قاسىم- جومارت توقايەۆ اۋىل شارۋاشىلىعى تەحنيكاسىن قۇراستىراتىن زاۋىتقا باردى
پرەزيدەنتكە زاۋىتتا قۇراستىرىلعان استىق جينايتىن تراكتورلار، كومبايندار مەن تۇقىم سەبەتىن تەحنيكالار كورسەتىلىپ، كاسىپورىندى ودان ءارى دامىتۋ جوسپارلارى تۋرالى باياندالدى.
مەملەكەت باسشىسى CLAAS كومپانياسىنىڭ حالىقارالىق بەدەلىن جوعارى باعالاپ، گەرمانيالىق كونسەرنمەن ۇزاقمەرزىمدى ىنتىماقتاستىق ورناتۋ قاجەت ەكەنىن اتاپ ءوتتى.
– CLAAS ونىمدەرىنىڭ قازاقستان نارىعىنا كەلۋى بۇل ۇلكەن جەتىستىك. بۇنى وتە ءىرى ينۆەستيتسيالىق وقيعا دەۋگە بولادى، - دەدى قاسىم- جومارت توقايەۆ.
سونىمەن قاتار پرەزيدەنت وسى وڭىردە ءبىرقاتار جوبالاردى جۇزەگە اسىرىپ جاتقان شەتەلدىك ينۆەستورلارمەن كەزدەستى. CLAAS كومپانياسىنىڭ ت م د ەلدەرى بويىنشا ايماقتىق ديرەكتورى نيلس رويچ مەملەكەت باسشىسىن قازاقستاندا بولاشاقتا ىسكە اسىرماق ينۆەستيتسيالىق جوبالارىمەن تانىستىردى.
تۇرىكتىڭ YDA HOLDING كومپانياسىنىڭ باسقارما ءتوراعاسى ارسلان حۋسەين پەتروپاۆلدا حالىقارالىق JCI ستاندارتتارىنا سايكەس 625 ورىندىق زاماناۋي كوپسالالى اۋرۋحانا قۇرىلىسىنىڭ باستالعانىنان حاباردار ەتتى.
اريزونا ۋنيۆەرسيتەتىنىڭ (ا ق ش) جاھاندىق ماسەلەلەر جونىندەگى ۆيسە- پرەزيدەنتى برەنت ۋايت اتالعان وقۋ ورنىنىڭ Kozybayev University-مەن ىنتىماقتاستىق ورناتۋ جونىندەگى جوسپارىن ايتتى. بۇل كەلىسىم قازاقستاندىق جوعارى وقۋ ورنىن امەريكالىق ءبىلىم بەرۋ مەكەمەسىندەگى اكادەميالىق تەحنولوگيالارمەن قامتاماسىز ەتۋگە باعىتتالماق.
قاسىم- جومارت توقايەۆ ينۆەستيتسيالىق جوبالارمەن تانىسقاننان كەيىن ينۆەستورلارعا ەل ەكونوميكاسىن، اتاپ ايتقاندا وڭىرلەردى دامىتۋعا قوسقان ۇلەستەرى ءۇشىن ريزاشىلىعىن ءبىلدىردى. مەملەكەت باسشىسى ينۆەستورلاردىڭ بيزنەس- جوبالارىنىڭ ىسكە اسىرىلۋىن باقىلاۋدا ۇستاۋ ءۇشىن جەكە مونيتورينگ جۇرگىزەتىنىن اتاپ ءوتتى.
