ساۋالناماسىنا توقتالىپ ءوتتى. مالىمدەۋىنشە ونداعى سۇراقتار حالىق تالقىسىنان وتكەن.
«سۇراقتار ەلىمىزدە 2009 -جىلى وتكەن ساناق ساۋالناماسىنىڭ نەگىزىندە قۇراستىرىلدى. سونداي-اق، ونىڭ ىشىندە مەملەكەتتىك قۇزىرلى ورگانداردىڭ ۇسىنىسى بويىنشا ەنگىزىلگەن سۇراقتار دا بار. ودان بولەك، حالىقارالىق ۇيىمداردىڭ دا پىكىر، ۇسىنىسى ەسكەرىلدى. اتاپ ايتقاندا، ەۋروپالىق ستاتيستەر كونفەرەنسياسى جانە ۆاشينگتون توبى سەكىلدى سىرت ۇيىمدار. سونىمەن قاتار بيىلعى ونلاين ساناقتىڭ ساۋالدارى اشىق نقا الاڭىنا جاريالانىپ، حالىق تالقىسىنان ءوتىپ، مەملەكەتتىك ورگاندارمەن كەلىسىلگەن»، - دەدى و. سايلاۋبەك ۇلى.
