قازاقستاندىقتار قاتىسقان ارميالىق حالىقارالىق ويىنداردىڭ العاشقى ناتيجەسى بەلگىلى بولدى

نۇر-سۇلتان. قازاقپارات - قازاقستان كومانداسى ارميالىق حالىقارالىق ويىندار شەڭبەرىندە ءوتىپ جاتقان «ەلبرۋس شەڭبەرى» كونكۋرسىندا ءبىرىنشى كەزەڭنىڭ ەكى ارنايى تاپسىرماسىن ورىنداۋ ناتيجەسى بويىنشا ەكىنشى ورىنعا تۇراقتادى.

«ەلبرۋس شەڭبەرى» كونكۋرسىندا رەسەي كومانداسى كوش باستاپ تۇر، دەپ حابارلايدى قازاقپارات ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.

العاشقى كونكۋرستىق سايىستار بارىسىندا قاتىسۋشىلار جاساندى تاۋ بەدەرىنە شابۋىل جاساپ، تاۋلى جەردە باعدارلاۋدى پىسىقتادى. ءبىرىنشى كەزەڭ شەڭبەرىندە جاۋىنگەرلەر تاعى ءۇش ارنايى تاپسىرمانى ورىندايتىن بولادى.

ءۇش كەزەڭنەن تۇراتىن كونكۋرستار بارىسىندا قاتىسۋشىلار ارنايى تاپسىرمالاردى ورىندايدى. ەڭ كۇردەلىسى ەكىنشى كەزەڭ بولماق. وندا اسكەري قىزمەتشىلەر بيىك تاۋ جاعدايىندا مارش جاسايدى.

ال ءۇشىنشى كەزەڭدە ولار ەلبرۋس شىڭىن باعىندىرماق. ونىڭ بيىكتىگى - 5642 مەتر. جارىسقا توعىز ەلدەن كەلگەن كوماندالار قاتىسۋدا.

ولار - ابحازيا، ارمەنيا، ءۇندىستان، قازاقستان، قىتاي، پاكىستان، رەسەي، وزبەكستان جانە وڭتۇستىك وسەتيا.

حالىقارالىق كونكۋرستا ەل نامىسىن قازاقستان قارۋلى كۇشتەرىنىڭ اتىنان تاۋداعى دايارلىق ورتالىعىنىڭ اسكەري الپينيستەرى قورعايدى.

جارىس كاباردين-بالقارداعى (ر ف) «تەرسكول» تاۋداعى پوليگونىندا وتۋدە.