مەملەكەتتىك ءبىلىم گرانتى يەگەرلەرى قاشان بەلگىلى بولادى

نۇر- سۇلتان. قازاقپارات – ق ر ءبىلىم جانە عىلىم ءمينيسترى اسحات ايماعامبەتوۆ مەملەكەتتىك ءبىلىم بەرۋ گرانتتارى يەگەرلەرىنىڭ ءتىزىمى قاشان شىعاتىنىن ايتتى، دەپ حابارلايدى قازاقپارات ءتىلشىسى.

«ءبىز دايىندالىپ جاتىرمىز. ءبىلىم بەرۋ گرانتتارىن تاعايىنداۋ جونىندەگى رەسپۋبليكالىق كوميسسيانىڭ ءبىرىنشى وتىرىسى ءوتتى. ورىنباسارىم قۋانىش ەرعاليەۆ وتكىزدى. قازىر كوميسسيا وتىرىسى ءوتىپ جاتىر. تامىزدىڭ 15 ىنە دەيىن بۇل جۇمىس اياقتالادى دەپ كۇتەمىز. سودان كەيىن ادەتتەگىدەي تاعايىنداۋ قورىتىندىسىن جاريا ەتەتىن بولامىز»، - دەدى اسحات ايماعامبەتوۆ Tengrinews.kz اقپاراتتىق پورتالىنا بەرگەن سۇحباتىندا.

ايتا كەتەيىك، بيىل پرەزيدەنت تاپسىرماسىمەن گرانتتاردىڭ جالپى سانى 5 مىڭعا ارتىپ وتىر. ياعني، وتكەن جىلى ءبىلىم بەرۋ گرانتتارىنىڭ سانى 51 مىڭ بولسا، بيىل 56 مىڭعا دەيىن ارتتى.

سونداي- اق گرانتتاردى ءبولۋ كەزىندە العاش رەت ازاماتتاردىڭ الەۋمەتتىك وسال ساناتتارى ءۇشىن كۆوتالار كوزدەلگەن. وسى جىلى ءبىلىم بەرۋ گرانتتارىن تاعايىنداۋ كونكۋرسىنا قاتىسۋ ءۇشىن بارلىعى 75 مىڭنان استام ءوتىنىم بەرىلدى. بۇل 2020 -جىلمەن سالىستىرعاندا 13 مىڭعا ارتىق.