قازاقستاندا جاڭا وقۋ جىلى باستالدى
10-شىلدەدە وتكەن ۇكىمەتتىڭ كەڭەيتىلگەن وتىرىسىندا پرەزيدەنت قاسىم- جومارت توقايەۆ جاڭا وقۋ جىلىندا وقۋشىلار مەن ستۋدەنتتەردىڭ ءداستۇرلى وقۋ جۇيەسىنە ورالۋىن قامتاماسىز ەتۋدى تاپسىرعان بولاتىن. سول تاپسىرمانىڭ ۇدەسىنەن شىعۋ ءۇشىن ق ر ءبىلىم جانە عىلىم مينيسترلىگى ءبىلىم بەرۋ مەكەمەلەرىن ءداستۇرلى فورماتقا كوشىرۋ دايىندىعىن ۇدەتتى. وسىلايشا بۇگىن جاڭا وقۋ جىلى قاتاڭ سانيتارلىق- ەپيدەميولوگيالىق تالاپتاردى ساقتاي وتىرىپ شتاتتىق فورماتتا باستالادى.
مەكتەپكە دەيىنگى ۇيىمدار دا تۇگەلدەي شتاتتىق جۇمىس رەجيمىنە ورالدى. وسى وقۋ جىلىندا 7 مىڭنان استام مەكتەپ شامامەن 3,6 ميلليون وقۋشىنى، ونىڭ ىشىندە 380 مىڭعا جۋىق وقۋشىنى ءبىرىنشى سىنىپقا قابىلداماقشى.
كىمدەر قاشىقتان وقيدى؟
ۇلتتىق ءبىلىم بەرۋ دەرەكتەرى بويىنشا، مەكتەپتەردىڭ 95 پايىزىنىڭ جوبالىق قۋاتى مەن وقۋشىلار سانى بارلىق تالاپتاردى ساقتاي وتىرىپ، وقىتۋدى تولىق شتاتتىق فورماتتا باستاۋعا مۇمكىندىك بەرەدى. وقۋشىلاردىڭ 81 پايىزى وسىنداي مەكتەپتەردە ءبىلىم الادى. ەلىمىزدە 3 اۋىسىممەن ءبىلىم بەرەتىن 300 دەن استام مەكتەپ بار. بۇل ەلدەگى مەكتەپتەردىڭ 5 پايىزى دەگەن ءسوز. بالا سانىنا شاقساق، وقۋشىلاردىڭ 19 پايىزى ءۇش اۋىسىممەن وقيدى دەگەن ءسوز.
بيىل وسىنداي مەكتەپتەردە وقۋ پروتسەسىن ۇيىمداستىرۋعا باسا كوڭىل بولىنبەك. اتاپ ايتساق، شتاتتىق وقىتۋ فورماتى يكەمدى كەستە بويىنشا جۇرگىزىلەدى. ياعني، كەيبىر پاندەر قاشىقتان وقىتىلۋى مۇمكىن. ق ر باس سانيتار دارىگەرىنىڭ قاۋلىسى بويىنشا، كوروناۆيرۋس جۇقتىرعان اداممەن بايلانىستا بولعان وقۋشىلار ءۇشىن ساباق قاشىقتان، ءبىراق سينحروندى تاسىلمەن ۇيىمداستىرىلادى. سوزىلمالى سىرقاتتارى بار بالالارعا مەديتسينالىق انىقتاما نەگىزىندە اسينحروندى قاشىقتان وقىتۋ فورماتى ۇسىنىلماق. مۇنداي وقۋشىلارعا دا وقۋلىقتار تولىق بەرىلەدى.
اقپاراتتىق كونتەنتپەن، ەلەكتروندىق جۋرنالدارمەن دە تولىق قامتاماسىز ەتىلەدى. ءبىراق قورىتىندى باقىلاۋ جۇمىستارىن مەكتەپكە بارىپ تاپسىرادى. ق ر ءبىلىم جانە عىلىم ۆيتسە- ءمينيسترى شولپان كارينوۆانىڭ ايتۋىنا قاراعاندا، پەداگوگتەردىڭ 99 پايىزدان استامى ۆاكسينا العان. ج و و ستۋدەنتتەن پ ت ر- تەست انىقتاماسىن سۇراي المايدى. جوعارى وقۋ ورىندارىندا ءبىلىم الاتىن ستۋدەنتتەر دە ءداسۇرلى فورماتتا وقۋدى باستادى. ۋنيۆەرسيتەتتەرگە وقۋدى ارالاس فورماتتا دا وتكىزۋگە مۇمكىندىك بەرىلىپ وتىر. ياعني، دارىستەردى ونلاين فورماتتا، سەمينارلار مەن پراكتيكالىق جۇمىستاردى، زەرتحانالىق ساباقتاردى وففلاين فورماتتا وتكىزۋگە بولادى. ال ەرەكشە مۇقتاجدىعى بار ستۋدەنتتەر مەن تاۋەكەل توبىنداعى توپتارعا قاشىقتان ءبىلىم الۋعا رۇقسات بەرىلدى.
ءبىلىم جانە عىلىم ءمينيسترىنىڭ ورىنباسارى قۋانىش ەرعاليەۆتىڭ ايتۋىنشا، جوعارى وقۋ ورىندارىنا وقۋ جىلىن سارالانعان تارتىپتە باستاۋعا مۇمكىندىك ۇسىنىلىپ وتىر. ياعني، 3-4 كۋرس ستۋدەنتتەرى 1-قىركۇيەكتە باستاسا، 1-2-كۋرس پەن ماگيستراتۋرا ستۋدەنتتەرى قىركۇيەك ايىنىڭ سوڭىنا دەيىن باستاسا بولادى. تەك سول ءتارتىپتىڭ ءبارى ۋنيۆەرسيتەتتىڭ اكادەميالىق كۇنتىزبەسىندە كورىنىس تابۋى كەرەك. وقۋ ورىندارىنىڭ اۋماعىندا، كىتاپحانالاردا، جاتاقحانالاردا مىندەتتى تۇردە Ashyq جۇيەسى قولدانىلۋى كەرەك. ناقتىراق ايتساق، عيماراتقا تەك «جاسىل» نەمەسە «كوك» مارتەبەلى ستۋدەنتتەر كىرگىزىلەدى.
ۆيتسە- مينيستر قۋانىش ەرعاليەۆتىڭ سوزىنە سۇيەنسەك، ستۋدەنتتەردەن ولاردى عيماراتقا جىبەرۋ ءۇشىن پ ت ر- تەست انىقتاماسىن تالاپ ەتۋگە بولمايدى. كەيبىر وقۋ ورىندارى ستۋدەنتتەردى ۆاكسينا الۋعا ىنتالاندىرۋ ءۇشىن وقۋ اقىسى مەن جاتاقحانادا تۇرۋ اقىسى بويىنشا جەڭىلدىكتەر ۇسىنا باستاعان. ال ج و و قىزمەتكەرلەرىن ۆاكسيناتسياعا ىنتالاندىرۋ ءۇشىن سىياقى تاعايىنداۋ شارالارى قابىلدانۋدا. جوعارى وقۋ ورىندارىندا بۇقارالىق ءىس- شارالار وتكىزۋگە تىيىم سالىنىپ وتىر.
بيىلعى وقۋ جىلىنىڭ تاعى ءبىر ەكەرشەلىگى - «ءبىر اۋديتوريا - ءبىر توپ» قاعيداسى قاتاڭ ساقتالۋى كەرەك. اۋرۋ بەلگىلەرى بولعان ستۋدەنتتەرگە قاشىقتان وقۋ مۇمكىندىگى بەرىلەدى. سونداي- اق، بيىل اكادەميالىق ۇتقىرلىق باعدارلامالار بويىنشا ءبىلىم الۋ جانە شەتەلدىك تاعلىمدامالاردان ءوتۋ شارالارىن قايتا باستاۋ جوسپارلانعان.
