اۋدان اكىمدەرىن سايلاۋدىڭ پيلوتتىق جوباسى ەنگىزىلەدى
«ءبىزدىڭ ماقساتىمىز - مەملەكەتتىڭ تيىمدىلىگىن، ساياسي ۇدەرىستىڭ اشىقتىعى مەن باسەكەلەستىگىن ودان ءارى ارتتىرۋ. سوندىقتان، ساياسي رەفورمالار جالعاسادى. مەملەكەتتىلىگىمىزدى ودان ءارى نىعايتۋ ءۇشىن بارلىق وزگەرىستى ەلىمىزدىڭ وزىنە ءتان ەرەكشەلىگىن ەسكەرە وتىرىپ، بىرتىندەپ جۇزەگە اسىرامىز. بۇل - مىقتى، ءادىل ءارى وزىق مەملەكەت قۇرۋدىڭ بىردەن- ءبىر دۇرىس جولى. ازاماتتارىمىز بۇل ۇستانىمدى قولداپ وتىر»، - دەدى قاسىم- جومارت توقايەۆ.
پرەزيدەنتتىڭ سوزىنە قاراعاندا، بۇعان دەيىنگى اۋىل اكىمدەرىن تىكەلەي سايلاۋ تاجىريبەسى ءوز تيىمدىلىگىن كورسەتكەن.
«بۇل بىلتىرعى مەنىڭ جولداۋىمدا ۇسىنعان ساياسي رەفورمانىڭ قاعيداتتى تۇسى. بۇل شەشىم اۋىل تۇرعىندارىنىڭ، ياعني قازاقستاندىقتاردىڭ %40- دان استامىنىڭ مۇددەلەرىن تىكەلەي قوزعايدى. ءبىز دۇرىس جولدامىز. 2024 -جىلى ازاماتتار اۋدان اكىمدەرىن ەڭ بولماعاندا پيلوتتىق رەجيمدە سايلاۋعا مۇمكىندىك الادى»، - دەدى مەملەكەت باسشىسى.
سونداي- اق، ول ۇلتتىق قوردىڭ اكتيۆتەرىن قالپىنا كەلتىرۋ ءۇشىن بيۋدجەتتىك ەرەجەگە كوشۋدى جەدەلدەتۋدى تاپسىردى.
«سوڭعى كەزدە مەملەكەتتىك شىعىس مىندەتتەمەلەرىن جابۋ ءۇشىن بيۋدجەت تاپشىلىعى مەن ۇلتتىق قوردان الىناتىن ترانسفەرتتىڭ ارتۋ تەندەنتسياسى بايقالۋدا. ۇنەمى مۇنداي جەڭىل جولمەن ءجۇرۋ مۇمكىن ەمەس. قارجىلىق تۇراقتىلىق قورى شەكسىز ەمەس. بيۋدجەتتىڭ كىرىسىن ارتتىرۋ بويىنشا شارالار قاجەت ەكەنى انىق. ءبىراق ءبىرىنشى كەزەكتە مەملەكەتتىك شىعىنداردىڭ كولەمى مەن تيىمدىلىگىنە باقىلاۋ كەرەك. ۇلتتىق قور اكتيۆتەرىن قالپىنا كەلتىرۋ ءۇشىن بيۋدجەتتىك ەرەجەنى ەنگىزۋدى جەدەلدەتۋ كەرەك. ءتيىستى زاڭنامالىق تۇزەتۋلەر جىلدىڭ سوڭىنا دەيىن قابىلدانۋى قاجەت»، - دەدى پرەزيدەنت.
اۆتور: ەسىمجان ناقتىباي
