اۋىل اكىمدىگىنىڭ قۇزىرەتى قايتا قارالادى
«قازىرگى كۇنى اۋىل اكىمدىگىندە 3-5 قانا قىزمەتكەر جۇمىس ىستەيدى. ولار جۇرتشىلىققا بارلىق سالا بويىنشا قىزمەت كورسەتىپ ۇلگەرمەيدى. ۋاقىت جەتپەيدى نەمەسە قىزمەتكەردىڭ قوسىمشا جۇكتەمەسى كوپ. وسى ورايدا اۋىل اكىمدىگى اپپاراتى قىزمەتىن ۇيىمداستىرۋ قۇقىعىن قايتا قاراستىرماقپىز. ونىڭ ىشىندە اۋىل اكىمدىگىنە 3-5 قانا ەمەس، ودان دا كوپ قىزمەتكەر الۋ قۇقىعى بەرىلەدى. جانە قىزمەتكەرلەردىڭ جالاقىسىن ءوسىرۋ دە نازاردان تىس قالمايدى. بۇنىڭ بارلىعى اۋىل اكىمدىگى جانىنداعى كەڭەستە قارالىپ، ءتيىستى شەشىم سول جەردە قابىلداناتىن بولادى. ودان بولەك، بۇگىنگى تاڭدا اۋىل اكىمدىگى وزدەرىنە ءتان ەمەس قۇزىرەتتى اتقارىپ جاتقان جايتتار دا بار. نەمەسە كەرىسىنشە اۋىل اكىمدىگىنىڭ كەيبىر ماسەلەلەر بويىنشا قۇزىرەتى جوق بولىپ شىعادى. وسى ورايدا اۋىل اكىمدىگى قىزمەتىن ۇيىمداستىرۋدى قايتا قاراۋ ماڭىزدى، - دەدى ق ر ۇلتتىق ەكونوميكا مينيسترلىگى وڭىرلەردى تالداۋ جانە جەرگىلىكتى ءوزىن- ءوزى باسقارۋدى دامىتۋ دەپارتامەنتى ديرەكتورىنىڭ ورىنباسارى ميرجان يمانبايەۆ.
ونىڭ ايتۋىنشا، بۇگىندە اۋىل اكىمدىگى اپپاراتى قىزمەتىنە قاتىستى كەڭ اۋقىمدى تالداۋ ءجۇرىپ جاتىر. ايتا كەتسەك، ەلىمىزدە جەرگىلىكتى ءوزىن- ءوزى باسقارۋدىڭ 2021-2025 -جىلدارعا ارنالعان تۇجىرىمداماسى قابىلداندى. اتالعان تۇجىرىمداما اياسىندا 2024 -جىلدان باستاپ ەلىمىزدىڭ اۋىلدىق ەلدى مەكەندەرىندە ارنايى كەڭەس قۇرىلماق.
