ايەلدەر ۇكىمەتتە لاۋازىمدى قىزمەتتەر اتقارا المايدى - تاليبان

نۇر-سۇلتان. قازاقپارات - «تاليبان» قوزعالىسىنىڭ وكىلى (جوعارعى سوتتىڭ شەشىمى بويىنشا قازاقستاندا بۇل قوزعالىسقا تىيىم سالىنعان) ايەلدەردىڭ مينيسترلىك جانە ودان جوعارى لاۋازىمداردى اتقارا المايتىنىن ايتتى.

بۇل تۋرالى Tengrinews.kz ءتىلشىسى Inews باسىلىمىنا سىلتەمە جاساپ حابارلايدى.

دوحاداعى «تاليبان» ساياسي كەڭسەسى باسشىسىنىڭ ورىنباسارى شير موحامماد ابباس ستانيكزاي بۇل جاعدايعا قاراماستان، اۋعانستانداعى ايەلدەر ۇكىمەتتە كىشى لاۋازىمداردى اتقارا بەرەتىنىن ايتتى.

«مەملەكەتتىك مينيسترلىكتەردىڭ ءاربىر دەپارتامەنتىندە جۇمىسشىلاردىڭ جارتىسىنا جۋىعى ايەلدەر. ولار ءوز جۇمىسىنا ورالۋى مۇمكىن. ءبىراق جاڭا ۇكىمەتتە جوعارى لاۋازىمعا ايەلدەر وتىرا المايدى»، - دەدى تالىپتەردىڭ جوعارى لاۋازىمدى قىزمەتكەرى.

سونىمەن قاتار، وسىعان دەيىن ا ق ش- پەن جۇمىس ىستەگەن ايەلدەر مەملەكەتتىك لاۋازىمداردى مۇلدەم اتقارا المايتىنىن ەسكەرتتى.

ءسوز سوڭىندا شير موحامماد ابباس ستانيكزاي الداعى كۇندەرى جاڭا ۇكىمەتتىڭ قۇرامى جاريالاناتىنىن ايتتى. وسى كەزەڭدە كابۋل اۋەجايى جۇمىسىن قايتا باستاۋى كەرەك.

بۇعان دەيىن تالەپتەر اۋعانستاندا جۇمىس ىستەيتىن ايەلدەرگە ەلدە قاۋىپسىزدىك تولىق قامتاماسىز ەتىلگەنگە دەيىن ۇيدە بولۋعا جانە جۇمىسقا بارماۋعا بۇيرىق بەرگەن بولاتىن. قوزعالىس وكىلىنىڭ ايتۋىنشا، قاۋىپسىزدىك كۇشتەرى ايەلدەرمەن قالاي سويلەسۋدى بىلمەيدى.

جاقىندا ب ا ق «تاليبان» قۇرعان اۋعانستان ۇكىمەتىندە جاڭا تاعايىنداۋلار بولىپ جاتقانى تۋرالى حابارلادى. قازىرگى ۋاقىتتا ءۇش نەگىزگى ءمينيستردىڭ ەسىمدەرى بەلگىلى.

سونداي-اق، قوزعالىس وكىلدەرى اۋعانستانداعى بيلىكتى باسىپ العاننان كەيىن العاش رەت وزدەرىنىڭ كوشباسشىسى حايباتۋللا احۋندزادانىڭ سۋرەتىن جاريالادى.