قاسىم- جومارت توقايەۆتىڭ وڭتۇستىك كورەياعا مەملەكەتتىك ساپارىنان ۆيدەو جاريالاندى
ۆيدەونى پرەزيدەنتتىڭ باسپا ءسوز حاتشىسى بەرىك ءۋالي Facebook پاراقشاسىندا جاريالادى. ۇزىندىدەن قازاقستان باسشىسىن وڭتۇستىك كورەيا تاراپى قالاي قارسى العانىن كورۋگە بولادى.
ەسكە سالساق، پرەزيدەنت قاسىم- جومارت توقايەۆتىڭ كورەيا رەسپۋبليكاسىنا مەملەكەتتىك ساپارى كوك ۇيدەگى رەسمي راسىمنەن باستالدى. قازاقستان پرەزيدەنتىن وڭتۇستىك كورەيا پرەزيدەنتى مۋن چجە ين سالتاناتتى تۇردە قارسى الىپ، قۇرمەت كورسەتتى. ساپار اياسىندا قازاقستان پرەزيدەنتى كورەيانىڭ ۇلتتىق باتىرى حون بوم دونىڭ قۇرمەتىنە وراي وتكەن راسىمگە قاتىستى.
وڭتۇستىك كورەيا پرەزيدەنتىنىڭ رەزيدەنتسياسىندا وتكەن ەكىجاقتى كەزدەسۋدە تاراپتار قازاق- كورەي ستراتەگيالىق ارىپتەستىگىن ودان ارى دامىتۋدىڭ پەرسپەكتيۆالارىن جان- جاقتى تالقىلادى. سونىمەن قاتار مەملەكەتتەر باسشىلارى عالامدىق جانە ايماقتىق وزەكتى ماسەلەلەردى قاراستىرىپ، حالىقارالىق قۇرىلىمدارداعى ءوزارا ىنتىماقتاستىقتى تالقىلادى.
قاسىم- جومارت توقايەۆ پرەزيدەنت مۋن چجە ينگە كورەي جەرىندە كورسەتىلگەن قۇرمەت پەن قوناقجايلىعى ءۇشىن ريزاشىلىعىن ءبىلدىردى. مەملەكەت باسشىسى 2019 -جىلى نۇر- سۇلتان قالاسىندا وتكەن كەزدەسۋدىڭ قازاق- كورەي قارىم- قاتىناسىنا تىڭ سەرپىن بەرگەنىن ايتتى.
وسى كەزدەسۋدەن كەيىن قوس ەلدىڭ پرەزيەنتتەرى قاسىم- جومارت توقايەۆ پەن مۋن چجە ين باق وكىلدەرى ءۇشىن بريفينگ وتكىزدى.
«ەكى ەلدىڭ اراسى الشاق بولعانىمەن، حالىقتارىمىز - تاعدىرلاس. كورەيا - قازاقستاننىڭ شىعىس ازياداعى ستراتەگيالىق سەرىكتەسىنىڭ ءبىرى. قازىر سان سالالى بايلانىسىمىز قارقىندى دامىپ كەلە جاتىر. ءبىز بۇگىن وسى قارىم- قاتىناستى جاڭا دەڭگەيگە كوتەرۋ ءۇشىن ءوزارا سەنىم مەن قولداۋعا نەگىزدەلگەن كەلىسسوزدەر جۇرگىزدىك. ىقپالداستىقتىڭ تىڭ باعىتتارىن ايقىندادىق، - دەدى قازاقستان پرەزيدەنتى.
اۆتور: ەسىمجان ناقتىباي
