سپورت سالاسىنا شۇعىل رەفورما قاجەت - ق ر مەملەكەتتىك حاتشىسى

نۇر-سۇلتان. قازاقپارات – ق ر مەملەكەتتىك حاتشىسى قىرىمبەك كوشەربايەۆ ەلىمىزدىڭ سپورت سالاسىنا كەزەك كۇتتىرمەس رەفورمانىڭ قاجەتتىگىن العا تارتتى، دەپ حابارلايدى قازاقپارات ءتىلشىسى.

«ق ر پرەزيدەنتى قاسىم-جومارت توقايەۆ سىزدەردىڭ ەل الدىنداعى ەڭبەكتەرىڭىز بەن وليمپياداداعى جەتىستىكتەرىڭىزدى ەسكەرىپ، مەملەكەتتىك ناگرادالارمەن ماراپاتتاۋ تۋرالى جارلىق قابىلدادى. بۇل ەڭبەكتىڭ ەلەنگەنى، توگىلگەن تەردىڭ وتەۋى دەپ بىلەمىز. ماراپاتتارىڭىز قۇتتى بولسىن! وسى ورايدا ءبىر ماسەلەنى ايتپاي كەتۋگە بولمايدى دەپ ويلايمىن، توكيو وليمپياداسى ەلىمىزدەگى سپورت سالاسىنىڭ شىنايى بەت-بەينەسىن اشىپ، ونداعى احۋالدىڭ قانداي ەكەنىن اشىق كورسەتتى. سپورت سالاسىنا شۇعىل رەفورما قاجەتتىگى كورىنىپ تۇر. بىردە-ءبىر سپورتشىنىڭ التىن نەمەسە كۇمىس جۇلدەگە قول جەتكىزە الماۋى بۇرىن- سوڭدى بولماعان جاعداي. جالپى كوماندالىق ەسەپتە 83-ورىندى مىسە تۇتۋ ءبىزدىڭ ەلىمىز ءۇشىن ارينە سىن»، - دەدى قىرىمبەك كوشەربايەۆ.

ونىڭ ايتۋىنشا، توكيو وليمپياداسىنا قاتىستى جانكۇيەرلەردىڭ سىن- ەسكەرتپەلەرى مەن حالىقتىڭ تالابى ورىندى.

«سوندىقتان توكيو وليمپياداسىنان ساباق الىپ، قورىتىندى شىعارۋىمىز قاجەت. مەملەكەت باسشىسى قاسىم-جومارت توقايەۆ ۇلتتىق قۇرامانىڭ بۇل كورسەتكىشى قازاقستاننىڭ سپورتتىق الەۋەتىنە جانە مەملەكەت تاراپىنان سپورتتى دامىتۋعا ءبولىنىپ وتىرعان مول قاراجاتقا سايكەس كەلمەيدى دەپ ناقتى ايتتى. مەملەكەت سپورتتى وركەندەتۋ ءۇشىن، سپورتشىلارىمىزدىڭ الەمدىك ارەنادا قازاقستاننىڭ نامىسىن ابىرويمەن قورعاۋى ءۇشىن بار جاعدايدى جاساپ وتىر، قارجى ۋاقىتىلى بولىنەدى، وقۋ- جاتتىعۋ جيىندارى دەر كەزىندە ۇيىمداستىرىلادى. ۇلتتىق قۇراما مۇشەلەرىنىڭ ماتەريالدىق تۇرعىدان تاپشىلىق كورگەن كەزى جوق. سپورتتىق ينفراقۇرىلىم جىل سايىن جاڭارىپ كەلەدى، دەگەنمەن ناتيجە ءالى تومەن»، - دەدى ق. كوشەربايەۆ.

بۇعان دەيىن حابارلاعانىمىزداي، ق ر مەملەكەتتىك حاتشىسى توكيو-2020 وليمپياداسىنىڭ جەڭىمپازدارىن جەڭىسىمەن قۇتتىقتاپ، ق ر پرەزيدەنتى قاسىم-جومارت توقايەۆتىڭ اتىنان ءبىرقاتار مەملەكەتتىك ناگرادالاردى تابىس ەتتى.