ەرالى توعجانوۆ باستاعان ۇكىمەتتىك دەلەگاتسيا جۇمىس ساپارىمەن قورداي اۋدانىنا باردى
پرەمەر- ءمينيستردىڭ ورىنباسارى مەملەكەت باسشىسىنىڭ تاپسىرماسى اياسىندا ۆاكسينالار وندىرەتىن بيوفارماتسيەۆتيكالىق زاۋىتتىڭ جۇمىسىمەن تانىستى. ەرالى توعجانوۆ زاۋىتتا وبلىس اكىمى، ينستيتۋت باسشىلىعى، ساراپشىلاردىڭ قاتىسۋىمەن ارنايى كەڭەس وتكىزدى، وندا زاۋىتتىڭ وزەكتى ماسەلەلەرى قارالىپ، شەشۋ جولدارى ايقىندالدى.
سونداي- اق، ۆيتسە- پرەمەر ينستيتۋت قىزمەتكەرلەرى ءۇشىن تۇرعىن ءۇي قۇرىلىسىنىڭ بارىسىن تەكسەردى. تۇرعىن ۇيمەن قامتاماسىز ەتۋ بيولوگيالىق قاۋىپسىزدىك سالاسىندا بىلىكتى قىزمەتكەرلەردى تارتۋ ءۇشىن جاعداي جاساۋعا مۇمكىندىك بەرەدى. بۇدان بولەك، دەلەگاتسيا گۆاردەيسك كەنتىنىڭ تۇرعىندارى ءۇشىن جاڭا دەنە شىنىقتىرۋ- ساۋىقتىرۋ كەشەنىنىڭ قۇرىلىسىمەن تانىستى.
سونىمەن قاتار ە. توعجانوۆ بۇقارالىق سپورتتى دامىتۋ ءۇشىن «اۋىل - ەل بەسىگى» باعدارلاماسى اياسىندا سالىنعان وتار اۋىلىنداعى مادەنيەت ءۇيى مەن دەنە شىنىقتىرۋ- ساۋىقتىرۋ كەشەنىنىڭ قۇرىلىس الاڭىندا بولدى. كەشەن ويىن الاڭىمەن، كۇرەس جانە جاتتىعۋ زالدارىمەن جابدىقتالعان، ۇستەل تەننيسىنە ارنالعان بولمەلەر بار. جالپى، پرەمەر- ءمينيستردىڭ ورىنباسارى قورداي اۋدانىنىڭ الەۋمەتتىك ينفراقۇرىلىمىن جاقسارتۋ بويىنشا جۇرگىزىلىپ جاتقان جۇمىستارعا وڭ باعا بەردى.
