12:25, 03 - قىركۇيەك 2021 | GMT +5
ءۇي قابىرعاسىنا اسا ءىرى ۇيالار سالعان ارالار تۇرعىنداردى ۇرەيلەندىردى - شىعىس قازاقستان
وسكەمەن. قازاقپارات - شىعىس قازاقستان وبلىسى ۇلان اۋدانىندا ءۇي قابىرعاسىنا ارالار اسا ءىرى ەكى ۇيا سالىپ تاستاعان، دەپ حابارلايدى قازاقپارات ءتىلشىسى.
ش ق و توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، 2-قىركۇيەكتە العاباس اۋىلىنىڭ تۇرعىندارى قۇتقارۋشىلارعا حابارلاسىپ، جەر ءۇيدىڭ قابىرعاسىنا بالۇيا سالعان ارالاردىڭ مازالارىن قاشىرعانىن ايتتى.
«سول جەرگە ارنايى كيىم كيگەن قۇتقارۋشىلار كەلىپ جەتتى. ولار ۇيالاردى ءتيىستى قۇرالمەن وڭدەپ، قابىرعادان الىپ تاستادى دا قاۋىپسىز جەرگە كوشىردى»، - دەپ حابارلادى ۆەدومستۆو وكىلدەرى.
ايتا كەتەيىك، وسى جاز مەزگىلىندە دەپارتامەنت قىزمەتكەرلەرى ءوڭىر جۇرتشىلىعىنا قاۋىپتى جاندىكتەردەن قۇتىلۋعا بىرنەشە رەت كومەكتەستى.
ماسەلەن، وسكەمەندە ارالار بالكونعا جانە تۇرعىن ءۇيدىڭ جانىنداعى اعاشقا ۇيا سالعان.
اۆتور: تالعاتجان مۇحامەتبەك ۇلى
