ەربولات دوسايەۆ پرەزيدەنتكە بيىلعى ينفلياتسيا بولجامى جايىندا باياندادى
مەملەكەت باسشىسى ۇلتتىق بانك ءتوراعاسىنىڭ بيىلعى 8ايداعى اقشا- كرەديت ساياساتىن ىسكە اسىرۋدىڭ الدىن الا قورىتىندىسى جونىندە، سونداي- اق الەم ەكونوميكاسىنىڭ قايتا قالپىنا كەلۋ بارىسىندا ينفلياتسيالىق قاتەردىڭ كۇشەيە تۇسكەنى تۋرالى ەسەبىن تىڭدادى. پرەزيدەنتكە ۇكىمەتپەن بىرلەسىپ بەكىتىلگەن ينفلياتسياعا قارسى شارالار مەن ونى جۇزەگە اسىرۋدىڭ نەگىزگى باعىتتارى، سونداي- اق بيىلعى ينفلياتسيانىڭ جاڭارتىلعان بولجامدارى تۋرالى باياندالدى.
سونىمەن قاتار قاسىم- جومارت توقايەۆقا حالىقتىڭ تابىسى مەن تۇتىنۋ دەڭگەيىنىڭ ارتۋىنا ىقپال ەتەتىن قازاقستانداعى ەكونوميكالىق بەلسەندىلىكتىڭ ارتا تۇسكەنى جونىندە جانە پرەزيدەنتتىڭ داعدارىسقا قارسى باستامالارىن ىسكە اسىرۋ بارىسى تۋرالى مالىمەت بەرىلدى.
بۇدان بولەك مەملەكەت باسشىسىنا قازاقستاننىڭ جالپى حالىقارالىق رەزەرۆىنىڭ بيىلعى 8 ايدا 93,7 ميلليارد دوللارعا دەيىن ۇلعايعانى جانە ۇلتتىق قوردىڭ ينۆەستيتسيالىق كىرىسىنىڭ 2,3 ميلليارد دوللارعا دەيىن وسكەنى تۋرالى الدىن الا دەرەكتەر ۇسىنىلدى.
كەزدەسۋ قورىتىندىسى بويىنشا قاسىم- جومارت توقايەۆ ينفلياتسيانىڭ مونەتارلىق ەمەس فاكتورلارىن تومەندەتۋگە جانە حالىقارالىق نارىقتارداعى قۇبىلمالىلىقتىڭ ارتۋ جاعدايىندا قارجىلىق تۇراقتىلىقتى قامتاماسىز ەتۋگە باسا ءمان بەرۋدى تاپسىردى.
