قامشىبەك قوڭقابايەۆ: توكيودا قىمىز ىشپەسەك تە قازى جەدىك
وسى اتاۋلى كۇنگە وراي ماسساگەت پورتالى توكيو وليمپياداسىنىڭ قولا جۇلدەگەرى، الەمنىڭ ەكى دۇركىن، ازيانىڭ ءۇش دۇركىن كۇمىس جۇلدەگەرى قامشىبەك قوڭقابايەۆپەن بوكس تۋرالى اڭگىمە ءوربىتتى.
- قامشىبەك، بوكسقا نەشە جاسىڭدا كەلدىڭ، قالاي كەلدىڭ؟
- ءبىز وتباسىمىزبەن سپورتقا جاقىنبىز. مەن بوكسقا كەش، 16 جاسىمدا كەلدىم. ورتانشى اعامدى اكەم سپورتقا جەتەلەپ الىپ بارعان. ال مەنىڭ بارۋىما سول ورتانشى اعام، اسقار سەبەپ بولدى. ول اسكەرگە كەتىپ بارا جاتىپ بوكستاعى مەنى العاشقى جانە قازىرگى باپكەرىم توكەنوۆ سەيىتجان مەيرامبەك ۇلىنا تاپسىرىپ كەتتى. ورتانشى اعام كەيىن دە سپورتتى جالعاستىرىپ، ەرەجەسىز جەكپە-جەكتەن سپورت شەبەرلىگىنە ۇمىتكەر اتاندى. ول بوكستان بولەك، سامبو، اسكەري سامبومەن اينالىسادى. مەن العاش رەت قازالىدا اۋىر سالماقتا تۋرنير وتكەن كەزدە بىردەن جارتىلاي فينالعا شىعىپ جۇدىرىقتاسقانمىن.
- بوكستان الەم چەمپيوناتىنىڭ ەكى دۇركىن، ازيا چەمپيوناتىنىڭ ءۇش دۇركىن كۇمىس جۇلدەگەرىسىڭ. التىن الۋعا نە جەتپەي ءجۇر؟
- نەگىزى مەن اسكەريلەر اراسىندا الەم چەمپيونىمىن. التىن ماعان بۇيىرماي كەلەدى. وعان ەش وكىنبەيمىن. ءالى ۋاقىت بار. مانسابىمدى اياقتاعان جوقپىن. ۇلكەن جەڭىستەر الدا. كاسىپقوي بوكستا، گەننادي گولوۆكين اعالارىمىز سياقتى، اۋىر سالماقتا ابسوليۋتتى چەمپيون بولعىم كەلەدى.
- قازاقستاندا بوكستان اسا اۋىر سالماقتا الەم جانە وليمپيادا چەمپيوندارى جوق. الداعى ۋاقىتتا پاريجدە وتەتىن وليمپياداعا قاتىسۋ جوسپاردا بار ما؟
- ازىرگە ناقتى ەشتەڭە دەپ ايتا المايمىن. الدا كاسىپقوي بوكسقا اۋىسسام دەگەن ويدا ءجۇرمىن. ەكى جاقتا دا جۇرۋگە بولادى. الدا سەربيادا وتەتىن الەم چەمپيوناتىنا قاتىسۋ دا ويدا بار. ءبارىن ۋاقىت شەشەدى.
- قازاق بوكسىنىڭ ءستيلى ەسكىردى دەپ ويلامايسىڭ با؟ قازىر تورەشىلەر توبەلەسىپ ءجۇرىپ جۇدىرىقتاسقانداردى جوعارى باعالايتىنداي كورىنەدى...
- ءستيلدى وزگەرتۋدىڭ قاجەتى جوق. ءبىراق كاسىپقوي بوكستا قورعانىستى جەتىلدىرۋ كەرەك دەپ ويلايمىن.
- ءدال قازىر اۋەسقوي بوكستا ساعان نە ۇنامايدى؟
- ءبارى، دۇرىس، ءبارى ۇنايدى. جالپى، جاتتىعۋىندا دا، جەكپە-جەگىندە دە كاسىپقوي بوكس پەن اۋەسقوي بوكستا ۇلكەن ايىرماشىلىق بار. ەكى جاقتا دا بولعاسىن سالىستىراسىڭ. ءبىراق اۋەسقوي بوكستا ءدال مىنالار ۇنامايدى دەيتىندەي اۋىز تولتىرىپ ايتاتىن ەشتەڭە جوق.
- توكيو وليمپياداسىنا ويىسساق. جاپون جەرىندە قىمىز ءىشىپ، قازى جەي الدىڭىزدار ما؟ وعان مۇمكىندىك بولدى ما؟
- ءبىزدىڭ بوكسشىلار جەڭىپ، ءبىزدىڭ بوكس مەكتەبىن ماقتاعان كەزدە: «قىمىز بەن قازىنىڭ كۇشى» دەگەن سوزدەر ايتىلىپ قالىپ جاتادى. توكيودا قىمىز ىشپەسەك تە قازى جەدىك. قازى كەتكەنشە ۇزىلگەن جوق. قىمىزدى الىپ بارۋعا مۇمكىندىك بولمادى. سەبەبى قىمىز سونشاما بيىكتە ۇشاتىن ۇشاق قىسىمىنا شىداي الماي اتىلىپ كەتەدى ەكەن. ال ەلگە قايتام دەگەنشە قازى مول بولدى.
- توكيو وليمپياداسىنداعى سوڭعى جەكپە-جەكتىڭ ءبىرىنشى راۋندىندا بەلسەندى بولدىڭىز. ءبىراق تورەشىلەر ءبىرىنشى راۋندتىڭ جەڭىسىن ريچارد تورەسكە بەردى. كەيىن تاكتيكانى وزگەرتتىڭىز. ءۇشىنشى راۋندتا ءبىراز شارشاپ قالعانداي كورىندىڭىز. تاكتيكانى وزگەرتۋگە نە سەبەپ بولدى؟ جەڭىلىستىڭ باستى سەبەبى وسى ەمەس پە؟
- «باق شابا ما، باق شابا ما؟» دەيدى عوي. سوندىقتان بىرەۋگە كىنا ارتقىم كەلمەيدى. تورەشى قولدى كوتەردى جەڭدىڭ، جەڭىلدىڭ بولدى. ءبىراق ءبىرىنشى راۋندتا مەن جەڭىپ جاتىرمىن دەپ ويلادىم. تورەشىلەر ءبىرىنشى راۋندتىڭ قورىتىندىسىن قارسىلاستىڭ پايداسىنا شەشىپ بەردى. سودان كەيىن ءبىر وزگەرىس ورناتپاساڭ، كەيىن ىشىڭدە «نەگە سول كەزدە بىرنارسە ىستەمەدىم» دەگەن وكىنىش قالادى.
سوندىقتان مەن ەكىنشى راۋندتا ءبىرىنشى نومىرمەن جۇمىس ىستەۋدى شەشتىم. قارسىلاسقا ءبىراز سوققى بەرىپ تە ۇلگەردىم. ول ەسەڭگىرەگەندەي بولدى. ءبىراق تورەشى ەسەپ اشقان جوق. سودان كەيىن، كەرىسىنشە ماعان ەسكەرتۋ بەردى. سونىڭ ءبارى جەڭىسكە دەگەن جىگەردى باسىپ، پسيحولوگياعا اسەر ەتەدى ەكەن. سوندا دا سوڭىنا دەيىن كۇرەسۋگە بەل بۋىپ، ءۇشىنشى راۋندتا اۋەلدەگى جوسپارىمىز بويىنشا جۇمىس ىستەي باستادىم. وكىنىشكە قاراي، اۋىر سالماقتا ءبىر سوققى عوي، مۇرنىمداعى جاراقاتقا بايلانىستى جارىستى توقتاتۋعا ءماجبۇر بولدىق.
- باقتيار ارتايەۆ، «بوكستاعى بيىلعى ساتسىزدىكتىڭ ءبىر ۇشى سپورتشىلاردىڭ تاماعىنا بايلانىستى دەدى. قىمىز بەن قازىنى اۋىستىرۋ كەرەك، بوكسشىنىڭ اعزاسى كۇشتى تاماقپەن كۇرەسەمىن دەپ جاتتىعۋدان سارقىلعان كۇشىن قايتا جيناي الماي قالادى» دەگەندەي پىكىر ايتتى. وسى پىكىرمەن كەلىسەسىڭ بە؟
- قىمىز بەن قازى جاتتىعۋدا بەرىلەدى. ەندى، سول ەكەۋىنىڭ قاتتى ءبىر كەرى اسەرى بار دەپ ويلامايمىن. كەرىسىنشە، جىلقى ەتى جەڭىل، تەز قورىتىلادى. كەشكە قاراي مايلى تاماق جەگەندە اسقازانعا اۋىرلىق بولۋى مۇمكىن. ال، قىمىز بەن جىلقى ەتىنەن ونداي اۋىرلىقتى ءوز باسىم سەزىنگەن ەمەسپىن. دارۋمەندەر بىلاي دا بەرىلەدى.
- توكيودا كىم سەنى تاڭعالدىردى، بوكسشىلاردان؟
- 75 كەلى سالماقتاعى برازيليالىق ەبەرت كونسەيسان دەگەن بوكسشى بولدى. ول مەنى عانا ەمەس بۇكىل الەمدى تاڭعالدىردى. ەبەرت وسى سالماقتاعى فاۆوريت ۋكراينالىق الەكساندر حيجنياكتى نوكاۋتپەن جەڭدى. باعى مەن بابى قاتار شاۋىپ تۇر ەكەن.
- وسى ۋاقىتقا دەيىن كاسىپقوي بوكستا ءۇش جەكپە-جەك وتكىزدىڭ. الداعى ۋاقىتتا ءبىرجولا كاسىپقوي بوكسقا اۋىسۋ ويدا بار ما؟
- ءيا، ارينە ويدا بار. جاڭا ايتىپ وتكەنىمدەي ەكەۋىنىڭ اراسىندا ايىرماشىلىق كوپ. كاسىپقوي بوكس تاجىريبەنى، تاكتيكانى، سابىرلىلىقتى كوبىرەك قاجەت ەتەدى. اۋەسقويدا 3 راۋندقا شىدايسىڭ. كاسىپقويدا 12 راۋند بويى جۇدىرىقتاسۋ ءۇشىن ۇلكەن فيزيكالىق دايىندىق كەرەك.
- اڭگىمەڭە راحمەت!
massaget.kz
