ۇكىمەت پرەزيدەنت جولداۋىن ىسكە اسىرۋ جالپىۇلتتىق جوسپارىن قابىلدادى
«مەملەكەت باسشىسى قاسىم-جومارت توقايەۆ ءوزىنىڭ قازاقستان حالقىنا جولداۋىندا مەملەكەتتىك جانە ەكونوميكالىق ساياساتتىڭ جاڭا مىندەتتەرىن بەلگىلەپ بەردى. جولداۋدى ىسكە اسىرۋ ءۇشىن جالپىۇلتتىق جوسپار ازىرلەندى. ول جولداۋدىڭ نەگىزگى باعىتتارى مەن مەملەكەت باسشىسىنىڭ باستامالارى بويىنشا مىندەتتەردى ساپالى ءارى جەدەل شەشۋگە باعىتتالعان»، - دەدى ۇكىمەت وتىرىسىندا پرەمەر-مينيستر اسقار مامين.
ونىڭ اتاپ وتۋىنشە، ۇكىمەت پاندەميادان كەيىنگى كەزەڭدە ەكونوميكانىڭ ورنىقتى ءارى ساپالى ءوسۋىن قامتاماسىز ەتۋ، دەنساۋلىق ساقتاۋ، ءبىلىم بەرۋ، مادەنيەت سالالارىن جەتىلدىرۋ، وڭىرلەردى كەشەندى دامىتۋ، ەڭبەك نارىعىنىڭ ءتيىمدى ەكوجۇيەسىن قۇرۋ بويىنشا بەلسەندى ءىس- شارالار قابىلدايدى.
«مەملەكەت باسشىسىنىڭ ازاماتتاردىڭ ءال-اۋقاتىن ارتتىرۋ جونىندەگى باستامالارىن ىسكە اسىرۋ ۇكىمەت جۇمىسىنىڭ ماڭىزدى باعىتى بولادى. جالاقىنى كوتەرۋ، جەكە سەكتوردىڭ ۇلەسىن ۇلعايتۋ، سالىقتىق جۇكتەمەنى ازايتۋ ارقىلى ناقتى تابىستىڭ ءوسۋىن قامتاماسىز ەتۋگە ەرەكشە نازار اۋدارىلادى. ۇسىنىلىپ وتىرعان مەملەكەت باسشىسىنىڭ جولداۋىن ىسكە اسىرۋ جونىندەگى جالپىۇلتتىق ءىس- شارالار جوسپارى العا قويىلعان مىندەتتەرگە تولىقتاي ساي. بارلىق ءبىرىنشى باسشىلارعا جوسپاردىڭ ءىس- شارالارىنىڭ ساپالى ءارى ۋاقتىلى ورىندالۋىن قامتاماسىز ەتۋ بويىنشا دەربەس جاۋاپكەرشىلىك جۇكتەلەدى»، - دەگەن ۇكىمەت باسشىسى مەملەكەت باسشىسى جارلىعىنىڭ جوباسىنا داۋىس بەرۋدى ۇسىندى. جوبانى ۇكىمەت مۇشەلەرى ءبىراۋىزدان قولداپ، قابىلداندى.
«ۇلتتىق ەكونوميكا مينيسترلىگىنە پرەمەر-مينيستر كەڭسەسىمەن بىرگە وتە قىسقا مەرزىمدە جارلىق جوباسىن پرەزيدەنت اكىمشىلىگىنە ەنگىزۋدى تاپسىرامىن»، - دەدى اسقار مامين.
اۆتور: مارلان جيەمباي
