ا ق ش جانە قىتاي باسشىلارى جارتى جىلدان استام ۋاقىت ىشىندە العاش رەت تەلەفونمەن سويلەستى

نۇر-سۇلتان. قازاقپارات - ا ق ش جانە قىتاي باسشىلارى جەتى اي ىشىندە العاش رەت تەلەفون ارقىلى سويلەستى.

الەم ەكونوميكاسىندا جەتەكشى ورىنعا يە ەكى ەل اراسىنداعى قارىم-قاتىناس كوپتەگەن ماسەلە مەن داۋلارعا قاتىستى ۋشىعىپ تۇر.

ا ق ش پرەزيدەنتى دجو بايدەن مەن قىتاي باسشىسى شي جينپيڭ «تەرەڭ، ستراتەگيالىق ماسەلەلەر بويىنشا پىكىر الماستى، ونىڭ بارىسىندا ەكى ەل مۇددەسى توعىساتىن سالالار، سونىمەن بىرگە تاراپتاردىڭ مۇددەلەرى مەن قۇندىلىقتارى سايكەس كەلمەيتىن ماسەلەلەر دە تالقىلاندى» دەلىنگەن اق ءۇي حابارلاماسىندا.

قاڭتار ايىنان بەرى ەكى ەل باسشىسى ەكىنشى رەت تەلەفون ارقىلى تىلدەسىپ وتىر.

ۆاشينگتون مەن بەيجىڭ اراسىنداعى جاعدايدىڭ بىرنەشە جىلدان بەرى ۋشىعۋى وزگە ماسەلەلەرمەن قاتار ساۋدا، كيبەرقاۋىپسىزدىك، ادام قۇقىعى، ونىڭ ىشىندە شىڭجاڭدا تۇركى ءتىلدى حالىقتىڭ قۋدالانۋى ماسەلەلەرىمەن بايلانىستى.

كەيىنگى كەزدە ا ق ش بەيجىڭدى كوروناۆيرۋستىڭ پايدا بولۋ سەبەبىن زەرتتەۋدە اشىقتىق تانىتپادى دەپ تە سىناپ كەلەدى. كوروناۆيرۋس اۋرۋى العاش رەت قىتايدا تىركەلگەن.

ا ق ش سونىمەن بىرگە بەيجىڭنىڭ تايۆان جانە وڭتۇستىك قىتاي تەڭىزىندەگى تەرريتوريالىق داۋلار بويىنشا ساياساتىنا نارازى.

ەكى ەل ارىپتەستىك ورناتا الادى دەگەن سالالار اراسىندا عالامدىق جىلىنۋمەن كۇرەس، كورەيا تۇبەگىندەگى يادرولىق داعدارىستىڭ الدىن الۋ، عالامدىق ەكونوميكا تۇراقتىلىعى ماسەلەلەرى بار.

اق ءۇيدىڭ حابارلاۋىنشا، دجو بايدەن ا ق ش ەكى ەل اراسىندا قاقتىعىسقا ۇلاسىپ كەتپەيتىندەي دەنى دۇرىس، جاۋاپتى باسەكە بولعانىن قالايتىنىن ايقىن جەتكىزگەن.

قىتايدىڭ CCTV مەملەكەتتىك ارناسىنىڭ كەلىسسوز بويىنشا تاراتقان حابارلاماسىنا قاراعاندا، شي جينپيڭ دجو بايدەنگە ۆاشينگتون ارەكەتىنىڭ سالدارىنان «ەلەۋلى قيىندىقتارعا» تاپ بولعانىن اتاپ وتكەن.

مەملەكەتتىك ب ا ق- تىڭ جازۋىنشا، شي جينپيڭ «دۇرىس قارىم-قاتىناس الەمنىڭ بولاشاعى مەن تاعدىرى ءۇشىن وتە ماڭىزدى» دەپ ايتقان.

«ازاتتىق»