ەلىمىزدە تۇماۋعا قارسى ۆاكسيناتسيا باستالادى
بۇل تۋرالى ق ر دەنساۋلىق ساقتاۋ ءبىرىنشى ۆيتسە-ءمينيسترى مارات شورانوۆ ايتتى، دەپ حابارلايدى قازاقپارات ءتىلشىسى.
«جاقىنداپ قالعان جرۆي، ياعني تۇماۋ ماۋسىمىنا ايرىقشا توقتالىپ وتكىم كەلەدى. بيىل بيۋجەت قاراجاتى ەسەبىنەن رەسەيدە شىعارىلعان «گريپپول+» ۆاكسيناسىنىڭ 2,5 ميلليون دوزاسى ساتىپ الىندى. ۆاكسينا قۇرامىندا الداعى ماۋسىمعا قارسى شتامم بار. بۇل رەسپۋبليكانىڭ جالپى تۇرعىندارىنىڭ 13 پايىزىن قامتۋعا مۇمكىندىك بەرەدى. دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىسى - 10 پايىز. جرۆي مەن تۇماۋعا قارسى ۆاكسيناتسيا 15- قىركۇيەكتە باستالادى»، - دەدى ول ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
ءبىرىنشى ۆيتسە-ءمينيستردىڭ اتاپ وتۋىنشە، وسىعان وراي ەلىمىزدىڭ باس مەملەكەتتىك سانيتار دارىگەرىنىڭ قاۋلىسى قابىلدانعان.
«مەملەكەتتىك بيۋجەت قاراجاتى ەسەبىنەن حالىقتىڭ ەڭ ءالسىز توبى ۆاكسيناتسيالاناتىندىعىن اتاپ وتكىم كەلەدى. ولار: مەديتسينا قىزمەتكەرلەرى، مەديتسينالىق ۇيىمداردا ديسپانسەرلىك ەسەپتە تۇرعان بالالار، جەتىم بالالار جانە اتا-اناسىنىڭ قامقورلىعىنسىز قالعان بالالار جانە باسقالارى. بۇعان قوسا، جۇمىس بەرۋشىلەردىڭ جانە حالىقتىڭ جەكە قاراجاتى ەسەبىنەن دە ۆاكسيناتسيا جۇرگىزىلەدى»، - دەدى مارات شورانوۆ.
ونىڭ ايتۋىنشا، رەسەيلىك ۆاكسينادان بولەك قازاقستان اۋماعىندا تاعى 3 ءوندىرۋشىنىڭ 4 ۆاكسيناسى تىركەلگەن.
اتاپ ايتقاندا، سانوفي-پاستەر (فرانسيا) وندىرگەن «ۆاكسيگريپ تەترا»، ينفليۋۆاك (نيدەرلاندى) مەن سينوۆاك بيوتەك (قىتاي) كومپانيالارى وندىرگەن ۆاكسينالاردى دا الۋعا بولادى.
