سيفرلىق ۇكىمەت وفيسى قاعازباستىلىقتان قالاي قۇتقارادى

نۇر- سۇلتان. قازاقپارات – ق ر سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين سيفرلىق ۇكىمەت وفيسىندە قانداي مالىمەتتەر بازاسى ينتەگراتسيالاناتىنىن ءتۇسىندىردى.

بۇل تۋرالى ول جەلىدەگى پاراقشاسىندا جازدى، دەپ حابارلايدى قازاقپارات.

«سيفرلىق ۇكىمەت وفيسىندەگى سيتۋاتسيالىق ورتالىق بارلىق اقپاراتتىق بازانىڭ دەرەگىن وقي الادى جانە ايماقتاردىڭ بارىمەن ەتەنە جۇمىس ىستەپ، جاعدايدى نازاردا ۇستايدى. ناتيجەسىندە شىنايى اقپاراتقا جول اشىلىپ، قاعازداعى جانە excel تۇرىندەگى ەسەپتەر جويىلادى. كەيدە كۇدىكتى ەسەپتەر مەن دالەلسىز دەرەكتەردىڭ بولاتىنى جاسىرىن ەمەس. ماسەلەن، بيىل ۆاكسينالاۋ بويىنشا وسىنداي جاعداي بولدى. كەيبىر ءىرى كاسىپورىندار مەن اكىمدىكتەردىڭ ەسەبىندەگى كورسەتكىشتەردى ءبىز ءتۇرلى بازالارداعى مالىمەتتەرمەن سالىستىرىپ، ساراپتاما جاساعانىمىزدا، ساندار سايكەس كەلمەي، «باسقا اقيقاتتى» انىقتادىق. قازىر ءبىز ەلدەگى ۆاكسينالاۋ ءۇردىسىنىڭ ءوسىمى بويىنشا دەرەكتەردى كورە الامىز»، - دەپ جازدى مينيستر.

ۆەدومستۆو باسشىسى تسيفرلىق ۇكىمەت كەڭسەسىندە سيتۋاتسيالىق ورتالىقتان باسقا ۇلتتىق اناليتيكالىق ورتالىق، سيفرلىق ترانسفورماتسيا ورتالىعى جانە ۇلتتىق جوبالاۋ ءوفيسى جۇمىس ىستەيتىنىن ايتادى.

«ۇلتتىق اناليتيكالىق ورتالىق ماتەماتيكالىق ۇلگىلەۋدى قولدانىپ، بازاداعى كوررەلياتسيالاردى ىزدەستىرەدى، بولجاپ، تالداۋ جاسايدى. ال سيفرلىق ترانسفورماتسيا ورتالىعى حاوستى اۆتوماتتاندىرۋعا توسقاۋىل قويادى. مىسالى، بۇعان دەيىن جەكە تۇرعىن ءۇي قۇرىلىسىنا جەر ۋچاسكەسىن الۋ ءۇشىن 11 قادام جاساپ، 88 كۇن كۇتۋ كەرەك بولسا، جاڭا ۇدەرىس ەنگىزىلگەننەن بەرى بۇل قىزمەتتىڭ ناتيجەسىنە 3 قادام جاساپ، 8 كۇندە قول جەتكىزۋگە بولادى. ۇلتتىق جوبالاۋ ءوفيسى بارلىق ۇلتتىق جوبالاردى باقىلاپ، قاجەت بولعان جاعدايدا تۇزەتۋلەر ەنگىزىپ، KPI ورىندالماي جاتقاندىعى تۋرالى ەسكەرتۋ جىبەرەدى. مىسالى، ۇلتتىق جوباداعى 1000 مەكتەپ سالۋ باستاماسىن جوبالىق تۇرعىدا باسقاراتىن ورتاق جۇيە بولادى. سول جەرگە جاۋاپتى ماماندار مەن ورگاندار وزىنە قاتىستى دەرەكتەردى تولتىرىپ وتىرادى. ءبىز قاعازداعى ەسەپتەر مەن حاتتاردى جويعىمىز كەلەدى. ەندى جۇيە تەندەر جاريالانعاننان باستاپ، بارلىق جۇمىستار بارىسىن قاداعالاپ، تاۋەكەلدەردى الدىن- الا انىقتايدى»، - دەيدى باعدات مۋسين.

ەسكە سالساق، 6-قىركۇيەك كۇنى ق ر پرەزيدەنتى قاسىم- جومارت توقايەۆ ۇلتتىق اناليتيكالىق جانە سيفرلىق ترانسفورماتسيا ورتالىقتارىن، ۇلتتىق جوبالاۋ ءوفيسىن قامتيتىن سيفرلىق ۇكىمەت وفيسىنىڭ جۇمىسىن باستاۋعا رۇقسات بەردى.