پرەزيدەنت اۋىل شارۋاشىلىعى ءمينيسترىنىڭ مىندەتىن اتقارۋشى ەربول قاراشوكەيەۆتى قابىلدادى
قاسىم-جومارت توقايەۆقا ەلىمىزدەگى اگروونەركاسىپ كەشەنىنىڭ قازىرگى جاعدايى مەن سالانى تۇراقتى دامىتۋعا باعىتتالعان جۇيەلى جۇمىستار تۋرالى باياندالدى.
ەربول قاراشوكەيەۆ پرەزيدەنتتى وسىمدىك شارۋاشىلىعىن، سونىڭ ىشىندە سۇرانىسقا يە داقىلداردى ءوندىرۋدى، سالانى سيفرلاندىرۋ مەن جەردى يگەرۋدىڭ ناقتى تەحنولوگياسىن ەنگىزۋدى جانە تۇقىم شارۋاشىلىعىنىڭ زاماناۋي جۇيەسىن قۇرۋ جايىندا حاباردار ەتتى.
سونىمەن قاتار، ۆەدومستۆو باسشىسى مال شارۋاشىلىعىن دامىتۋ، ەگىستىك پەن جايىلىمدىق دالاداعى وسىمدىكتەر قۇرامىنىڭ ءتۇرىن انىقتاۋ ءۇشىن عارىشتىق باقىلاۋ مەن قاشىقتان زوندتاۋدى قولدانۋ جوسپارىمەن تانىستىردى.
قاسىم-جومارت توقايەۆقا مەملەكەتتىك قولداۋ شارالارى مەن سۋبسيديالاۋ تەتىكتەرىن جەتىلدىرۋ، سونداي-اق ۆەتەرينارلىق قىزمەت، اگرارلىق عىلىم مەن كادرلاردى دايارلاۋ جۇيەسىن جاڭعىرتۋ جۇمىستارى تۋرالى ايتىلدى.
سالانى رەفورمالاۋدىڭ نەگىزگى باعىتتارى 2021-2025-جىلدارعا ارنالعان اگروونەركاسىپتىك كەشەندى دامىتۋدىڭ ۇلتتىق جوباسى اياسىندا جۇزەگە اسىرىلادى.
مەملەكەت باسشىسى كەزدەسۋ سوڭىندا دايىن ءونىم شىعارۋدى دامىتۋعا، ەگىن جيناۋ جۇمىستارىن ۋاقىتىلى ءارى ساپالى ۇيىمداستىرۋعا، الداعى قىستا مال شارۋاشىلىعىن ازىقپەن قامتاماسىز ەتۋگە باعىتتالعان ءبىرقاتار تاپسىرمالار بەردى.
