اتىراۋعا سيرەك كەزدەسەتىن سارى ءتۇستى قۇتان كەلدى
جايىق وزەنىنىڭ جاعالاۋىندا سەرۋەندەپ جۇرگەن جەرگىلىكتى تۇرعىن يۋليا ۆاحميستروۆا سارى ءتۇستى قۇتاندى بايقاپ، سۋرەتكە تۇسىرگەن.
«تابيعات اياسىنا، اسىرەسە وزەن جاعاسىنا ءجيى سەرۋەنگە شىعىپ تۇرامىن. ءبىراق، بۇرىن مۇنداي قۇستى كەزدەستىرمەگەن ەدىم. بۇل جولى جايىق وزەنىنىڭ سول جاعالاۋىنان سارى ءتۇستى قۇتاندى كوردىم. باستاپقىدا تاڭدانعانىم راس»، - دەيدى يۋليا ۆاحميستروۆا.
جەرگىلىكتى ەكولوگ، «گلوبۋس» ۇ ە ۇ- نىڭ جەتەكشىسى گالينا چەرنوۆانىڭ پىكىرىنشە، بۇل - سۋلى- باتپاقتى جەردە جۇرەتىن قۇس.
«سارى ءتۇستى قۇتان مىسىردان كەلۋى مۇمكىن. ءبىزدىڭ وڭىردە سيرەك كەزدەسەتىن بۇل قۇستىڭ جيرەن تۇستەس ءتۇرى بار. الايدا، سارى قۇتانعا قاراعاندا ۇلكەنىرەك بولادى»، - دەيدى گ. چەرنوۆا.
ەسكە سالا كەتەلىك، بۇدان بۇرىن اتىراۋ وبلىسىندا سيرەك كەزدەسەتىن قۇس تابىلعانىن جازعان بولاتىنبىز.
