بالالار سپورتىن دامىتۋعا ەرەكشە نازار اۋدارۋ كەرەك - قامبار وماروۆ

نۇر- سۇلتان. قازاقپارات - بالالار سپورتىن دامىتۋعا ەرەكشە نازار اۋدارۋ كەرەك.

بۇل تۋرالى «قازاقپارات» ديرەكتورلار كەڭەسىنىڭ مۇشەسى، م س م جوبالىق كەڭسەسىنىڭ احۋالدىق- تالداۋ ورتالىعىنىڭ جەتەكشىسى، «قازاقستان سپورتىن ترانسفورماتسيالاۋ» جوبالىق كەڭسەسىنىڭ جەتەكشىسى قامبار وماروۆ ءمالىم ەتتى، دەپ حابارلايدى قازاقپارات ءتىلشىسى.

ايتا كەتەيىك، جاقىندا ەلىمىزدە «قازاقستان سپورتىن ترانسفورماتسيالاۋ» جوبالىق كەڭسەسى قۇرىلدى. «مادەنيەت جانە سپورت مينيسترىلىگى جانىنان «قازاقستان سپورتىن ترانسفورماتسيالاۋ» جوبالىق كەڭسەسى قۇرىلدى. ونىڭ قىزمەتى سپورتتى دامىتۋدىڭ جۇيەلىك قادامدارى مەن ستراتەگيالىق باعىتتارىن دايارلاۋعا نەگىزدەلەدى. نەگىزگى ماقساتىمىز - سپورتپەن اينالىساتىن دەنساۋلىعى مىقتى ۇلتتى قالىپتاستىرۋ. ەلدە سپورتپەن حالىقتىڭ تەك 30 پايىزى شۇعىلدانادى، ال كەڭەستىك كەزەڭدە بۇل كورسەتكىش 70-80 پايىزعا جەتكەن ەدى»، - دەپ توقتالدى قامبار وماروۆ ورتالىق كوممۋنيكاتسيالار قىزمەتىندە.

وسى ورايدا ول بالالار سپورتىن دامىتۋدىڭ ماڭىزدىلىعىن اتاپ ءوتتى.

«بالالار مەن جاسوسپىرىمدەر گادجەتتەرگە جاپپاي داعدىلانىپ العان. وتكەن جىلداعى جولداۋدا مەملەكەت باسشىسى بۇل ماسەلەگە ەرەكشە ەكپىن قويىپ، وسكەلەڭ ۇرپاقتى سپورت ۇيىرمەلەرىنە تارتۋعا قاتىستى تاپسىرما بەردى. بيىلعى جولداۋدا دا پرەزيدەنت جۇرتتىڭ جانە بالالاردىڭ سپورتپەن شۇعىلدانۋىنا جاعداي جاسالۋى قاجەت ەكەنىن قاداپ ايتتى. بۇقارالىق سپورت جوعارى جەتىستىك سپورتى ءۇشىن بازا بولاتىنى انىق. بۇل رەتتە بولاشاق وليمپيادا چەمپيونى كادرلارى وسى دەڭگەيدەن شىڭدالادى»، - دەدى جوبالىق كەڭسەسىنىڭ جەتەكشىسى.