كۇيدىرگى نەسىمەن قاۋىپتى - سانيتار دارىگەر
وسىعان وراي ماماندار كۇيدىرگى اۋرۋىنا قاتىستى تۇسىنىك بەردى، دەپ حابارلايدى قازاقپارات ءتىلشىسى.
س ق و سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى ارمان كۇشباسوۆتىڭ ايتۋىنشا، ءسىبىر جاراسى - جانۋارلار مەن ادامداردىڭ اسا قاۋىپتى جۇقپالى اۋرۋى.
كوپ جاعدايدا قاۋىپتى ينفەكسيانى جۇقتىرۋدىڭ ارتى ولىممەن اياقتالادى.
«وتتەگى بولعان جاعدايدا ءسىبىر جاراسى قوزدىرعىشىنىڭ اعزادان تىس سپورالارى پايدا بولادى. جانۋارلار قاراساندى توپىراق ارقىلى جۇقتىرادى. بۇل اۋرۋدى تۋدىراتىن ميكروبتار ونداعان جىلدار بويى توپىراقتا ساقتالۋى مۇمكىن جانە بەلگىلى ءبىر جاعدايلاردا كوبەيەدى. جانۋارلار اۋرۋدى كوبىنەسە ينفەكسيالانعان ءشوپتى جەگەن كەزدە جۇقتىرادى. سونىمەن قاتار قاراسانمەن جانۋارلار قۇرعاقشىلىق جىلدارى اۋىرادى. مال الاسا شوپپەن بىرگە توپىراقتاعى ينفەكسيانى بىرگە الادى. ال ادامدار بۇل كۇيدىرگىنى جانۋارلاردان جۇقتىرادى»، - دەيدى ارمان كۇشباسوۆ.
ينكۋباتسيالىق كەزەڭ بىرنەشە ساعاتتان باستاپ، ءبىر اپتاعا دەيىن، كوبىنەسە بۇل كەزەڭ 2-3 كۇنگە سوزىلادى.
«ادامداردىڭ ينفەكسيانى اۋرۋ مالدان، ولاردىڭ ەت-سۇتىنەن جانە اۋرۋ جانۋارلار تۇرعان ورتادان دا جۇقتىرۋى مۇمكىن. كوبىنەسە ادامدار اۋرۋ جانۋارلاردى اسىراعاندا، ولاردى ءماجبۇرلى تۇردە سويۋدا جانە اۋرۋ مالدىڭ ەتىن وڭدەگەندە جۇقتىرادى. ال ينفەكسيا ولاردىڭ تەرىسىمەن، جۇنىمەن جانە سۇيەگىمەن جۇمىس ىستەۋ بارىسىندا سيرەك جۇعادى»، - دەيدى سانيتار دارىگەر.
كۇيدىرگى اۋرۋىنىڭ الدىن الۋ ءۇشىن ءبىرقاتار ەرەجەنى ەستەن شىعارماعان ءجون.
«جانۋارلاردا اۋرۋ بەلگىلەرى بايقالسا بىردەن ۆەتەريناريالىق دارىگەردى شاقىرتۋ قاجەت. ەت جانە باسقا دا مال ونىمدەرىن ارنايى ورىنداردان - بازارلاردان جانە دۇكەندەردەن ساتىپ الۋ قاجەت، ويتكەنى وندا ولار ۆەتەريناريالىق-سانيتاريالىق ساراپتامادان كەيىن عانا ساتىلادى»، - دەيدى ارمان كۇشباسوۆ.
بۇعان دەيىن س ق و اقجار اۋدانىنداعى گوركيي ەلدى مەكەنىندە ءبىر تۇرعىننىڭ كۇيدىرگى جۇقتىرىپ اۋرۋحاناعا تۇسكەنىن ايتقان ەدىك.
ناۋقاستىڭ جاعدايى قالىپتى. دارىگەرلەر باقىلاۋدا ۇستاپ وتىر. جالپى ءسىبىر جاراسى س ق و- دا سوڭعى رەت 1994-جىلى تيميريازيەۆ اۋدانىندا تىركەلگەن ەكەن.
