ەلدەگى وق-ءدارى قويمالارى تۇگەل تەكسەرۋدەن وتەدى

نۇر-سۇلتان. قازاقپارات - جامبىل وبلىسىنىڭ بايزاق اۋدانىنداعى جارىلىس قايتالانباۋ ءۇشىن ەلدەگى بارلىق وق-ءدارى قويمالارىن ارنايى كوميسسيا تەكسەرەدى.

بۇل تۋرالى «قازاقپارات» حالىقارالىق اقپارات اگەنتتىگىنە ق ر قورعانىس ءمينيسترىنىڭ ورىنباسارى رۋسلان شپەكبايەۆ ايتتى.

«جامبىل وبلىسى بايزاق اۋدانىندا بولعان وقيعادان كەيىن قازاقستان قارۋلى كۇشتەرىندەگى وق-دارىلەردىڭ بارلىق قويمالارىن قورعانىس مينيسترلىگى باس ينسپەكتسياسىنىڭ باستىعى گەنەرال-لەيتەنانت ءامىر حالىقوۆ باسشىلىق ەتەتىن كوميسسيا تەكسەرەدى»، - دەدى ءمينيستردىڭ ورىنباسارى.

سونداي-اق، قولدانىستاعى اسكەري قويمالار مەن وق-ءدارى بازالارىنىڭ قاۋىپسىزدىگىن كۇشەيتۋ ءۇشىن قوسىمشا شارالار قابىلداناتىنىن اتادى.

«وق-دارىلەردى ساقتاۋ وبەكتىلەرىن جارىلىس تولقىنىنىڭ اسەرىنەن تەجەۋ ءۇشىن قورعانىس ۇيىندىلەرىمەن، ياعني، توبەلەرمەن جوسپارلى جابدىقتاۋ جۇرگىزىلەدى. جىلدا كۇن كۇركىرەپ، نايزاعاي وينايتىن كەزەڭنىڭ باسىندا گارنيزونداردىڭ اۋداندىق پايدالانۋ بولىمدەرىنىڭ ماماندارى نايزاعايدان قورعاۋ قۇرىلعىلارىن تەكسەرەدى. قۇرىلعىلار اقاۋى انىقتالعان جاعدايدا ۋاقتىلى جوندەلەدى. وق-دارىلەرى بار وبەكتىلەر مۇقيات كۇزەتىلەدى. قورشاۋ بويىنداعى اۋماقتىڭ كۇزەتىلەتىن اۋماعى تەحنيكالىق كۇزەت قۇرالدارىمەن جابدىقتالادى. سىرتقى قورشاۋدىڭ اۋماعى جانە اينالاسى وسىمدىكتەردەن تازارتىلادى»، - دەيدى رۋسلان شپەكبايەۆ.

ونىڭ ايتۋىنشا، بايزاق اۋدانىنداعى جارىلىس كەزىندە وق-ءدارى قالدىقتارى اسكەري ءبولىمنىڭ سولتۇستىگىنە قاراي 200 مەترگە، وڭتۇستىك باعىتتا 400 مەترگە ۇشقان.

«باتىس جانە شىعىس باعىتتارعا قاراي ۇشقان بولشەكتەر تابىلعان جوق. قازىر جارىلىس سالدارىن جويۋ ءۇشىن 200 دەن استام اسكەري قىزمەتشى، ونىڭ ىشىندە 80 نەن استام ساپەر جۇمىس ىستەپ جاتىر»، - دەدى ءمينيستردىڭ ورىنباسارى.