الماتىدا كوروناۆيرۋس جۇقتىرعان قانشا ناۋقاس اۋرۋحانادا جاتقانى ءمالىم بولدى
بۇل تۋرالى قالالىق قوعامدىق دەنساۋلىق باسقارماسىنان ءمالىم ەتتى، دەپ حابارلايدى قازاقپارات ءتىلشىسى.
11-تامىز كۇنگى اقپارات بويىنشا، ءبىر تاۋلىكتە قالادا 1510 ادام كوروناۆيرۋس جۇقتىرعان. مۇنىڭ ىشىندە سيمپتومدى، جەڭىل جانە ورتاشا دەڭگەيدەگى بەلگىلەرمەن - 1430، سيمپتومسىز - 80 ناۋقاس تىركەلدى. بارلىق ەمدەلىپ شىققاندار - 455، كەلىپ تۇسكەنى - 778.
«ينفەكتسيالىق ستاتسيونارلاردا 5805 ادام بار (توسەك- ورىننىڭ جالپى سانى - 8910)، ونىڭ ىشىندە 235 بالا ەمدەلۋدە»، - دەپ ناقتىلادى قوعامدىق دەنساۋلىق باسقارماسىنىڭ باسپا ءسوز قىزمەتىنەن.
سونداي-اق، رەانيماتسيا جانە قارقىندى تەراپيا بولىمىندە 405 ادام جاتىر. ال 63 ناۋقاس جاساندى تىنىس الۋ اپپاراتىنا قوسىلعان. ينۆازيۆتى ەمەس جاساندى تىنىس الۋ اپپاراتىندا 165 ادام ەم قابىلداۋدى جالعاستىرۋدا. High flow-دا 169 اپپارات جۇمىس ىستەيدى.
مەديتسينالىق-سانيتاريالىق العاشقى كومەك موبيلدى بريگادالارىنىڭ جانە تەلەمەديتسينا ورتالىعىنىڭ امبۋلاتوريالىق باقىلاۋىندا 12301 پاتسيەنت بار. ونىڭ ىشىندە ىندەت بەلگىلەرى بار، ورتاشا اۋىر جاعدايدا - 11770 ناۋقاس. 531 ادامدا كوروناۆيرۋس بەلگىلەرى جوق.
