بۇل جولعى حالىق ساناعى قاعازسىز جۇرگىزىلەدى - اسقار مامين

نۇر-سۇلتان. قازاقپارات - ق ر پرەمەر-ءمينيسترى اسقار مامين ۇكىمەت وتىرىسىندا كۇزدە وتەتىن ۇلتتىق ساناقتىڭ ءمان-ماڭىزىنا توقتالدى، دەپ حابارلايدى قازاقپارات ءتىلشىسى.

«مەملەكەت باسشىسى قاسىم-جومارت توقايەۆتىڭ تاپسىرماسى بويىنشا بيىلعى 1- قىركۇيەك - 30- قازان ارالىعىندا حالىق ساناعىن وتكىزۋ جوسپارلانىپ وتىر. وزدەرىڭىز بىلەسىزدەر، مۇنىڭ الدىنداعى ساناق 2009-جىلى وتكەن. بۇل ءىس-شارانىڭ الەۋمەتتىك-ەكونوميكالىق ماڭىزى زور. ساناق ناتيجەسى بويىنشا مەيلىنشە ءدال دەرەكتەر بولىپ تابىلاتىن ءارى ەلدەگى احۋالدى تالداۋعا، بولجام جاساۋعا جانە ءتيىستى شەشىمدەر قابىلداۋعا نەگىز بولاتىن كوپتەگەن كورسەتكىشتەر الىنادى»، - دەگەن ۇكىمەت باسشىسى ءار قازاقستاندىقتىڭ ساناققا قاتىسۋى ماڭىزدى ەكەنىن اتاپ ءوتتى.

«ەلىمىزدىڭ ءار ازاماتىنىڭ ساناققا قاتىسۋىنىڭ ماڭىزى وتە زور. ساناق پروتسەسىن اۆتوماتتاندىرۋ ءۇشىن قاعازدان مۇلدەم باس تارتىپ، سيفرلىق تەحنولوگيالاردى قولدانۋ جوسپارلانىپ وتىر. بۇل مالەمەتتەردى جەدەل جيناۋعا جانە شىعىنداردى ازايتۋعا مۇمكىندىك بەرەدى»، - دەدى اسار مامين.

ۇكىمەتتىڭ بۇگىنگى وتىرىسىندا ۇكمىەت باسشىسى كوروناۆيرۋس ينفەكتسياسىنىڭ تارالۋىن بولدىرماۋ جونىندەگى ۆەدومستۆوارالىق كوميسسياعا وڭىرلەردە Ashyq جۇيەسىنە قاتىساتىن بيزنەس سۋبەكتىلەرى ءۇشىن دەمالىس كۇنگى شەكتەۋ شارالارىن جەڭىلدەتۋ ماسەلەسىن قاراستىرۋدى تاپسىردى.

«ۆاكسينانىڭ ءبىرىنشى كومپونەنتىن العانداردىڭ سانى 6,5 ميلليون ادامعا جۋىق، ال ەكىنشى كومپونەنتىن 5 ميلليوننان استام ادام سالدىردى. ۆاكسينا سالدىرۋ ناۋقانىن ودان ءارى كۇشەيتۋ قاجەت. ۆەدومستۆوارالىق كوميسسياعا ەپيدەميولوگيالىق جاعداي تۇراقتالىپ جاتقان وڭىرلەردەگى Ashyq جۇيەسىنە قاتىساتىن بيزنەس سۋبەكتىلەرى ءۇشىن دەمالىس كۇنگى شەكتەۋ شارالارىن جەڭىلدەتۋ ماسەلەسىن قاراستىرۋدى تاپسىرامىن»، - دەگەن پرەمەر- مينيستر بۇل جۇمىستاعى جالپى باقىلاۋدى ورىنباسارى ەرالى توعجانوۆقا تاپسىردى.