جازۋشى نەسىپبەك ءداۋتاي ۇلى ومىردەن ءوتتى
قارالى حاباردى جازۋشىنىڭ شاكىرتتەرى مەن جاناشىر ىنىلەرى Facebook ارقىلى ءمالىم ەتتى.
«قوش بول، كلاسسيك! ءبىز ءسىزدى ۇمىتپايمىز»، - دەپ جازدى بەلگىلى ادەبيەت سىنشىسى امانگەلدى كەڭشىلىك ۇلى.
نەسىپبەك ءداۋتاي ۇلى 1947 -جىلى 30 -جامبىل وبلىسى قورداي اۋدانى كيروۆ اتىنداعى كولحوزدا (قازىرگى كەنەن اۋىلى) ومىرگە كەلگەن. قازاق مەملەكەتتىك ۋنيۆەرسيتەتىنىڭ تۇلەگى. ەڭبەك جولىن 1972-1980 -جىلدارى اۋداندىق «قورداي» گازەتىندە ءتىلشى، ءبولىم مەڭگەرۋشىسى، جاۋاپتى حاتشى رەتىندە باستادى. كەيىن جامبىل وبلىستىق گازەتىندە مەنشىكتى ءتىلشى بولعان.
سوڭعى جىلدارى «جامبىل» ادەبي- كوپشىلىك جۋرنالىنىڭ باس رەداكتورى، قازاقستان جازۋشىلار وداعى جامبىل وبلىستىق فيليالىنىڭ ديرەكتورى بولىپ جۇمىس ىستەدى.
ع. ءمۇستافيننىڭ 100 جىلدىعىنا ارنالعان ادەبي بايگەنىڭ، حالىقارالىق «دارابوز» ادەبي بايگەسىنىڭ جەڭىمپازى. ق ر تاۋەلسىزدىگى جانە استانانىڭ 10 -جىلدىعىنا ارنالعان مەدالدارمەن ماراپاتتالعان. ق ر ۇلتتىق كىتاپحاناسى وتكىزگەن «ەڭ ۇزدىك رومان» بايقاۋىندا «قۇدىرەت پەن قاسىرەت» رومانى جۇلدەگە يە بولعان. حالىقارالىق «الاش» ادەبي سىيلىعىنىڭ، «قازاق ادەبيەتى» گازەتىنىڭ پروزا جانرى بويىنشا لاۋرەاتى.
جازۋشىنىڭ ارتىندا وقىرمانعا مۇرا بولىپ «اق كوگەرشىن»، «الما اعاشىنىڭ بۇتاعى»، «ءانىم سەن ەدىڭ» اتتى پوۆەستەرى، «قۇدىرەت پەن قاسىرەت» رومانى، «كوگىلدىر كويلەكتى كەلىنشەك»، «ويىندى ەتى ون بولەك»، Ⅱ تومدىق تاڭداما شىعارمالار جيناعى، «اتى جوق اڭگىمە»، «كىسى يەسى» سياقتى كىتاپتارى قالدى.
كوزى تىرىسىندە ءبىر توپ شىعارماسى «جول» دەگەن اتپەن تۇرىك تىلىندە جارىق كوردى.
