ءسۇتتى قوسسا ءدارى ۋعا اينالادى دەگەن اقپارات راس پا؟

نۇر-سۇلتان. قازاقپارات - «اناسى جوتەلگە قارسى ءشارباتتى سۇتكە قوسىپ بەرىپ، بالالارىن ابايسىزدا ءولتىرىپ الىپتى».

2019 -جىلدان بەرى الەمنىڭ ءتۇرلى تىلىندە تاراپ جۇرگەن فەيك اقپارات قازاق ءتىلدى وقىرماندى كەيىنگى ۋاقىتتا قايتا مازالاي باستادى. وسىعان وراي، قازاقپارات كاسىبي ماماننىڭ دارىدەن ۋلانباۋدىڭ جولدارى تۋرالى اقىل-كەڭەسىن ۇسىنىپ وتىر.

ەسكەرتۋ: اناسى ءوزىنىڭ 4 بالاسىن كەزدەيسوق ءولتىرىپ العان. بالالارى جوتەلگە قارسى سيروپ ىشۋدەن باس تارتقاندىقتان اناسى سيروپتى سۇتكە ارالاستىرىپ بەرگەن. بالا سول ءسۇتتى ءىشىپ ۇيىقتاپ، قايتا ويانباعان. 4 بالاسى ءولى كۇيدە تابىلعان. كلينيكالىق تەكسەرۋ ناتيجەسىندە سيروپ پەن ءسۇت ارالاسقاننان كەيىن ۋلى سۇيىقتىققا اينالعان. اناسى ءوز بالالارىن ءوزى ولتىرگەنىن ايتقان. پسيحيكاسىندا اقاۋلار پايدا بولعان. ءدارى دارمەكتى سۇتپەن بىرگە قابىلداۋدان اۋلاق بولىڭىزدار. حيميكالىق قوسپالاردى سۇتكە ارالاستىرماڭىزدار. ۋلى زاتقا اينالادى. ءوتىنىش بايقاڭىزدار! باسقا دا تانىستارىڭىزعا حابارلاڭىزدار!!!

جۋىقتا عانا وسى اقپاراتتى stopfake.kz سايتى جوققا شىعارىپ، فەيك ەكەنىن مالىمدەپ جازعان بولاتىن. دەگەنمەن، «وقيعانىڭ» بولعان ۋاقىتى، ورنى كورسەتىلمەگەن كوپە- كورىنەۋ جالعان اقپاراتتىڭ ءتۇرلى مەسسەندجەر چاتتارىنا قارقىندى تاراۋى ءدارىنى پايدالانۋ ءتارتىبى بويىنشا سەنىمدى اقپارتتار ەلدىڭ ساناسىنا دىتتەپ جەتپەي جاتقانىن كورسەتىپ وتىر. وسىعان بايلانىستى مەديتسينا عىلىمدارىنىڭ دوكتورى، پروفەسسور، دارىلىك زاتتار مەن مەديتسينالىق بۇيىمداردى ساراپتاۋ ۇلتتىق ورتالىعىنىڭ ساراپشىسى الەكساندر گۋليايەۆتەن وسى ماسەلە بويىنشا كاسىبي تۇسىنىكتەمە سۇراعان ەدىك.

جالپى ءسۇتتىڭ ءدارىنى ۋعا اينالدىراتىن قاسيەتى بار ما؟

جوتەلگە قارسى ءشارباتتىڭ فەيك اقپاراتتا ايتىلعانداي قاۋىپ ءتوندىرۋى مۇمكىن ەمەس. ارينە، ءبىرقاتار تاماق ونىمدەرى، سونىڭ ىشىندە ءسۇت، كەيبىر ءدارى- دارمەكتەرمەن ارەكەتتەسىپ، ولاردىڭ ءسىڭۋىن تەزدەتەدى نەمەسە باياۋلاتادى. ىشكە قابىلداناتىن ءدارى-دارمەكتەردى ءىشۋدىڭ ەرەجەسى بار. تاماق تانۋدان جارتى ساعات بۇرىن نەمەسە 2 ساعاتتان كەيىن قابىلدانۋى كەرەك. سوندا عانا ول تاماقپەن ءوزارا ارەكەتتەسپەيدى. ءدارى-دارمەكتى گازدالماعان سۋمەن ءىشۋ كەرەك. بۇل ەرەجەنى بۇزعاننان ۋلانىپ قالمايسىز. ءبىراق كەيبىر پرەپاراتتاردىڭ اعزاعا تيگىزۋى ءتيىس اسەرى باياۋلاپ نەمەسە جىلدامداۋى مۇمكىن. ءدارىنى ىشپەي تۇرىپ اۋەلى ونىڭ نۇسقاۋلىعىمەن جانە قارسى كورسەتىلىمدەرىمەن مۇقيات تانىسۋ كەرەك. ەگەر نۇسقاۋلاردى ەلەمەسەڭىز جانە دارىگەر تاعايىنداعان رەجيمدى، دوزالاردى ساقتاماساڭىز، دارىدەن ۋلانۋ ابدەن مۇمكىن.

«كەز كەلگەن ءدارى- دارمەكتىڭ ۋ بولۋى دا، ەم بولۋى دا دوزاسىنا بايلانىستى». گيپپوكراتتان قالعان دەپ ايتىلاتىن، ەسكى لاتىن ماقالىندا وسىلاي دەلىنگەن.

ءدارىنى كەستە بويىنشا ىشپەسە نە بولادى؟

ءدارى-دارمەك بىتكەننىڭ بەلگىلى ءبىر قاسيەتى بار. مىسالى، سىڭىمدىلىگى جانە اسەر ەتۋ ۋاقىتى ءار ءتۇرلى. دارىگەر سول قاسيەتتەردى ەسكەرە وتىرىپ، ءتيىمدى ەمدەۋ ءۇشىن بەلگىلەنگەن ءدارىنى قابىلداۋدىڭ وڭتايلى كەستەسىن تاڭدايدى. سوندىقتان ماماننىڭ ۇسىنىستارىن قاتاڭ ساقتاۋ كەرەك. بۇل جاعدايدا بىلەرمەندىككە سالىنىپ، ءوزىن-ءوزى ەمدەۋدەن اۋلاق بولۋ وتە ماڭىزدى. جىل باسىنان بەرى ەلىمىزدە ساپاسىز نەمەسە مەرزىمى وتكەن دارىدەن ۋانۋدىڭ نەشە جاعدايى تىركەلدى؟

پرەپاراتتى نۇسقاۋلارعا سايكەس قولدانباعاندىقتان دارىلەرمەن ۋلانۋ، ساپاسىز جانە مەرزىمى وتكەن دارىلەرمەن ۋلانۋ جاعدايلارى ۇلتتىق ورتالىقتا جىل باسىنان بەرى تىركەلگەن جوق. دارىلىك زاتتار مەن مەديتسينالىق بۇيىمداردى ساراپتاۋ ۇلتتىق ورتالىعى ق ر دەنساۋلىق ساقتاۋ مينيسترلىگى مەديتسينالىق جانە فارماتسەۆتيكالىق باقىلاۋ كوميتەتىمەن بىرلەسىپ، ءدارى-دارمەكتەرگە تۇراقتى فارماكولوگيالىق قاداعالاۋ جانە ولاردى قولدانۋ كەزەڭىندە مەديتسينالىق بۇيىمدارعا مونيتورينگ جۇرگىزەدى. ورتالىق جاعىمسىز رەاكسيالارعا ارنالعان كارتا- حابارلامالاردى تىركەيدى. ءاربىر ناقتى جاعداي بويىنشا دارىلەردىڭ كۇدىكتى جاناما اسەرلەرىنە تالداۋ جۇرگىزەدى. جاعىمسىز رەاكسيانىڭ دامۋى مەن پرەپاراتتى قابىلداۋ اراسىنداعى سەبەپ- سالدارلىق بايلانىستى زەردەلەيدى جانە ساراپتامالىق قورىتىندى بەرەدى. مەديتسينالىق جانە فارماتسيەۆتيكالىق قىزمەتتى باقىلاۋ كوميتەتى ۇلتتىق ورتالىقتىڭ قورىتىندىلارى نەگىزىندە قاجەت بولعان جاعدايدا دارىلىك پرەپاراتتىڭ قولدانىلۋىن شەكتەپ، ماركەتينگتى توقتاتادى، مەديتسينالىق قولدانۋ جونىندەگى نۇسقاۋلىققا وزگەرىستەر ەنگىزەدى. اينالىمعا شىعىپ كەتكەن پرەپارات بولسا، كەرى قايتارىپ، پرەپاراتتى ەلدە وندىرۋگە، تاراتۋعا جانە قولدانۋعا تىيىم سالادى.

ءدارى-دارمەك قولدانۋدان زارداپ شەككەن ادام كىمگە جۇگىنۋى كەرەك؟

دارىلىك پرەپاراتتارعا جاعىمسىز رەاكسيالار بايقالسا نەمەسە ولاردىڭ ەمدىك اسەرى بولماعان جاعدايدا ەمحاناعا بارىپ، مەديتسينا قىزمەتكەرىمەن بىرگە حابارلاما- كارتا جاساۋ كەرەك. بۇل رەتتە حابارلامادا ءاربىر ناقتى جاعدايعا بارىنشا تالداۋ جۇرگىزۋ ءۇشىن قاجەتتى دەرەكتەردى: پاتسەنت تۋرالى اقپاراتتى، قولايسىز وقيعانى، كۇدىكتى پرەپاراتتى، ءوزىن-ءوزى ەمدەۋدى قوسا العاندا، باسقا دا دارىلىك زاتتار تۋرالى اقپاراتتى سيپاتتاۋ وتە ماڭىزدى.

اۆتور: ەسىمجان ناقتىباي