كابۋل اۋەجايى «تاليبانعا» ءوتتى
20 جىلداي اۋعان جەرىندە سوعىسقان ا ق ش وسى ۋاقىت ىشىندە 2 مىڭنان استام جاۋىنگەرىنەن ايىرىلىپ، مىڭداعان ادام جاراقات الدى. امەريكالىقتار كەتكەن بەتتە كابۋل اۋەجايىنا تالىپتەر باقىلاۋ ورناتتى. بۇل اۋعانستاننان اتتانعان ا ق ش اسكەرىنىڭ سوڭعى ساربازىنىڭ سۋرەتى.
كابۋل اۋەجايىندا ازاماتتاردى كوشىرۋگە جاۋاپتى بولعان گەنەرال- مايور كريس دوناحيۋ ۇشاققا كوتەرىلگەن كەزدە ينفراقىزىل جارىق جاندى. وسىلايشا ا ق ش يسلام رەسپۋبليكاسىنداعى 20 جىلعا جۋىق اسكەري وپەراتسياسىن اياقتادى.
كەننەت ماككەنزي، ا ق ش ورتالىق قولباسشىلىعىنىڭ باسشىسى:
- بۇگىن ا ق ش- تىڭ C-17 ۇشاعى حاميد كارزاي اۋەجايىنان ۇشىپ كەتتى، اۋعان جەرىنەن ءبىرجولا كەتتى. وسىلايشا اۋعانستاننان امەريكالىقتار مەن اۋعاندىقتاردى ەۆاكۋاتسياۋ جۇمىستارى اياقتالدى. سونىمەن قاتار ا ق ش ميسسياسىنىڭ اياقتالعانىن دا ايتقىم كەلەدى.
كابۋلداعى حاميد كارزاي اتىنداعى اۋەجاي شەتەلدىك كۇشتەر باقىلاۋدا ۇستاعان سوڭعى نىسان بولاتىن. ەندى ول «تاليباننىڭ» ەنشىسىنە ءتيدى. تالىپتەر اسپانعا وق اتىپ، اۋعانستاننىڭ تولىق تاۋەلسىزدىككە قول جەتكىزگەنىن ايتىپ، جار سالدى. ا ق ش اسكەرىنىڭ كەتكەنىنە جەرگىلىكتى تۇرعىندار دا ءماز. ولار كوشەدە كولىكپەن ءجۇرىپ، دىبىس بەردى. ا ق ش- تان بۇرىن فرانسيا، ۇلى بريتانيا، گەرمانيا مەن اۆستراليا ءوز ازاماتتارىن كوشىرىپ العان بولاتىن.
دىنمۇحاممەد امەتبەك، حالىقارالىق تۇركى اكادەمياسىنىڭ ساراپشىسى:
- مەنىڭ ويىمشا، بۇل ا ق ش- تىڭ جەڭىلىسى ەمەس، ويتكەنى ۇلكەن يمپەريالار ۇزاق مەرزىمدى ستراتەگيالارمەن جۇرەدى. ويتكەنى ا ق ش نەگىزگى كۇشىن اۋعانىستاننان شىعارىپ، ازيا تىنىق مۇحيتى اۋماعىنا كوشىرگىسى كەلەدى دەگەن پىكىر بار. تۇسىنەسىزدەر مە، ۇلكەن ساياسات شاحمات ويىنى سياقتى. ا ق ش- تىڭ اسكەريلەرىن قايتارىپ الۋى شاحماتتاعى ءجۇرىس جاساۋ سياقتى.
بىرىككەن ۇلتتار ۇيىمى اۋعانستانداعى گۋمانيتارلىق داعدارىس ۋشىعاتىنىن ەسكەرتتى. بيىلعى جىلدىڭ سوڭىنا دەيىن اۋعان ەلىنەن جارتى ميلليونعا دەيىن ادام كەتۋى مۇمكىن. سوندىقتان ۇيىم كورشىلەس ەلدەردى پانا ىزدەگەن ادامدار ءۇشىن شەكارانى اشىق ۇستاۋعا شاقىردى.
ەرنات مەلس ۇلى
www.24.kz
