الەكسەي سوي كۇزدەگى ەپيداحۋالدىڭ جاڭا بولجامىن اتادى

نۇر-سۇلتان. قازاقپارات - ق ر دەنساۋلىق ساقتاۋ ءمينيسترى الەكسەي سوي ۇكىمەت وتىرىسىندا كۇزدەگى ەپيداحۋالدىڭ ءۇش سەناريدەگى ىقتيمال بولجامىن ايتتى، دەپ حابارلايدى قازاقپارات ءتىلشىسى.

«مينيسترلىك قاراشا ايىنا دەيىنگى ەپيدەميولوگيالىق بولجامدى جاڭارتتى. پەسسيميستىك سەناري بويىنشا قىركۇيەك ايىندا 6300 جاعدايعا، قازان ايىندا 2400 جاعداي جەتەدى. شىنايى سەناري بويىنشا قىركۇيەكتە 5400 جاعدايعا، قازاندا 1800 جاعدايعا جەتەدى. وپتيميستىك سەناري جاعدايىندا قىركۇيەكتە 4200 جاعدايعا، قازاندا 1300 جاعدايعا جەتەدى»، - دەدى مينيستر.

سونداي-اق، ۇكىمەت وتىرىسىندا پرەمەر-مينيستر اسقار مامين كوروناۆيرۋس ينفەكتسياسىنىڭ تارالۋىن بولدىرماۋ جونىندەگى ۆەدومستۆوارالىق كوميسسياعا وڭىرلەردە Ashyq جۇيەسىنە قاتىساتىن بيزنەس سۋبەكتىلەرى ءۇشىن دەمالىس كۇنگى شەكتەۋ شارالارىن جەڭىلدەتۋ ماسەلەسىن قاراستىرۋدى تاپسىردى.

«ۆاكسينانىڭ ءبىرىنشى كومپونەنتىن العانداردىڭ سانى 6,5 ميلليون ادامعا جۋىق، ال ەكىنشى كومپونەنتىن 5 ميلليوننان استام ادام سالدىردى. ۆاكسينا سالدىرۋ ناۋقانىن ودان ءارى كۇشەيتۋ قاجەت. ۆەدومستۆوارالىق كوميسسياعا ەپيدەميولوگيالىق جاعداي تۇراقتالىپ جاتقان وڭىرلەردەگى Ashyq جۇيەسىنە قاتىساتىن بيزنەس سۋبەكتىلەرى ءۇشىن دەمالىس كۇنگى شەكتەۋ شارالارىن جەڭىلدەتۋ ماسەلەسىن قاراستىرۋدى تاپسىرامىن»، - دەگەن پرەمەر-مينيستر بۇل جۇمىستاعى جالپى باقىلاۋدى ورىنباسارى ەرالى توعجانوۆقا تاپسىردى.