جامبىلداعى جارىلىس: بەردىبەك ساپاربايەۆ پرەزيدەنتكە توتەنشە جاعداي سالدارىن جويۋ جونىندە ەسەپ بەردى

نۇر- سۇلتان. قازاقپارات - پرەزيدەنت جامبىل وبلىسىنىڭ اكىمى بەردىبەك ساپاربايەۆتىڭ ەسەبىن تىڭدادى، دەپ حابارلايدى قازاقپارات.

مەملەكەت باسشىسى باسپا ءسوز قىزمەتىنىڭ جەتەكشىسى بەرىك ءۋالي تاراتقان مالىمەتكە سەنسەك، قاسىم- جومارت توقايەۆ جامبىل وبلىسىنىڭ اكىمى بەردىبەك ساپاربايەۆتىڭ بايزاق اۋدانىندا بولعان توتەنشە جاعدايدىڭ سالدارىن جويۋ جونىندەگى ەسەبىن تەلەفون ارقىلى تىڭداعان.

پرەزيدەنتكە 122 جىلجىمايتىن مۇلىكتىڭ، سونىڭ ىشىندە 106 تۇرعىن ءۇي، 12 كوممەرتسيالىق جانە 4 الەۋمەتتىك نىساننىڭ قيراعانى جونىندە باياندالدى. قازىرگى ۋاقىتتا 12 مەكەمە، 23 تەحنيكا مەن 185 جۇمىسشى قايتا قالپىنا كەلتىرۋ جۇمىستارىنا جۇمىلدىرىلعان.

جامبىل وبلىسى اكىمىنىڭ ايتۋىنشا، بۇگىنگە دەيىن 62 تۇرعىن ءۇي جوندەلگەن. جالپى قايتا قالپىنا كەلتىرۋ جۇمىستارىن 10 - قاراشاعا دەيىن اياقتاۋ جوسپارلانىپ وتىر. جىبەك جولى اۋىلىنداعى قيراعان №5 ورتا مەكتەپتىڭ ورنىنا جاڭا مەكتەپ سالىنادى.

بەردىبەك ساپاربايەۆتىڭ مالىمەتى بويىنشا 26 ادام ستاتسيوناردا ەم الىپ جاتىر. ولاردىڭ 15- ءى گوسپيتالدا ەمدەلىپ جاتقان اسكەري، پوليتسيا جانە توتەنشە جاعدايلار جونىندەگى دەپارتامەنتتىڭ قىزمەتكەرى. جارىلىستان قازا بولعانداردىڭ وتباسىلارىنا ماتەريالدىق كومەك كورسەتىلۋدە، سونداي- اق زارداپ شەككەن وتباسىلاردىڭ جۇمىسسىز مۇشەلەرىن جۇمىسقا ورنالاستىرۋ ماسەلەسى شەشىلىپ جاتىر. ەكىنشى دەڭگەيلى بانكتەرگە قارىزى بار مۇنداي وتباسىلاردىڭ كرەديتتەرىن وتەۋ ماسەلەسى تولىق شەشىلگەن.

سونىمەن قاتار مەملەكەت باسشىسىنا ءوڭىردىڭ الەۋمەتتىك- ەكونوميكالىق دامۋى جونىندە مالىمەت بەرىلدى. جامبىل وبلىسىنىڭ ەكونوميكالىق ءوسىمى 106,4 پايىزدى قۇرايدى. بيىلعى قاڭتار- تامىز ايلارىنىڭ قورىتىندىسى بويىنشا ونەركاسىپ ءوندىرىسىنىڭ ءوسىمى % 5,4، اۋىل شارۋاشىلىعى % 3، ينۆەستيتسيا % 19,5، قۇرىلىس % 9، تۇرعىن ءۇي % 14، ساۋدا- ساتتىق % 4 دەڭگەيىندە بولادى دەپ كۇتىلۋدە. بيىل اۋا رايىنىڭ قولايسىزدىعى مەن قۋاڭشىلىققا قاراماستان، ەگىن ونىمدىلىگى وبلىس بويىنشا گەكتارىنا 15 سەنتنەردەن اينالماق.

اكىمنىڭ ايتۋىنشا، وبلىستاعى ۆاكسينا الۋعا ءتيىستى تۇرعىنداردىڭ 72,5 پايىزى ەكپە العان. سونىمەن قاتار پرەزيدەنتكە ۆاكسينا شىعاراتىن زاۋىتتىڭ دايىن ءونىمدى قۇيۋعا تولىق ءازىر ەكەنى ايتىلدى. جۇمىس كەستەگە ساي جۇرگىزىلۋدە. زاۋىت پەن بيولوگيالىق قاۋىپسىزدىك پروبلەمالارى جونىندەگى عىلىمي زەرتتەۋ ينستيتۋتىنىڭ قىزمەتكەرلەرىنە ارنالعان ۇيلەر مەن اكت زالى بار دەنە شىنىقتىرۋ- ساۋىقتىرۋ كەشەنىنىڭ قۇرىلىسى جالعاسىپ جاتىر.

اڭگىمە سوڭىندا قاسىم- جومارت توقايەۆ وبلىس اكىمىنە وسى باعىتتاعى جۇمىستاردى جالعاستىرۋ جونىندە ءبىرقاتار ناقتى تاپسىرما بەردى.