پرەزيدەنت سولتۇستىك ماكەدونيانىڭ سىرتقى ىستەر ءمينيسترى بۋيار وسمانيدى قابىلدادى

نۇر- سۇلتان. قازاقپارات - پرەزيدەنت ەلىمىزگە رەسمي ساپارمەن كەلگەن سولتۇستىك ماكەدونيانىڭ سىرتقى ىستەر ءمينيسترى بۋيار وسمانيدى قابىلدادى، دەپ حابارلايدى اقوردا.

قاسىم- جومارت توقايەۆ بۋيار وسمانيگە ءىلتيپات بىلدىرە وتىرىپ، ەكى ەل اراسىنداعى ىنتىماقتاستىققا تىڭ سەرپىن بەرۋ تۇرعىسىنان ونىڭ بۇل ساپارىنىڭ ماڭىزى زور ەكەنىن اتاپ ءوتتى.

- ءبىزدىڭ ەلدەرىمىز ءوزارا ءىس- قيمىلداردى، اتاپ ايتقاندا ساۋدا، ينۆەستيتسيا سالالارىنداعى قاتىناستاردى جانە گۋمانيتارلىق بايلانىستاردى نىعايتۋ ءۇشىن زور مۇمكىندىكتەرگە يە. سوندىقتان مەملەكەتتەرىمىز اراسىنداعى ىنتىماقتاستىقتى دامىتۋ ءۇشىن بار الەۋەتتى پايدالانۋ كەرەك. سونداي- اق حالىقارالىق ۇيىمدار اياسىندا دا تىعىز ىقپالداستىق ورناتامىز دەگەن ۇمىتتەمىز، - دەدى قازاقستان پرەزيدەنتى.

قاسىم- جومارت توقايەۆ تەتوۆو قالاسىنداعى كوروناۆيرۋسپەن اۋىرعان ناۋقاستار ەمدەلەتىن اۋرۋحانادا بولعان ءورت سالدارىنان قازا تاپقان ادامداردىڭ وتباسىلارىنا كوڭىل ايتتى. كەزدەسۋدە پرەزيدەنت اۋعانستانداعى احۋالعا ەرەكشە نازار اۋداردى.

- اۋعانستانعا قاتىستى ۇستانىمىمىز ايقىن. حالىقارالىق قوعامداستىقتىڭ وسىنداي بەتبۇرىستار كەزىندە اۋعانستاننان ىرگەسىن اۋلاق سالماي، اتالعان ەلگە كومەك بەرىپ، قولداۋ كورسەتۋى قاجەت دەپ ەسەپتەيمىز. ءبىز اۋعانستاننىڭ ۋاقىتشا جاڭا ۇكىمەتىن ينكليۋزيۆتى، بارلىق ەتنيكالىق توپتار مەن قوعامدىق- ساياسي كۇشتەردىڭ مۇددەسىن قۇرمەتتەيدى دەپ ۇمىتتەنەمىز. قازىرگى اۋعانستان ۇكىمەتى ادام قۇقىقتارىن، ايەلدەر مەن بالالاردىڭ قۇقىقتارىن قورعاۋ جونىندەگى مىندەتتەمەلەرىن ورىنداپ، حالىقارالىق قاۋىمداستىقتى جاھاندىق جانە ايماقتىق قاۋىپسىزدىك پەن تۇراقتىلىققا قاۋىپ توندىرەتىن تەرروريزمنىڭ، زاڭسىز ەسىرتكى اينالىمىنىڭ تارالۋىنان جانە باسقا دا قيىندىقتاردان قورعاۋ ءۇشىن ناقتى شارالار قابىلدايتىنىنا ءۇمىت ارتامىز. سونىمەن قاتار قازاقستان ۇكىمەتى اۋعانستان ۇكىمەتىمەن كونسترۋكتيۆتى ىسكەرلىك بايلانىستاردى، اسىرەسە ساۋدا جانە گۋمانيتارلىق ىنتىماقتاستىق سالالارىنداعى قاتىناستاردى ورناتۋعا دايىن. ويتكەنى بۇل سالالار بويىنشا ەكى ەل اراسىنداعى ءداستۇرلى تىعىز بايلانىس بار، - دەدى مەملەكەت باسشىسى.

قاسىم- جومارت توقايەۆ اۋعانستاندا تۇراتىن قازاقستاندىقتاردىڭ قاۋىپسىزدىگىن قامتاماسىز ەتۋدىڭ ماڭىزدى ەكەنىنە توقتالدى. ول بۋيار وسمانيگە قازاقستان ازاماتتارى مەن ەتنيكالىق قازاقتاردى ءوز وتانىنا قايتارۋ جونىندە، سونداي- اق الەمدىك قاۋىمداستىقتىڭ حالىقارالىق ۇيىمدار قىزمەتكەرلەرىن، ونىڭ ىشىندە ب ۇ ۇ- نىڭ اۋعانستانعا كومەك بەرۋ جونىندەگى ميسسياسىن ەۆاكۋاتسيالاۋ جۇمىستارىنا كومەكتەسۋ جونىندە قابىلداعان شارالارى تۋرالى ايتتى.

ءوز كەزەگىندە بۋيار وسماني كەزدەسۋگە مۇمكىندىك بەرگەنى ءۇشىن مەملەكەت باسشىسىنا العىس ايتىپ، ەكى ەل تاۋەلسىزدىگىنىڭ 30 جىلدىعى اياسىندا جاساعان ساپارىنىڭ سيمۆولدىق ءمانى بار ەكەنىن اتاپ ءوتتى.

- مەنىڭ قازاقستانعا ساپارىم ءبىزدىڭ مەملەكەتتەر اراسىنداعى قارىم- قاتىناستاردى جاڭا بەلەسكە شىعارادى دەگەن سەنىمدەمىن. ءبىز ەكىجاقتى بايلانىستاردى تەرەڭدەتۋگە جانە نىعايتۋعا مۇددەلىمىز، - دەدى ماكەدونيالىق ديپلومات.

كەزدەسۋدە اۋعانستان باعىتى بويىنشا حالىقارالىق ادىستەردى جۇمىلدىرۋدا ب ۇ ۇ قاۋىپسىزدىك كەڭەسىنىڭ باسىمدىققا يە ەكەنىن اتاپ ءوتىلدى.