ۇلتتىق تەستىلەۋ ورتالىعى ۇ ب ت- داعى داۋ- داماي بويىنشا قوسىمشا مالىمەتتەردى جاريالادى

نۇر- سۇلتان. قازاقپارات - ۇلتتىق تەستىلەۋ ورتالىعى سوڭعى كەزدە قوعامدا داۋ تۋدىرعان ۇ ب ت تاپسىرۋ كەزىندە ەرەجەلەردى بۇزۋعا قاتىستى قوسىمشا مالىمەتتەردى جاريالادى، دەپ حابارلايدى قازاقپارات ءبىلىم جانە عىلىم مينيسترلىگىنىڭ باسپا ءسوز قىزمەتىنە سىلتەمە جاساپ.

ءباسپاسوز قىزمەتىنىڭ مالىمەتىنشە، بۇعان دەيىن ۇلتتىق تەستىلەۋ ورتالىعى ەلوردالىق ەكى جوعارى وقۋ ورنىنىڭ ءتورت ستۋدەنتى ۇ ب ت كەزىندە 4 تالاپكەردىڭ ورنىنا تەستىلەۋ تاپسىرماق بولعانى تۋرالى حابارلاعان.

ايتا كەتەيىك، ورتالىق قىزمەتكەرلەرى بۇل ارەكەتتىڭ الدىن الىپ، پوليسياعا جۇگىنگەن. ياعني، تالاپكەرلەر تەستىلەۋگە جىبەرىلمەي، ورتالىق قىزمەتكەرلەرى بۇزۋشىلىقتاردى دەر كەزىندە انىقتادى.

«ەرەجەلەردى ورەسكەل بۇزۋعا قاتىسى بار ادامدار بويىنشا بارلىق دەرەك ءىستىڭ ءمان- جايىن انىقتاۋ جانە ودان ءارى زەردەلەۋ ءۇشىن قۇقىق قورعاۋ ورگاندارىنا جىبەرىلدى. دەگەنمەن، ۇلتتىق تەستىلەۋ ورتالىعى تاراپىنان ەرەجەنى ورەسكەل بۇزعان تەستىلەنۋشىلەردىڭ اتا- انالارى تۋرالى اقپارات انىقتالمادى جانە تالاپكەرلەردىڭ اتى- جوندەرى جاريالانعان جوق. ويتكەنى ورىن العان جاعداي بالالارعا قاتىستى بولىپ وتىر»، دەلىنگەن حابارلامادا.

مينيسترلىكتىڭ مالىمەتىنشە، بيىل ۇ ب ت تاپسىرۋ ورتالىقتارىندا تالاپكەردى تەستىلەۋگە كىرگىزۋ كەزىندە ءۇش ساتىلى جۇيە ەنگىزىلگەن. ياعني، تەستىلەنۋشى جەكە كۋالىگىن كورسەتتى، Face-ID جۇيەسىنەن ءوتتى جانە ۇبت بارىسىندا ءاربىر قاتىسۋشىنىڭ الدىندا كامەرا ورناتىلدى. بۇل شارالاردىڭ بارلىعى بۇزۋشىلىقتاردىڭ الدىن الۋعا جانە ۇلتتىق ءبىرىڭعاي تەستىلەۋدى تاپسىرۋ ءراسىمىنىڭ اشىقتىعىن قامتاماسىز ەتۋگە باعىتتالعان.

«ماسەلەن، ەگەر وتكەن جىلى ۇ ب ت تاپسىرۋعا تالپىنعان بوگدە تۇلعالار بويىنشا 7 فاكتى انىقتالسا، بيىل باقىلاۋدى كۇشەيتۋدىڭ ارقاسىندا 18 جاعداي تىركەلدى. بۇل تۋرالى بۇعان دەيىن ۇلتتىق تەستىلەۋ ورتالىعىنىڭ وكىلدەرى جۇرتشىلىققا حابارلاعان بولاتىن. سونىمەن بىرگە ەكى جىل بۇرىن ۇ ب ت وتكىزۋ ەرەجەلەرىنە وزگەرىستەر ەنگىزىلدى. ولاردىڭ قاتارىندا، تىيىم سالىنعان زاتتاردى الىپ وتۋگە تىرىسقانى ءۇشىن تالاپكەردى تەستىلەۋگە جىبەرمەۋ جانە بەينە جازبانى زەردەلەۋ بارىسىندا ەرەجەلەردى بۇزۋ جاعدايى انىقتالعان كەزدە تەستىلەۋ ناتيجەلەرىن جويۋ»، دەلىنگەن حابارلامادا.

ۆەدومستۆونىڭ مالىمدەۋىنشە، ۇ ب ت- نى وتكىزۋ ەرەجەسىنە وزگەرىس ەنگىزىلۋى ۇ ب ت- عا تىيىم سالىنعان زاتتاردى الىپ ءوتۋ ارەكەتتەرى مەن ۇب ت وتكىزۋ ەرەجەسىن بۇزۋدىڭ ازايۋىنا الىپ كەلدى.

«ماسەلەن، 2019 -جىلى تەستىلەۋگە كىرگىزۋ كەزىندە 128 مىڭ تىيىم سالىنعان زات انىقتالسا، تەك 24 تالاپكەردىڭ عانا ناتيجەسى جويىلعان. ال، 2020 -جىلى بەلگىلەنگەن ەرەجەلەرگە سايكەس تىيىم سالىنعان زاتتاردى الىپ كىرۋگە تىرىسقانى ءۇشىن عانا 2522 ۇمىتكەردىڭ ناتيجەسى جويىلدى. بيىل تىيىم سالىنعان زاتتاردى الىپ كىرۋگە تىرىسقاندار سانى 756 عا دەيىن ازايدى»، دەلىنگەن حابارلامادا.

بۇل - ەرەجەنى بۇزعان قاتىسۋشىلاردى تەستىلەۋگە جىبەرمەۋ تۋرالى وتكەن جىلى ەنگىزىلگەن نورماعا، سونداي- اق ءاربىر تەستىلەنۋشىنىڭ الدىندا بەينە باقىلاۋ كامەرالارىنىڭ ورناتىلۋىنا بايلانىستى بولىپ وتىر.

سونىمەن قاتار بيىل تەستىلەۋ كەزىندە ەرەجەلەردى بۇزعانى ءۇشىن 1305 ادام اۋديتوريادان شىعارىلدى، ولاردىڭ ناتيجەلەرى جويىلدى. بۇدان باسقا، ۇ ب ت اياقتالعاننان كەيىن دە ۇلتتىق تەستىلەۋ ورتالىعىنىڭ قىزمەتكەرلەرى بارلىق تالاپكەردىڭ تەستىلەۋ تاپسىرعانى بويىنشا بەينە جازبالاردى تالدايدى.

ءبىرىنشى كەزەكتە، 100 دەن استام بالل جيناعان، سونىمەن بىرگە ناۋرىز ايىندا سىناق تەستىلەۋ مەن مامىر ايىنداعى تەستىلەۋدى تاپسىرۋ كەزىندە ناتيجەلەرى ايتارلىقتاي ەرەكشەلەنەتىن تالاپكەرلەردىڭ بەينە جازبالارى قارالادى. ءارى قاراي باسقا بەينە جازبالار بويىنشا تالداۋ جۇرگىزىلەدى. بيىل بەينە جازبالاردى تالداۋ بارىسىندا 19 تالاپكەردىڭ ناتيجەسى جويىلعان بولاتىن. سايكەسىنشە، ول تالاپكەرلەر ءبىلىم گرانتىنا ۇمىتتەنە المايدى.

بۇل باعىتتاعى جۇمىس قازىر دە جۇرگىزىلىپ جاتىر. سوندىقتان ۇقساس جاعدايلار انىقتالعان كەزدە تالاپكەرلەردىڭ ناتيجەلەرى جويىلىپ، تاعايىندالعان ءبىلىم گرانتتارىنان دا ايىرىلادى.

ايتا كەتەيىك، ۇلتتىق تەستىلەۋ ورتالىعىنىڭ قىزمەتكەرلەرى ۇ ب ت وتكىزۋ كەزىندە ەرەجەلەردى بۇزۋ فاكتىلەرى تۋرالى جۇرتشىلىقتى ۇنەمى حاباردار ەتىپ وتىرادى جانە جاعدايدى انىقتاۋ ءۇشىن قۇقىق قورعاۋ ورگاندارىنا اقپارات بەرەدى.

«بۇگىن ۇ ب ت- دان ءوتۋ ءۇشىن ءتۇرلى قۋلىقتارعا باراتىن تالاپكەر ەرتەڭ دارىگەر، ءمۇعالىم نەمەسە قۇتقارۋشى بولا وتىرىپ، ءوز جۇمىسىن ادال اتقارماۋى مۇمكىن. وسىعان بايلانىستى تالاپكەرلەر مەن ولاردىڭ اتا- انالارىن اكادەميالىق ادالدىققا شاقىرامىز. ۇ ب ت تاپسىرۋ كەزىندە اشىقتىقتى قامتاماسىز ەتۋ بويىنشا جۇمىستار ودان ءارى جالعاساتىن بولادى. الەمدىك تاجىريبە كورسەتىپ وتىرعانداي، باسقا ەلدەردە ءتارتىپ بۇزۋشىلارعا قاتىستى ودان دا قاتاڭ شارالار قولدانىلادى»، - دەدى ق ر ب ع م ۇلتتىق تەستىلەۋ ورتالىعى ديرەكتورىنىڭ م. ا. ناۋجان ديداربەكوۆا.

ەسكە سالا كەتسەك، الەۋمەتتىك جەلىدە ۇ ب ت تاپسىرۋ كەزىندە زاڭ بۇزعان 19 تالاپكەردىڭ اراسىندا شوۋمەن تۇرسىنبەك قاباتوۆتىڭ قىزى ادەمى امانعالي دا بار دەگەن اقپارات تاراعان بولاتىن.

تانىمال ءارتىس Instagram پاراقشاسىندا وسى شۋعا بايلانىستى مالىمدەمە جاسادى. شوۋمەننىڭ قىزىنىڭ ورنىنا ۇ ب ت تاپسىرماق بولعان قىز «ەۋرازيا ۇلتتىق ۋنيۆەرسيتەتىنىڭ ستۋدەنتى» دەپ حابارلاندى. الايدا اتالمىش ج و و- نىڭ باسپا ءسوز قىزمەتى «سىمبات قانايدىڭ ە ۇ ۋ ستۋدەنتى ەكەندىگى» تۋرالى اقپاراتتى جوققا شىعاردى.