ازىق ءوندىرىسىن دامىتۋ جونىندەگى جول كارتاسى ازىرلەنەدى
«ينفلياتسياعا قارسى دەن قويۋ شارالارىنىڭ كەشەنى جوباسىندا مينيسترىك 11 جەدەل مەرزىمدى جانە 8 ورتا مەرزىمدى ءىس- شارالاردى ورىندايدى. بۇل - الەۋمەتتىك ماڭىزى بار ازىق- تۇلىك تاۋارلارىن ءوندىرۋ ءۇشىن باسىم داقىلداردىڭ ەگىس الاڭدارىن، كوكونىس ساقتاۋ قۋاتىن كوبەيتۋ ءىس- شارالارىن قابىلداۋ. شيكىزات قورىن دامىتۋ ءۇشىن «ازىق- تۇلىك كەلىسىمشارت كورپوراتسياسى» ۇ ك» ا ق نەگىزىندە تۇراقتى جۇمىس ىستەيتىن جەمدىك استىق قورىن قالىپتاستىرۋدى، سونداي- اق، جەمدىك استىق جانە ءىرى ازىقتى اكەتۋگە ۋاقىتشا ساندىق شەكتەۋلەر نەمەسە تىيىم سالۋدى كوزدەيتىن ازىق ءوندىرىسىن دامىتۋ جونىندەگى جول كارتاسى ازىرلەنەتىن بولادى»، - دەدى ول.
ءبىرىنشى ۆيتسە- ءمينيستردىڭ اتاپ وتۋىنشە، باعانى تۇراقتاندىرۋ ءۇشىن ەڭ الدىمەن، بولجام نەگىزىندە باعانىڭ ەڭ كوپ ءوسۋى كۇتىلەتىن تاۋارلاردىڭ ناقتى تۇرلەرىن ساتىپ الۋ ماقساتىندا تۇراقتاندىرۋ قورلارىنىڭ جۇمىس ءپرينتسيپىن قايتا قاراۋ قاجەت.
«ماۋسىمارالىق كەزەڭدە وڭىرلەردىڭ تۇراقتاندىرۋ قورلارىندا كارتوپ، ءسابىز، قىرىققابات جانە پياز بويىنشا قالا حالقى، قاراقۇمىق جارماسى مەن كۇنباعىس مايى بويىنشا بۇكىل حالىق قاجەتتىلىگىنىڭ 30 پايىزى كولەمىندە 5 ايلىق قور قالىپتاستىرۋ ۇسىنىلادى. رەسپۋبليكا بويىنشا كارتوپ پەن كوكونىستەردى ساتىپ الۋ كولەمى 229 مىڭ توننانى، سونداي- اق قاراقۇمىق جارماسى 17,6 مىڭ توننانى جانە كۇنباعىس مايى 28,5 مىڭ توننانى قۇرايدى»، - دەدى ايداربەك ساپاروۆ.
ونىڭ ايتۋىنشا، دايىن ءونىمدى الۋ ءۇشىن «ازىق- تۇلىك كەلىسىم شارت كورپوراتسياسى» ۇ ك» ا ق جوسپارلانعان تۇراقتاندىرۋ قورلارىنىڭ 10 پايىز مولشەرىندە كۇنباعىس پەن قاراقۇمىقتىڭ قوسىمشا كولەمىن، سونداي- اق شامامەن 4 مىڭ توننا قانت قورىن قالىپتاستىرادى.
«بۇل رەتتە، ازىق- تۇلىك كورپوراتسياسىمەن فورۆاردتىق ساتىپ الۋ اياسىندا 9150 توننا كۇنباعىس پەن 691 توننا قاراقۇمىققا كەلىسىمشارت جاسالدى. قاراقۇمىق، كۇنباعىس، قانتتىڭ قالعان كولەمى نارىقتا تىكەلەي ساتىپ الۋ جولىمەن الىنادى»، - دەدى ول.
