مامان ۆاكسينالاۋداعى باستى قورقىنىشتى ايتىپ بەردى
مۇنداي پىكىردى الماتى پسيحيكالىق دەنساۋلىق ورتالىعىنىڭ ديرەكتورى ساپار راحمەنشەيەۆ ءبىلدىردى، دەپ حابارلايدى قازاقپارات ءتىلشىسى.
الماتى پسيحيكالىق دەنساۋلىق ورتالىعىنىڭ ديرەكتورى ساپار راحمەنشەيەۆ مەگاپوليس تۇرعىندارىنا كوروناۆيرۋسقا قارسى ەكپە جاساۋ كەرەكتىگىن ايتتى.
ونىڭ پىكىرىنشە، ۆاكسيناتسيا قازىرگى ەپيدەميولوگيالىق احۋالمەن كۇرەسۋدىڭ ەڭ ءتيىمدى ءادىسى. ۆاكسينالاۋداعى باستى قورقىنىش - ادامداردىڭ ەكپەگە قاتىستى مەديتسينالىق تاقىرىپتى جەتە تۇسىنبەۋى.
«ۆاكسينالاۋ - بۇل جۇقپالى اۋرۋلارعا سپەتسيفيكالىق يممۋنيتەت قۇرۋ ءۇشىن ادام اعزاسىنا مەديتسينالىق يممۋنوبيولوگيالىق پرەپاراتتاردى ەنگىزۋ»، - دەپ ءتۇسىندىردى ول. سپيكەر ۆاكسيناتسيادان باس تارتۋ بويىنشا كوپتەگەن زەرتتەۋلەر جۇرگىزىلگەنىن ءمالىم ەتتى.
ونىڭ ايتۋىنشا، زەرتتەۋلەردە رەسپوندەنتتەردىڭ كوپشىلىگىنىڭ وسى سالادا ءتيىستى ءبىلىمى جوق ەكەندىگى انىقتالعان، سونداي-اق ولار دالەل رەتىندە راستالماعان اقپارات كوزدەرىنەن الىنعان ناقتى ەمەس دوستارىنان، تانىستارىنان، تۋىستارىنان، ينتەرنەتتەگى ماقالالاردان، الەۋمەتتىك پلاتفورمالاردان جانە باسقالاردان الىنعان جالعان اقپاراتقا سەنەدى.
«ۆاكسينالانۋدان باس تارتۋدىڭ سەبەبى - بۇل قىسقا مەرزىمدە جاسالعان كوروناۆيرۋس ينفەكسياسىنا قارسى قولدانىستاعى ۆاكسينالارعا سەنبەۋ، از ۋاقىتتا جاسالسا، ناتيجە ساپاسىز ءونىم پايدا بولادى دەگەن پىكىر كەڭ تارالعان. بۇل مالىمدەمە بۇقارالىق اقپارات قۇرالدارىنان ۆاكسيناتسيادان كەيىن ءولىم تۋرالى الىنعان اقپاراتپەن بايلانىستى، سودان كەيىن ءولىم قورقىنىشى پايدا بولادى. ارينە، ەگەر ادام ۆاكسينانى ونىڭ ومىرىنە قاۋىپ ءتوندىرۋ نەمەسە تەرىس سالدارمەن بايلانىستىرسا، ول باس تارتادى. بۇل قورقىنىشتار جاپپاي پسيحوزدى تۋدىرۋى مۇمكىن، ول قازىرگى پسيحولوگيا تۇرعىسىنان ەپيدەميا مەن پاندەميادان كەم ەمەس»، - دەيدى ساپار راحمەنشەيەۆ.
ول مۇنداي جاعدايلاردا دالەلدى ءادىستى قولدانۋدى جانە بارلىعىنا قولجەتىمدى تىلدە باياندايتىن بەدەلدى جانە عىلىمي اقپارات كوزدەرىن زەرتتەۋدى ۇسىنادى. سونىمەن قاتار، ول پسيحيكالىق دەنساۋلىق ورتالىعىنىڭ ماماندارى سەنىم تەلەفونى ارقىلى كۇماندانۋشىلارعا كەڭەس بەرە الاتىنىن اتاپ ءوتتى.
«ەگەر ادام قاتتى الاڭداۋشىلىق، مازاسىزدىق پەن ابىرجۋشىلىقتى سەزىنسە، بۇل ونىڭ دەنەسىنىڭ جاي- كۇيىنە تىكەلەي اسەر ەتىپ، دەرت تۋدىرادى. قۇزىرلى مامانداردان ۆاكسينانىڭ وڭ اسەرى تۋرالى ناقتى، تەكسەرىلگەن، عىلىمي نەگىزدەلگەن اقپارات العاننان كەيىن عانا ول تىنىشتالادى»، - دەيدى ورتالىق ديرەكتورى.
ءسوز سوڭىندا ساپار راحمەنشەيەۆ سالاۋاتتى ءومىر سالتىن ۇستانۋعا، پسيحيكالىق جانە فيزيكالىق بەلسەندىلىكتى قالىپقا كەلتىرۋگە، ۇيقىنىڭ وڭتايلى كەستەسىن قۇرۋعا جانە سەرگەك جۇرۋگە، تازا اۋادا سەرۋەندەۋگە، پوزيتيۆتى ويلاۋعا جانە جالعان اقپاراتقا سەنبەۋگە، قاۋىپسىزدىك شارالارىن ۇستانۋعا كەڭەس بەردى.
«ەگەر دەنساۋلىق ناشارلاسا، وندا تەز ارادا دارىگەردىڭ كومەگىنە جۇگىنگەن ءجون»، - دەيدى ول.
