جۇمىسسىز ادام قانداي كومەككە ارقا سۇيەي الادى؟

نۇر-سۇلتان. قازاقپارات - جۇمىسسىز ادام قانداي كومەككە ارقا سۇيەي الادى؟ بۇل ساۋالعا ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرجان ءبىرجانوۆ جاۋاپ بەردى، دەپ حابارلايدى قازاقپارات ءتىلشىسى.

ونىڭ اتاپ وتۋىنشە، ەڭبەك جانە حالىقتى الەۋمەتتىك قورعاۋ مينيسترلىگى جۇمىسىز قالعان ازاماتتاردى قولداۋدىڭ ءبىرقاتار ءىس-شاراسىن ازىرلەگەن. اتاپ ايتقاندا، جاستاردى جۇمىسقا ورنالاستىرۋ ءۇشىن «جاستار تاجىريبەسى» باعدارلاماسى قولدانىستا. ەكىنشى باعىت قوعامدىق جۇمىستاردى قامتيدى. ءۇشىنشىسى - جۇمىس ورنىن سۋبسيديالاۋ.

سونىمەن قاتار قىسقامەرزىمدى كۋرستاردى قامتيتىن «باستاۋ بيزنەس» باعدارلاماسى دا وڭ ناتيجە كورسەتىپ وتىر.

«جۇمىسسىز مارتەبەسى eGov-تەگى جەكە كابينەتتە كورىنىپ تۇرادى جانە ۆەدومستۆو بىردەن كەشەندى ءىس-شارالار قابىلدايدى. جۇمىسپەن قامتۋ ورتالىعى ەسەپكە الادى جانە جاردەم كورسەتۋدىڭ ءتۇرلى نۇسقالارىن، ماماندىعى بويىنشا جۇمىس ۇسىنادى. ەگەر ادام وقۋدان وتۋگە دايىن بولسا، وندا قىسقا مەرزىمدى كۋرسقا جىبەرىلەدى نەمەسە وزگە دە ءىس- شارالار كورسەتىلۋى مۇمكىن. ماسەلەن، قىسقا مەرزىمدى كۋرستان ءوتىپ، جەكە كاسىپكەر رەتىندە تىركەلۋگە بولادى»، - دەدى ول.

وسى رەتتە ۆيتسە-مينيستر قىسقا مەرزىمدى كۋرستا وقىتۋدىڭ ەكى باعىتى بار ەكەندىگىن ايتادى.

«ءبىرىنشى باعىت - «باستاۋ بيزنەس» باعدارلاماسى. بۇل باعدارلاما ادامدار وزدەرىنىڭ بيزنەس باستامالارىن جۇزەگە اسىرا الۋى ءۇشىن جاسالعان. ول ءۇشىن ەڭ الدىمەن جۇمىسسىز بولۋ قاجەت. ەكىنشىدەن، ءوتىنىم بەرۋ ارقىلى كاسىپكەرلىك نەگىزدەرى بويىنشا قىسقا مەرزىمدى كۋرستان ءوتۋى ءتيىس. ولار بىرنەشە ايدىڭ ىشىندە ماركەتينگ، ماكروەكونوميكا، باعا قالىپتاستىرۋ سىندى 12 مودۋلدەن تۇراتىن كۋرستان وتەدى. ياعني، ەكونوميكانىڭ بارلىق قىر-سىرىن ۇيرەنەدى.

سودان كەيىن ءبىلىم الۋشى جاتتىقتىرۋشىمەن بىرگە بيزنەس-جوسپار ازىرلەيدى. بيزنەس جوسپارىن قورعاعاننان كەيىن ول تاپسىرعان بيزنەس جوباسى بويىنشا قايتارىمسىز گرانت الۋعا ۇمىتكەر بولا الادى»، - دەدى ەرجان ءبىرجانوۆ.

ونىڭ دەرەگىنشە، بيىل 20 مىڭ گرانت بەرۋ كوزدەلىپ وتىر. ءاربىر گرانتقا بەرىلەتىن سوما 600 مىڭ تەڭگەنى قۇرايدى. وسى جىلدىڭ 7 ايىنىڭ قورىتىندىسىنا سايكەس، گرانتتاردىڭ جارتىسىنان كوبى ءبولىنىپ، 13 مىڭ قازاقستاندىق ءوز بينەسىن اشتى. سونىمەن قاتار ول ەكىنشى باعىت كوللەدجدەردە 2 جىل بويى قىسقا مەرزىمدى باعدارلامامەن وقۋ ەكەندىگىن ايتادى.

«بۇل باعىت جۇمىس بەرۋشىنىڭ، قازىر نارىققا نە قاجەتتىلىگى ەسكەرىلە وتىرىپ ازىرلەنەدى. ماسەلەن، ەڭ الدىمەن قازىرگى ۋاقىتتا قۇرىلىس سالاسى قارقىندى ءجۇرىپ جاتىر. بارلىق جەرگە دانەكەرلەۋشى، مونتاجداۋشى قاجەت. وسى ماماندىقتار بويىنشا وقىتامىز. ءبىلىم الان ادامدار ءتيىستى ۇيىمدارعا جىبەرىلەدى. بۇگىندە قۇرىلىس ماماندىقتارىنا سۇرانىس جوعارى. قۇرىلىستا قاجەتتىلىك جوعارى. سوندىقتان ءبىز نارىق قاجەتتىلىگىنەن باعدار الىپ وتىرامىز»، - دەدى ول.

ۆيتسە-مينيستر قولداۋ ءىس-شارالارىنىڭ تاعى ءبىرى قوعامدىق جۇمىسقا تارتۋ ەكەندىگىن ايتادى. مۇنداي جۇمىسقا تارتىلعان ازاماتتاردى ەڭ تومەنگى جالاقى تولەنەدى.