سەنات ءتوراعاسى اشىمبايەۆ جامبىلداعى وقيعا جايىندا پىكىر ءبىلدىردى

نۇر-سۇلتان. قازاقپارات - ق ر پارلامەنتى سەناتىنىڭ ءتوراعاسى ماۋلەن اشىمبايەۆ جامبىل وبلىسىنداعى اسكەري بولىمدە بولعان جارىلىسقا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«اپات ايتىپ كەلمەيدى. جامبىل وبلىسىندا بولعان توتەنشە جاعداي ءبارىمىزدى الاڭداتىپ وتىرعانى راس. مۇنداي سىن-ساعاتتا، ەڭ الدىمەن، بايبالامعا سالىنباۋدىڭ ماڭىزدى ەكەنى تۇسىنىكتى. قازىر اپات اۋماعىنداعى احۋال مەملەكەت باسشىسىنىڭ باقىلاۋىندا. پرەزيدەنتىمىزدىڭ تاپسىرماسىمەن ءتيىستى ورگانداردىڭ باسشىلارى وقيعا ورنىنا شۇعىل بارىپ، وبلىس باسشىلىعىمەن بىرلەسىپ ارەكەت ەتۋدە. سونداي-اق، بايزاق اۋدانىندا جەدەل شتاب قۇرىلىپ، قۇتقارۋشىلار، اسكەري قىزمەتشىلەر، دارىگەرلەر جانە باسقا دا بەلسەندى ازاماتتار جۇمىس ىستەپ جاتىر. وكىنىشكە قاراي، قازا تاپقانداردىڭ بار ەكەنى بەلگىلى بولدى. وپات بولعانداردىڭ وتباستارى مەن جاقىندارىنا قايعىلارىنا ورتاقتاسىپ، كوڭىل ايتامىز جانە اپاتتان زارداپ شەككەندەردىڭ تەزىرەك ساۋىعىپ كەتۋىن تىلەيمىز»، - دەپ جازدى سەنات ءتوراعاسى Facebook پاراقشاسىندا.

ەستەرىڭىزگە سالا كەتسەك، كەشە ساعات شامامەن 19:00-دە جامبىل وبلىسىنىڭ بايزاق اۋدانىندا ورنالاسقان اسكەري ءبولىم قويمالارىنىڭ بىرىنەن ءورت شىعىپ، ارتى بىرنەشە جارىلىسقا اينالعان- دى. سونىڭ سالدارىنان وسى ۋاقىتقا دەيىن 4 اسكەري قىزمەتشىنىڭ قازا تاپقانى، 3 اسكەري قىزمەتشى مەن توتەنشە جاعدايلار دەپارتامەنتىنىڭ بىرنەشە مامانىمەن بايلانىستىڭ جوقتىعى بەلگىلى بولعان ەدى.