اسحات ايماعامبەتوۆ مەكتەپتەردە مەنەدجمەنت ساپاسىن ارتتىرۋ تۋرالى پىكىر ءبىلدىردى
«تيىمدى مەنەدجمەنتتىڭ ناتيجەسىندە مەكتەپتە كاسىبي ۇجىم مەن وقۋعا ارنالعان قولايلى ورتا قۇرىلادى. سوندىقتان وسى ماسەلەگە نازار اۋدارۋ وتە ماڭىزدى. ءبىر اۋداندا ورنالاسقان ەكى مەكتەپ، بىردەي باعدارلاما بويىنشا جۇمىس ىستەيتىن، بيۋدجەتى، مۇمكىندىكتەرى مەن ينفراقۇرىلىمى دا بىردەي كورشى تۇرعان قوس ءبىلىم ورداسى ەكى بولەك ناتيجە كورسەتەتىن جاعدايلار كەزدەسەدى. زەرتتەۋ ناتيجەلەرىنە سۇيەنسەك، مۇنداي ايىرماشىلىق كوبىنەسە مەكتەپ باسشىسىنا بايلانىستى. ويتكەنى تەك مىقتى ديرەكتور عانا ۇزدىك ناتيجەلەرگە قول جەتكىزەتىن ۇيىمشىل ۇجىم قالىپتاستىرا الادى»، - دەپ جازدى مينيستر Facebook - تەگى پاراقشاسىندا.
ونىڭ ايتۋىنشا، مۇنداي ديرەكتور جۇمىستى ءتيىمدى ۇيىمداستىرىپ، اتا- انالار، وقۋشىلار جانە ءبىلىم بەرۋ قۇرىلىمدارىمەن اشىق جۇمىس ىستەيدى. سونىمەن بىرگە قىزمەتكەرلەردى جىگەرلەندىرىپ، تەك جەتەكشى بولىپ ەمەس، شىعارماشىلىق تۇرعىدا شابىتتاندىرۋشى ءارى كوشباسشى دا بولا بىلەدى.
«بۇگىنگى تاڭدا ءبىز كادر ماسەلەسىنە تاپ بولىپ وتىرمىز. ديرەكتور نەمەسە وقۋ ءىسىنىڭ مەڭگەرۋشىسىنە قويىلاتىن تالاپتارعا سايكەس كەلەتىن، اتالعان لاۋازىمداردا جۇمىس ىستەۋگە نيەتتى مىقتى قىزمەتكەرلەردىڭ قاتارى سيرەپ بارادى، دەگەن اسحات ايماعامبەتوۆ ونىڭ بىرنەشە سەبەبىن ايتىپ بەردى.
«مۇعالىمدەرمەن سالىستىرعاندا ديرەكتورلارعا جاۋاپكەرشىلىك كوبىرەك جۇكتەلىپ، جالاقىنىڭ تومەن بولۋىنا بايلانىستى مىقتى پەداگوگتەر مەكتەپ ديرەكتورى بولعىسى كەلمەي جاتادى. بۇل ماسەلەگە اسەر ەتەتىن باسقا دا ءبىرقاتار سەبەپ بار. سوندىقتان ورتا ءبىلىم بەرۋ ۇيىمدارىنىڭ باسشىلارى قولداۋدى قاجەت ەتەتىنى ءسوزسىز. مەملەكەت باسشىسى قاسىم- جومارت كەمەل ۇلىنىڭ تاپسىرماسى بويىنشا ءبىز مەكتەپ باسشىلىعى لاۋازىمىنا تاعايىنداۋ ءتارتىبى، بىلىكتىلىكتى ارتتىرۋ جۇيەسى، ەڭبەكاقى تولەۋ جانە مەكتەپ ديرەكتورلارىن اتتەستاتتاۋ ءراسىمىن قايتا قاراپ جاتىرمىز. سونداي- اق روتاتسيالاۋدىڭ جاڭا ينستيتۋتى ەنگىزىلىپ جاتىر»، - دەدى ول.
مينيستر بىرنەشە جازباسىندا وسى سۇراقتارعا توقتالىپ، قابىلدانىپ جاتقان شەشىمدەردىڭ سەبەپتەرى مەن ءمان- ماعىناسىن اشىپ ايتۋعا تىرىساتىنىن جەتكىزدى. سونداي- اق، اسحات ايماعامبەتوۆ اتتەستاتتاۋ بويىنشا پىكىر ءبىلدىردى.
«العاش رەت ءبىلىم بەرۋ ۇيىمدارىنىڭ باسشىلارى مەن ولاردىڭ ورىنباسارلارىنا اتتەستاتتاۋ جانە بىلىكتىلىك ساناتىن بەرۋ جۇيەسى ەنگىزىلىپ جاتىر. اتتەستاتتاۋ ءۇش جىلدا ءبىر رەت وتكىزىلىپ، ەكى كەزەڭنەن تۇرادى. ءبىرىنشى كەزەڭدە زاڭناما بويىنشا ءبىلىمىن تەكسەرۋگە ارنالعان جانە باسقارۋشىلىق قۇزىرەتتەرى بويىنشا تەست تاپسىرادى. ەكىنشى كەزەڭدە ءبىلىم بەرۋ ۇيىمدارىنىڭ باسشىلارى بەلگىلى ءبىر ۋاقىتتاعى اتقارعان جۇمىسىنىڭ تيىمدىلىگى باعالانادى. وقۋ مەڭگەرۋشىلەرى ءۇشىن اتتەستاتتاۋ تەستىلەۋسىز تەك ءبىر كەزەڭنەن تۇراتىنىن اتاپ وتكىم كەلەدى»، - دەدى مينيستر.
ونىڭ ايتۋىنشا، اتتەستاتتاۋ ناتيجەلەرى بويىنشا كوميسسيا اتقاراتىن لاۋازىمىنا سايكەستىگى/سايكەس ەمەستىگى تۋرالى جانە ءۇش ساناتتىڭ بىرەۋىن بەرۋ تۋرالى شەشىم قابىلدايدى. ياعني، لاۋازىمىنا سايكەستىگى بەلگىلى بولسا، ديرەكتورعا سانات بەرىلەدى. كەرىسىنشە، لاۋازىمعا سايكەس ەمەس بولسا، ديرەكتور جۇمىستان بوساتىلۋى مۇمكىن. بەرىلگەن ساناتقا بايلانىستى ديرەكتور نەمەسە وقۋ ءىسىنىڭ مەڭگەرۋشىسى سانات ءۇشىن لاۋازىمدىق جالاقىدان %30، %70، %100 مولشەرىندە قوسىمشا اقى الاتىن بولادى. سونىمەن قاتار مەكتەپ ديرەكتورى مەن ونىڭ ورىنباسارلارىنىڭ لاۋازىمدىق جالاقىسى جىل سايىن %25 عا ارتادى.
«بۇل شارالاردىڭ بارلىعى مەكتەپ باسشىلىعىنىڭ جالاقىسىن مۇعالىمدەردىڭ ورتاشا جالاقىسىنىڭ دەڭگەيىنە جاقىنداتۋعا مۇمكىندىك بەرەدى. دەگەنمەن، قابىلدانىپ جاتقان بۇل شارالار مەكتەپ باسشىسى لاۋازىمىنا ەڭ مىقتى مامانداردى تارتۋ ءۇشىن جەتكىلىكسىز. باسشىلارعا ەڭبەكاقى تولەۋ جۇيەسىندە بۇرىن- سوڭدى ىنتالاندىرۋشى فاكتورلار بولعان جوق. كوشباسشىنىڭ جالاقىسى ونىڭ ءتيىمدى نەمەسە ءتيىمسىز بولۋىنا بايلانىسسىز بىردەي بولاتىن. سونىمەن قاتار مەكتەپتە 80 بالا وقيتىن ءبىلىم ورداسىنىڭ ديرەكتورى مەن 1200 بالا ءبىلىم الاتىن مەكتەپ ديرەكتورى بىردەي جالاقى الادى. ءقازىر ءبىز اتتەستاتتاۋدى جانە جۇمىس تيىمدىلىگى ءۇشىن قوسىمشا اقى تولەۋ جۇيەسىن ەنگىزىپ جاتىرمىز. سونداي- اق مەكتەپتىڭ جوبالىق قۋاتتىلىعىنا بايلانىستى لاۋازىمدىق جالاقىنى ديففەرەنتسيالاۋدى ەنگىزۋ جوسپاردا بار. سوندىقتان الداعى ۋاقىتتا دا ءبىز مەكتەپتەردى ەڭ مىقتى پەداگوگتەردىڭ باسقارۋى ءۇشىن شارالار ۇسىناتىن بولامىز»، - دەدى اسحات ايماعامبەتوۆ.
ول مەكتەپ ديرەكتورلارىن ىرىكتەۋ، تاعايىنداۋ جانە ولاردى روتاتسيالاۋ جۇيەسى دە ماڭىزدى ەكەنىن ايتتى. ۇزاق تالقىلاۋلاردان كەيىن وسى جۇيەگە ەنگىزىلەتىن ەلەۋلى وزگەرىستەردى دايىنداعانىن جەيتكىزدى.
«بۇل تۋرالى كەلەسى جازبامدا تولىعىراق ايتامىن»، دەپ ۋادە بەردى.
