داريعا نازاربايەۆا ۇكىمەت باسشىسىنا ءبىرقاتار ساۋال جولدادى

نۇر-سۇلتان. قازاقپارات - بۇگىن پارلامەنت ءماجىلىسىنىڭ جالپى وتىرىسىندا دەپۋتات داريعا نازاربايەۆا ينۆەستيسيالىق ساياساتتى ىسكە اسىرۋ ماسەلەسى ۇكىمەت باسشىسى اسقار ماميننىڭ اتىنا ساۋال جولدادى، دەپ حابارلايدى قازاقپارات ءتىلشىسى.

«وتاندىق ەكونوميكانىڭ ءتۇيىندى سالالارىنا ينۆەستورلار تارتۋ ەلدىڭ تابىستى دامۋى ءۇشىن نەگىز بولىپ سانالادى. پاندەميا جانە ونىڭ سالدارىنان تۋىنداعان جاھاندىق ەكونوميكالىق رەتسەسسيا اياسىندا مەملەكەتتەر اراسىندا ينۆەستيسيالار تارتۋ ءۇشىن باسەكەلەستىك ارتىپ كەلەدى، ەلدىڭ ينۆەستيسيالىق كليماتى شەشۋشى ءرول اتقارادى. ينۆەستيسيالىق احۋالدى جاقسارتۋ ءۇشىن 2017 -جىلى 2018-2022 -جىلدارعا ارنالعان ۇلتتىق ينۆەستيسيالىق ستراتەگيا ازىرلەندى. تۇتاستاي العاندا، مەملەكەت ينۆەستيسيالىق احۋالدى جەتىلدىرۋ جونىندە ءبىرقاتار كەشەندى شارالار قابىلداۋدا. سونىمەن قاتار، قازاقستان رەسپۋبليكاسى سىرتقى ىستەر مينيسترلىگىنىڭ اقپاراتىنا سايكەس، 2020 -جىلى ەلىمىزدىڭ ەكونوميكاسىنا تىكەلەي شەتەلدىك ينۆەستيسيالار اعىنى 30 پايىزعا تومەندەگەن. ينۆەستيسيالىق احۋالدى جاقسارتۋ ماسەلەلەرى وزەكتى بولىپ قالا بەرەدى»، - دەدى د. نازاربايەۆا.

وسىعان بايلانىستى دەپۋتات ءتيىستى سۇراقتارعا جاۋاپ بەرۋدى سۇرادى.

«ستراتەگيانى ىسكە اسىرۋدىڭ اعىمداعى مارتەبەسى قانداي، 2018-2020 -جىلداردىڭ ناتيجەلەرى بويىنشا نەگىزگى نىسانالى ينديكاتورلارعا قول جەتكىزىلدى مە؟ ستراتەگيا جاڭا ينۆەستيسيالار تارتۋ ءۇشىن ەڭ ءتيىمدى بولىپ سانالاتىن «پەرسپەكتيۆالى سالالاردى» انىقتايدى، اتاپ ايتقاندا اكت، تۋريزم جانە قارجى. ەلدىڭ وسى سالالارداعى باسەكەلەستىك پوزيتسيالارى كۇشەيتىلدى مە، ستراتەگيانى ىسكە اسىرۋ جىلدارىندا قانداي نەگىزگى ينۆەستيسيالىق جوبالارعا باستاماشىلىق ەتىلدى؟ وسى ەسەپتى جىلدارى ەلدەگى قازىرگى ينۆەستورلاردى ۇستاپ قالۋ جانە قايتا ينۆەستيسيالاۋدى ىنتالاندىرۋ ءۇشىن قانداي ناقتى شارالار قابىلداندى؟ ستراتەگيا ءتيىمدى وپەراتسيالىق شارالاردى جۇزەگە اسىرۋدى جانە ينۆەستيسيالاردى تارتۋدىڭ جاڭا تاسىلدەرىن ەنگىزۋدى قاراستىرادى. ينۆەستيسيالىق جۇمىستا قانداي جاڭا تاسىلدەر قولدانىلادى، ولاردى تاجىريبەگە ەنگىزۋدىڭ ناتيجەسى قانداي؟»، - دەپ سۇرادى داريعا نازاربايەۆا.

«ستراتەگيا ينۆەستورلاردىڭ شاعىمدارى مەن ماسەلەلەرىن سايكەستەندىرۋ جۇيەسىن قۇرۋدى كوزدەدى. بۇل جۇيە ىسكە قوسىلدى ما؟ بۇدان باسقا، ينۆەستيسيالىق جوبالاردىڭ مونيتورينگتىك جۇيەسى ەنگىزىلدى مە، ەلدەگى ينۆەستيسيالىق احۋالدىڭ جاي-كۇيىنە جۇيەلى تۇردە تالداۋ جۇرگىزىلىپ جاتىر ما؟ ستراتەگيا شەڭبەرىندە ونى ىسكە اسىرۋ بارىسىن تالداۋعا نەگىزدەلگەن «قازاقستاننىڭ ينۆەستيسيالىق احۋالىنىڭ جاي- كۇيى تۋرالى جىل سايىنعى باياندامانى» جاريالاۋ جوسپارلانعان بولاتىن. وسى بايانداما جاريالاندى ما؟ 2020 -جىلى قانداي نەگىزگى تۇجىرىمدار جاسالدى؟»، - دەدى دەپۋتات.