ق ر س ءى م اۋعانستانداعى جاعداي بويىنشا مالىمدەمە جاسادى

نۇر- سۇلتان. قازاقپارات - قازاقستان اۋعانستانداعى جاعدايدىڭ دامۋ بارىسىن مۇقيات قاداعالاپ وتىر. اتالعان ەلدىڭ تاريحىندا تاعى ءبىر شەشۋشى ءسات كەلە جاتىر.

كوپجىلدىق جانجالدى اۋعان حالقى ءوزى شەشۋى كەرەك، دەپ حابارلايدى قازاقپارات.

ق ر سىرتقى ىستەر مينيسترلىگىنىڭ باسپا ءسوز قىزمەتىنىڭ حابارلاۋىنشا، قازاقستان بارلىق تاراپتاردى ىشكى تۇراقتاندىرۋدىڭ باستى العىشارتى رەتىندە بيلىكتىڭ بەيبىت ترانزيتىن قامتاماسىز ەتۋگە شاقىرادى.

«ءبىز ب ۇ ۇ قاۋىپسىزدىك كەڭەسىنىڭ ينكليۋزيۆتى جانە وكىلدىك ۇكىمەت قۇرۋ، ۇلتتىق ازشىلىقتار مەن ايەلدەردىڭ قۇقىقتارىن قۇرمەتتەۋ، باسقا مەملەكەتتەرگە قاۋىپ توندىرەتىن توپتاردىڭ بولۋىنا جول بەرمەۋ، حالىقارالىق قۇقىقتى ساقتاۋ تۋرالى مالىمدەمەسىن قولدايمىز. وسى ەرەجەلەردى ورىنداۋ اۋعانستاننىڭ جاڭا بيلىگىمەن ديالوگتى باستاۋ ءۇشىن قاجەتتى شارت بولۋى ءتيىس»، - دەلىنگەن مينيسترلىكتىڭ مالىمدەمەسىندە.