ونلاين ساناق كەزىندە جەكە باس دەرەكتەرى قالاي قورعالادى
«قازاقپارات» حالىقارالىق اگەنتتىگى ۇلتتىق ستاتيستيكا بيۋروسىنىڭ ماماندارىنا ەل كوكەيىندە جۇرگەن وسى تەكتەس ساۋالداردى قويعان ەدى. رەسمي ورگاننىڭ جاۋابىن ىقشامداپ بەرىپ وتىرمىز.
ەلەكتروندىق ساناق جۇرگىزۋ سىلتاۋىمەن ينتەرنەت الاياقتىققا بارۋ دەرەكتەرى تىركەلدى مە؟ ونداي ارەكەتتەردىڭ جولىن كەسۋ ءۇشىن قانداي شارالار قابىلدانعان؟
ۇلتتىق ستاتيسكا بيۋروسىنىڭ اقپاراتتىق جۇيەسى اقپاراتتىق- كوممۋنيكاتسيالىق ينفراقۇرىلىمداردىڭ اسا ماڭىزدى نىساندارىنىڭ تىزىمىنە ەنگىزىلگەن جانە ق ر ۇلتتىق قاۋىپسىزدىك كوميتەتىنىڭ «مەملەكەتتىك تەحنيكالىق قىزمەت» مەكەمەسىنىڭ تالداۋىنا الىنعان. توقسان سايىن جۇيەنىڭ وسال تۇستارىن انىقتاۋ ماقساتىندا تەكسەرۋ جۇرگىزىلىپ وتىرادى. سونداي- اق، ساناق قارساڭىندا اقپاراتتىق جۇيەنىڭ اقپاراتتىق قاۋىپسىزدىك تالاپتارىنا سايكەستىگى سىناقتان وتكىزىلىپ، ول بويىنشا وڭ ناتيجە الىنعان.
ارنايى sanag.gov.kz سايتىنىڭ قورعانىشى رەتىندە سەرۆەر مەن قولدانۋشى اراسىنداعى اقپارات الماسۋ https حاتتاماسىمەن قورعالعان، الەمدەگى ءىرى سەرتيفيكاتتاۋ ورتالىقتارىنىڭ ءبىرى - Sectigo SSL- سەرتيفيكاتى الىندى. حالىق ساناعى كەزىندە مالىمەتتەردى ورتالىق سەرۆەرگە بەرۋ ەكى تاسىلمەن جۇزەگە اسىرىلادى.
ءبىرىنشىسى - پلانشەتتەن ونلاين رەجيمدە قورعالعان جەلى ارقىلى (ينتەرنەتكە قوسىلماي) ۇيالى بايلانىس وپەراتارىنىڭ مالىمەتتەردى پاكەتتىك بەرۋى. مۇنداي بايلانىس ءتۇرىن ينتەرۆيۋەر بارلىق دەڭگەيدە (قالالىق، اۋداندىق، اۋىلدىق) وپەراتور قىزمەتىنىڭ بايلانىس ايماعىندا پلانشەتتى قولدانىپ، جۇرگىزە الادى.
ەكىنشى ءتاسىل - ۇيالى بايلانىس ناشار شالعاي اۋىلداردا ساۋالناما جۇرگىزۋ كەزىندە پايدالانىلادى. ينتەرۆيۋەر ءۇشىن ساناق جۇرگىزۋدىڭ ورتالىق سەرۆەرىنە مالىمەتتەردى وففلاين رەجيمىندە جەرگىلىكتى اتقارۋشى ورگاندار (اۋىلدىق وكرۋگ اكىمدىكتەرى) قوسىلعان ارنايى جەلى ارقىلى بەرۋ مۇمكىندىگى قاراستىرىلعان. مۇنداي بايلانىس ءتۇرى قالالىق، اۋداندىق، اۋىلدىقاكىمدىكتەردە قولجەتىمدى.
مالىمەتتەردى بارلىق اۋماقتىق ستاتيستيكا ورگاندارى قوسىلعان بيۋرونىڭ دەرەكتەر بەرۋدىڭ ۆەدومستۆولىق جەلىسى ارقىلى دا جىبەرۋگە بولادى. جىبەرىلەتىن بارلىق فايلدار شيفرلانعان.
ينتەرۆەر تۇرعىننان ساناق ءۇشىن قانداي قۇجاتتاردى كورۋگە سۇراي الادى؟ قۇجاتتاردىڭ كوشىرمەسىن، فوتوسۋرەتىن تۇسىرۋگە قۇقىعى بار ما؟
ساناق جۇرگىزەتىن ينتەرۆيۋەردىڭ موينىندا كوك ءتۇستى «حالىق ساناعى» سيمۆوليكاسى بار شارف، كوك ءتۇستى سومكەسى، پلانشەتى جانە ينتەرۆيۋەر ەكەنىن ايشىقتايتىن بەيدج- قۇجاتى بولادى. ول قۇجاتتا فوتوسۋرەتى، اتى- ءجونى، ءتيىستى اۋماقتىق ستاتيستيكا ءبولىمىنىڭ ءمورى جانە ءنومىرى كورسەتىلەدى. ول ءنومىردى sanaq.gov.kz سايتىنداعى «ينتەرۆيۋەردى ىزدەۋ» جولاعىنا ەنگىزۋ ارقىلى تەكسەرۋگە بولادى.
سونداي- اق، تۇرعىن ساناق مالىمەتتەرىن الۋشىنىڭ ينتۆەريۋەر ەكەنىنە كۇمانداناتىن بولسا، 1446 جانە 88000800878 ءبىرىڭعاي بايلانىس نومىرىنە حابارلاسۋ ارقىلى تەكسەرۋ مۇمكىندىگى قاراستىرىلعان. قۇجاتتاردىڭ كوشىرمەسى مەن فوتوسۋرەتتەرىن تۇسىرۋگە قۇقى جوق.
ينتەرۆيۋەر رەسپوندەنتتىڭ جەكە سايكەستەندىرۋشى ءنومىرىن تەك دەرەكتەردىڭ انىقتىعىنا كوز جەتكىزۋ ءۇشىن قولدانۋعا سۇراي الادى. ونى ارنايى پلانشەتكە ەنگىزۋ ارقىلى ساناققا قاتىساتىن تۇلعا تۋرالى باستاپقى مالىمەتتەردى الادى.
ايتا كەتەيىك، پلانشەتكە ەنگىزىلەتىن مالىمەتتەر ساناق ساۋالدارىنا جاۋاپ الۋ اياقتالعان سوڭ بىردەن شيفرلانىپ، قورعالعان ارنايى بايلانىس كانالدارى ارقىلى تىكەلەي ۇلتتىق ستاتيستيكا بيۋروسىنىڭ ورتالىق سەرۆەرىنە كەلىپ تۇسەدى. پلانشەتتەگى بۇل مالىمەتتەردى كوشىرىپ الۋ نەمەسە بىرەۋگە بەرىپ جىبەرۋ مۇمكىندىگى جوق.
تاعى ءبىر ەسكەرەتىن جايت، اقىلى تۇردە قىزمەتكە الىناتىن ينتەرۆيۋەرلەر ازاماتتاردىڭ جەكە مالىمەتتەرىن ءۇشىنشى تۇلعالارعا جاريالاماۋ تۋرالى كەلىسىمگە قول قويادى. بۇل تالاپتى بۇزعاندارعا زاڭمەن جاۋاپكەرشىلىك قاراستىرىلعان.
جوسپار بويىنشا حالىقتىڭ نەشە پايىزىن ونلاين ساناقپەن، نەشە پايىزىن وفلاين ساناقپەن قامتۋ جوسپارلانىپ وتىر؟
بۇل تۇرعىدا ناقتى جوسپار قويىلعان جوق. ۇلتتىق ستاتيستيكا بيۋروسى ونلاين ساناقتى قازىرگى پاندەميا كەزىندە حالىققا بەرىلگەن بالامالى ءادىس دەپ قاراستىرادى. ساناق جۇرگىزۋ كەزىندە سيفرلىق تەحنولوگيالار العاش رەت قولدانىلىپ وتىرعانىن اتاپ ءوتۋ كەرەك. ەلىمىزدىڭ قانشا ازاماتى ونلاين ءادىستى تاڭداعانى ساناق اياقتالعان سوڭ عانا ايتىلادى..
ت م د ەلدەرىنىڭ اراسىندا مۇنداي تاجىريبە تەك بەلارۋس مەملەكەتىندە پايدالانىلدى. بۇل ەلدە دەبىزدەگىدەي ەكى ادىسپەن ساناق جۇرگىزىلدى. ناتيجەسىندە حالىقتىڭ 22 پايىزى ونلاين ءتاسىلدى پايدالانعان.
ۇلتتىق ساناق جۇرگىزۋ ءۇشىن بيۋدجەت قاراجاتىنا نەشە كولىك جانە قانداي ماركالى كولىكتەر ساتىپ الىندى نەمەسە ساتىپ الىنادى؟ ساناق بىتكەننەن كەيىن ول كولىكتەر قانداي ورگاننىڭ مەنشىگىنە بەرىلەدى؟
جالپى قۇنى 475,4 ميلليون تەڭگەگە 139 دانا ۆاز 21214 نيۆا ماركالى (وتاندىق ءوندىرىس) كولىكتەر اۋداندىق ستاتيستيكا باسقارمالارىنىڭ قاجەتىنە ساتىپ الىندى. بۇل كولىكتەر وڭىرلەردە ساناققا قاتىستى شارالاردى (قاجەتتى ماتەريالداردى جەتكىزۋ، ۋچاسكەلەردى ارالاۋ، ينتەرۆيۋەر پايدالاناتىن پلانشەتتەردى قاجەت بولعان جاعدايدا اۋىستىرۋ جانە ت. ب. ) جۇرگىزۋگە پايدالانىلماق.
ساناق اياقتالعان سوڭ كولىكتەر اۋداندارداعى ستاتيستيكا باسقارمالارىنىڭ قىزمەتتىك ماقساتتارىنا پايدالانىلادى. اتاپ وتسەك، تۇراقتى تۇردە حالىقتى ءومىر ءسۇرۋ جاعدايى مەن جۇمىسپەن قامتىلۋ دەڭگەيىنە قاتىستى زەرتتەۋلەر جۇرگىزىلەدى، اۋىل شارۋىشىلىق ساناعى وتكىزىلەدى.
تاعى ءبىر ەسكەرە كەتەتىن جايت، اۋداندىق باسقارمالاردىڭ قولدانىپ جۇرگەن كولىكتەرى 10 جىلدان استام ۋاقىت جاڭارتىلماعان.
ينتەرۆيۋەرگە ەسىك اشۋدان نەمەسە ساۋالدارىنا جاۋاپ بەرۋدەن باس تارتقان ادامداردىڭ دەرەكتەرى قالاي بىرىزدەندىرىلەدى؟ بۇعان دەيىنگى تاجىريبە بويىنشا حالىقتىڭ نەشە پايىزى ساناققا قاتىسۋدان باس تارتقان ەدى؟
بيىلعى ساناق ەكى تاسىلمەن جۇرگىزىلەتىنى تۋرالى جوعارىدا ايتىلدى. ساناق پاراقتارىنا ونلاين تاسىلمەن جاۋاپ بەرۋ قاراستىرىلعان. ياعني، ءار رەسپوندەنت وزىنە ىڭعايلى جولدى تاڭدايدى. ول ءۇشىن 45 كۇن ۋاقىت بەرىلەدى (1-قىركۇيەك پەن 15-قازان ارالىعى) . ەگەر وسى كەزەڭدە جاۋاپ قاتپاسا، ۇيىنە ينتەرۆيۋەر كەلەدى.
«مەملەكەتتىك ستاتيستيكا تۋرالى» زاڭ بويىنشا، ازاماتتار ستاتيستيكالىق ماقساتتا پايدالانۋعا قاجەتتى مالىمەتتەردى بەرۋگە مىندەتتى ەكەنىن اتاپ وتكىمىز كەلەدى. ەگەر بەلگىلى ءبىر سەبەپتەرمەن رەسپوندەنت ۇيىندە بولماعان جاعدايدا ينتەرۆيۋەر ءوزىنىڭ تەلەفون ءنومىرى مەن اتى- ءجونىن كورسەتىپ، حابارلاما قالدىرىپ كەتەدى. كەيىن سول ۇيگە تاعى ءبىر مارتە بارادى.
ازامات ساناقشىنىڭ ساۋالدارىنا جاۋاپ بەرۋدەن باس تارتسا، ونداي تۇلعالاردىڭ ءتىزىمىن جاساپ، اۋداندىق، قالالىق، وبلىستىق كوميسسيانىڭ قاراۋىنا ۇسىنادى.
