اۋعانستان قازاقتارى قازاقستاننان كومەك سۇرايدى

نۇر-سۇلتان.قازاقپارات - ازاتتىق ءتىلشىسى سويلەسكەن اۋعانستانداعى قازاقتار دا ەلدى ۇرەي بيلەگەنىن، قورقىنىشتا ءومىر ءسۇرىپ جاتقاندارىن ايتادى.

قازاقستاندا جانە بىرنەشە ەلدە تەرروريستىك ۇيىم دەپ تانىلعان «تاليبان» قوزعالىسى اۋعانستانعا باقىلاۋ ورناتتى. ازاتتىق ءتىلشىسى سويلەسكەن اۋعانستان قازاقتارى ۇرەي ۇستىندە وتىرعاندارىن ايتىپ، قازاقستاننان جاردەم سۇرايدى، - دەپ جازادى ازاتتىق راديوسى.

«تاليبان» 15-تامىزدا اۋعانستان استاناسى كابۋلدى ۇرىسسىز الىپ، پرەزيدەنت سارايىنا كىردى. پرەزيدەنت اشراف عاني اۋعانستاننان شىعىپ كەتتى. قازىر ەلدە دۇربەلەڭ بولىپ جاتىر.

اۋعانستاننىڭ تالىپتەردەن سەسكەنگەن حالقى ەلدەن كەتۋدىڭ بارلىق جولىن ىزدەپ جاتىر. ينتەرنەتتە تاراعان ۆيدەولاردا كابۋل اۋەجايىنا اعىلعان جۇرتتى، ۇشاقتارعا جانتالاسا كىرۋگە تىرىسىپ جاتقان ادامداردى بايقاۋعا بولادى.

ازاتتىق ءتىلشىسى سويلەسكەن اۋعانستانداعى قازاقتار دا ەلدى ۇرەي بيلەگەنىن، قورقىنىشتا ءومىر ءسۇرىپ جاتقاندارىن ايتادى.

«مەكتەپتە ساباق بولمايدى»

«تاليبان» باقىلاۋ ورناتقان قۇندىز قالاسىنىڭ تۇرعىنى 32 جاستاعى ق. (قاۋىپسىزدىگى ءۇشىن اتى- ءجونى كورسەتىلمەدى - رەد. ) «كۇندىز ۇيدەن شىعا المايمىز، تىعىلىپ جاتامىز» دەيدى. مەكتەپ جاسىنداعى ەكى قىز، ءبىر ۇلى بارىن ايتقان قالا تۇرعىنى ەندى ساباق بولمايدى دەپ كۇرسىنەدى.

- قازىر كوشەدە تىنىش. ەشقانداي اتىس- شابىس جوق. ءبىراق مەكتەپ، بانك، دۇكەندەردىڭ ءبارى جانىپ كەتتى. ەندى مەكتەپتە ساباق بولمايدى. كەشكە قالانى تالىپتەر ارالاپ جۇرەدى. ولار ۇرىپ- سوعادى، - دەيدى ول.

قۇندىزدا تۇراتىن قازاق «تاليبان» سودىرلارى وزگە ۇلت وكىلدەرىنە دە قىسىم جاسايتىنىن ايتادى.

- اۋعانستاندا تالىپتەردىڭ قولىندا قالدىق. قۇندىزدا ون بەستەي عانا قازاق وتباسى بار. ءبارىمىز ۇرەيلەنىپ وتىرمىز. وزبەكشە سويلەيمىز، قازاق ءتىلىن ۇمىتتىق. تالىپتەر ۇرادى، سوعادى. «قازاق بولساڭ، اۋعانستاننان كەت. بۇل جەردە نە شارۋاڭ بار؟ « دەيدى. اۋعانستاندا قىمباتشىلىق. كۇنىمىزدى ارەڭ كورىپ وتىرمىز. ال تالىپتەر «نان بەر» دەپ كەلەدى. بىزگە تىنىشتىق بەرەر ەمەس، - دەگەن ول قازاقستاننان جاردەم سۇرادى.

اۋعانستان قازاعى قولىندا قۇجاتى، يا ازاماتتىعى جوعىن، قۇجات جاساتۋ ءۇشىن «تاليبان» باقىلاۋىنداعى كابۋلعا بارۋ كەرەگىن ايتادى.

- قازىر ادامدار وزبەكستانعا، تاجىكستانعا، يرانعا قاشىپ جاتىر. ال قازاقتار ەشقايدا كەتە الماي وتىر. ەشكىم بىزدەن حابار المادى. قولىمىزدا جەكە كۋالىك جوق. بىزگە ازاماتتىق تا بەرمەدى. الىستاعى كابۋلعا جەتە المايمىز. قولعا تۇسسەك، سوعىسقا اكەتەدى، - دەيدى ول.

«كومەكتەسىڭىزدەرشى!»

قۇندىز قالاسىندا تۇراتىن تاعى ءبىر قازاق 45 جاستاعى ح. (قاۋىپسىزدىگى ءۇشىن اتى- ءجونى كورسەتىلمەدى - رەد. ) ەكى بالاسى جانە كارى اناسىمەن تالىپتەردەن قاشىپ، جاسىرىنىپ ءجۇر. تالىپتەر قۇندىزعا شابۋىل جاساعاندا كاسىپ قىلىپ وتىرعان دۇكەنى ورتەنىپ كەتكەنىن ايتادى.

- اكەم دە، شەشەم دە قازاق. تالىپتەر ءبىزدى قۋعىنداپ جاتىر. جاسىرىنىپ ءجۇرمىز. ءبىز سەكىلدى قاشىپ جۇرگەندەر وتە كوپ. كابۋلداعى قازاقستان ەلشىلىگىنەن كومەك سۇرايىق دەسەك، ول جەر الىس. جولدا تالىپتەردىڭ قولىنا ءتۇسىپ قالامىز با دەپ قورقامىن. كومەكتەسىڭىزدەرشى، - دەدى ول WhatsApp ارقىلى ازاتتىققا جولداعان اۋديوسىندا.

بۇدان بولەك، قازاقستانداعى كەيبىر قازاقتار دا اۋعانستاندا قالعان تۋىستارىنىڭ ومىرىنە الاڭداپ وتىر. ماسەلەن، الماتى وبلىسى قاراساي اۋدانىندا تۇراتىن يبادۋللا تۇراپتىڭ ەكى اعاسى مەن ءۇش قارىنداسى كابۋلدا قالىپ قويعان.

- ءبىر اكەدەن تاراعان توعىز بالانىڭ بەسەۋى اۋعانستاندا. اۋعانستانداعى جاعدايدى ەستىگەن بولارسىز. جاعداي قيىن. ءبىزدى الىپ كەتىڭدەر دەپ جاتىر. ولاردى قالاي الىپ كەتەمىز؟ ءوزىمىزدىڭ كەلگەنىمىزگە دە التى جىل بولسا دا ءالى كۇنگە قازاقستان ازاماتتىعىن الا الماي ءجۇرمىز، - دەيدى يبادۋللا.

يبادۋللانىڭ اۋعانستاندا اكەسىمەن بىرگە تۋىساتىن باسقا دا تۋىستارى بار. سونىڭ ءبىرى وسىدان بىرنەشە اپتا بۇرىن بازارعا بارعاندا وق ءتيىپ قايتىس بولعان.

aikyn.kz