مەسسي اسەرى: الەمدىك فۋتبولدىڭ اڭىز ادامى «پ س ج- نى» بايىتادى

پاريج. قازاقپارات - ليونەل مەسسيدىڭ «پاري سەن- جەرمەن» (پ س ج) فرانسۋز فۋتبول كلۋبىنا ءوتۋى جۇرتتى شۋلاتتى.

جانكۇيەرلەر مەسسي بەينەلەنگەن كلۋبتىڭ اتريبۋتيكاسىن ساتىپ الۋ ءۇشىن كەزەككە تۇرىپ جاتىر، دەپ حابارلايدى قازاقپارات Reuters-كە سىلتەمە جاساپ.

ارگەنتينالىق فۋتبولشىنىڭ سۋرەتى بەينەلەنگەن كلۋب فۋتبولكالارى پاريجدەگى «پ س ج- نىڭ» دۇكەنىندە ساتىلىپ جاتىر. الەۋمەتتىك جەلى قولدانۋشىلارى جاڭا كلۋبتىڭ اككاۋنتىنا ميلليونداپ جازىلۋدا. ال، «پ س ج- نىڭ» مەسسي قاتىساتىن ماتچتارىن كورسەتۋ قۇقىعىن ساتىپ الۋ ۇلكەن تابىس اكەلەدى. ليونەل مەسسيدىڭ پاريجگە كەلۋى اقشا اعىمىنا ىقپال ەتۋدە.

«پ س ج» ءتوراعاسى ناسسەر ال- حەلايفي سارسەنبى كۇنى جۋرناليستەرگە 34 جاستاعى التى دۇركىن «التىن دوپ» يەسىنىڭ كلۋبقا اكەلەتىن تابىسىنا ادامداردىڭ تاڭعالاتىنىن ءمالىم ەتتى. پاريجدىڭ ورتالىعىنداعى «پ س ج» دۇكەنىندە ءبىر جانكۇيەردىڭ مەسسيدىڭ سۋرەتى بار 165 ەۋرو (194 دوللار) تۇراتىن فۋتبولكانى ساتىپ الۋ ءۇشىن ەكى ساعات كەزەكتە تۇرعان. مەن ونى ساتىپ العىم كەلدى. بۇل پ س ج- عا كوپ اقشا اكەلسە، جانكۇيەرلەرگە - قۋانىش سىيلايدى. ءبارى دە باقىتتى بولادى»، - دەدى 18 جاستاعى دجوناتان مسيەد Reuters-كە.

سپورت ماركەتينگى جونىندەگى ساراپشى ۆەنسان شودەلدىڭ ايتۋىنشا، Amazon كومپانياسى دا تابىسقا كەنەلمەك. بۇل كومپانيا وسى جىلدىڭ ماۋسىم ايىندا جوعارى فرانسۋز فۋتبول ديۆيزيونىنىڭ % 80 ماتچىن ترانسلياتسيالاۋ قۇقىعىن جەڭىپ العان.

«Amazon كومپانياسىن لوتەرەيا ۇتىپ الدى دەسەك بولادى. مەسسيدىڭ قاتىسۋىمەن وتەتىن وسىنشا ماتچتى از اقشاعا كورسەتۋ - ۇلكەن جەڭىس. ەكىنشى جەڭىمپاز - «پ س ج». ول الەمنىڭ ءىرى كلۋبتارى اراسىندا ءوز ورنىن نىعايتپاقشى»، - دەپ اتاپ ءوتتى شودەل.

ايتا كەتەيىك، ءوز مانسابىندا تەك «بارسەلونادا» ويناعان مەسسي كەلىسىمشارتتى ۇزارتۋ تۋرالى كەلىسىمگە كەلە الماعاندىقتان كاتالوندىق كلۋبتان كەتۋگە ءماجبۇر بولعان ەدى. كوپ ۇزاماي ونىڭ جاڭا كلۋبقا قاتىستى ءوز تاڭداۋىن جاساعانى تۋرالى اقپارات تاراتىلدى. 34 جاستاعى فۋتبولشى «بارسامەن» 36 تۋرنيردە جەڭىسكە جەتىپ، 672 گول سوقتى. مەسسي وتكەن جىلى جازدا «بارسەلونادان» كەتپەكشى بولدى، ءبىراق كلۋب ونى جىبەرگەن جوق. وسى جىلدىڭ 1- شىلدەسىندە ول بوس اگەنت اتاندى. سەنبى كۇنى مەسسي كلۋبپەن كوزىنە جاس الىپ قوشتاسىپ، جانكۇيەرلەرى مەن كلۋبتاعى ارىپتەستەرىنە العىس ايتتى.

اۆتور: اقبوپە ءابدراسۋل