جانداربەك بەكشين: الماتىلىقتار ماسكا تاقپايدى، توي وتكىزەدى
ونىڭ ايتۋىنشا، حالىقتىڭ بۇل ساناتىنىڭ ۆاكسينالانۋ بەلسەندىلىگى تومەن جانە ولار كارانتين رەجيمىن جيى بۇزادى.
«ەپيدەميولوگيالىق زەرتتەۋ ناتيجەلەرى بويىنشا 20-39 جاس ارالىعىنداعى ازاماتتاردا قاۋىپتى ىندەتتى جۇقتىرۋ %31,2، 40-59 جاستاعىلاردا %24، 60 جاستان اسقان قارت ادامداردا %23. ينفەكتسيا جۇقتىراتىن نەگىزگى ورىندار بۇرىنعىشا ساۋدا وبەكتىلەرى - %34، وتباسىلىق بايلانىس - %19,5، قوعامدىق كولىكتەر - %17,8»، - دەدى الماتى قالاسىنىڭ باس سانيتارلىق دارىگەرى.
الماتى قالاسىنىڭ باس سانيتارلىق دارىگەرىنىڭ سوزىنشە، ۆيرۋستىڭ تارالۋى تومەندەي باستادى، ءبىراق بۇل ينفەكسيا كەتتى دەگەندى بىلدىرمەيدى.
«ازاماتتار دەرتتىڭ قانشالىقتى قاۋىپتى ەكەنىن ءتۇسىنۋى ءتيىس. اسىرەسە 60 جاستان اسقاندار قاتەر توبىندا، ويتكەنى، ءولىم كوبىنەسە حالىقتىڭ وسى ساناتىندا بولادى. جاسىنا قاراي كوپتەگەن ادامداردا سوزىلمالى اۋرۋى بار، دەرت جۇققان كەزدە ولار ءورشي تۇسەدى. سوندىقتان رەميسسيا كەزەڭىندە ەكپە الۋ قاجەت. كوروناۆيرۋستى ۆاكسينا عانا جەڭەدى»، - دەدى ول.
جانداربەك بەكشين حالىقتى ۆاكسينالاۋدى كۇشەيتۋگە جانە قوعامدىق ورىن مەن كولىكتە ماسكا رەجيمىن ساقتاۋعا شاقىردى.
ول قالا تۇرعىندارىنان ادام كوپ جينالاتىن نىسانعا، تۇنگى كلۋب، مەيرامحانا، ءدامحاناعا بارماۋعا جانە ۇيدەگى بۇقارالىق ءىس-شارانى شەكتەۋگە كەڭەس بەردى.
«الماتىلىقتار تويدى توقتاتپاي وتىر. ماسكا تاعۋ رەجيمىن دە ەلەمەيدى»، - دەيدى ول.
