الەۋمەتتىك ماڭىزى بار ازىق- تۇلىك ساتۋشىلار ءۇشىن جالداۋ اقىسى تومەندەتىلەدى - اسقار مامين

نۇر- سۇلتان. قازاقپارات - «ازىق- تۇلىك كەلىسىمشارت كورپوراتسياسىنىڭ» قايتا وڭدەۋشىلەر ءۇشىن شيكىزاتتىڭ بولجامدى ءارى تۇراقتى باعاسىن قامتاماسىز ەتۋدەگى ءرولى كەڭەيتىلەدى.

بۇل تۋرالى ۇكىمەت وتىرىسىندا پرەمەر- مينيستر اسقار مامين ءمالىم ەتتى، دەپ حابارلايدى قازاقپارات ءتىلشىسى.

«ۇكىمەت ينفلياتسياعا قارسى ارەكەت ەتۋ جونىندەگى شارالار كەشەنىن ازىرلەدى. بىرىنشىدەن، ازىق- تۇلىك ينفلياتسياسىن تەجەۋ جونىندەگى جەدەل شارالار اياسىندا ەكونوميكانىڭ سەكتورلارىندا قۇن بەلگىلەۋدىڭ بۇكىل تىزبەگىندە باعانى تۇراقتاندىرۋ بويىنشا ناقتى شارالار قابىلدانادى. الەۋمەتتىك ماڭىزى بار ازىق- تۇلىكتى ساتىپ الۋ ۇيىمداستىرىلىپ، «ازىق- تۇلىك كەلىسىمشارت كورپوراتسياسىنىڭ» قايتا وڭدەۋشىلەر ءۇشىن شيكىزاتتىڭ بولجامدى ءارى تۇراقتى باعاسىن قامتاماسىز ەتۋدەگى ءرولى كەڭەيتىلەدى»، - دەدى ا. مامين.

ونىڭ ايتۋىنشا، وندىرۋشىلەرگە جەڭىلدىكپەن كرەديت پەن سۋبسيديا بەرۋ مەحانيزمدەرى كەڭەيتىلىپ، اگروونەركاسىپتىك كەشەن ونىمدەرىن ساقتاۋ ينفراقۇرىلىمىن سالۋ ءۇشىن سۋبسيديالاۋ نورمالارى ۇلعايتىلادى.

«الەۋمەتتىك ماڭىزى بار ازىق- تۇلىك ساتۋشىلار ءۇشىن جالداۋ اقىسى تومەندەتىلەدى. ەلدەگى وندىرۋشىلەردىڭ ءبىرىڭعاي ءتىزىلىمىن جاساۋ جانە باعانى مونيتورينگتەۋ جونىندەگى تالدامالىق پلاتفورمانى ىسكە قوسۋ وڭىرلەردە ينفلياتسيانىڭ كۇرت ءوسۋ فاكتىلەرىنە دەرەۋ ارەكەت ەتۋگە مۇمكىندىك بەرەدى»، - دەدى ۇكىمەت باسشىسى.